ورود محرم
شهادت حضرت ابوالفضل (ع)
.
✍️ #زبدةالاشعار ✍️
.
🆔: @nohe_torki
.
سدید هریسی
.
محرم آیی گلیر باشلانیبدی بزم عزا
اولوبدی طشت گذاری مراسمی برپا
.
بو طشته کیم باخوری کربلا دوشور یادینا
اورک فغانه گلیر نینوا دوشور یادینا
.
بو طشت یاده سالیر کربلا حماسه سینی
او انقلاب کی دشمن کَسَنمَه دی سَسینی
.
او انقلاب کی عزّت یاراتدی اسلامه
اگر چه قانیله نهضت یئتیشدی اتمامه
.
بو طشت یاده سالیر کربلا مصیبتینی
بساط ظلموله آل علی اسارتینی
.
آپاردیلار اولاری شامه جه قولی باغلی
جفای دشمن بی رحمیله اؤرک داغلی
.
بو طشت یاده سالیر دشمنین شقاوتینی
علی اکبریله قاسمین شهادتینی
.
بو طشت یاده سالیر اوخلانان قوری مشگی
بنات هاشیمینین اؤزلره آخان اشگی
.
بو طشت یاده سالیرحضرت ابوالفضلی
نهایت ادب و غیرت ابوالفضلی
.
کی نهری فتح ائله ین حالداایچمه دی اوسودان
اولیدی غیرت و ایثارینه جانیم قربان
.
او لحظه یاده سالیب تشنه لب اوشاقلاری
شرار و سوزعطشدن یانان دوداقلاری
.
سویا باخیب دئدی آیا نئجه ایچیم بو سودان
بیرعده گوزلری یولدا قالیبدیلار عطشان
.
نئجه ایچیم بو سودان منتظر قالیب گؤزلر
بالیق کیمی چوبالیر تشنه لب علی اصغر
.
دئدی ازلده گرک اهل بیت اولا سیراب
علی الخصوص علی اصغرین آناسی رباب
.
خلاصه ایچمه دی سو غیرت و شرف کانی
ائدیبدی نفسینی غیرت یولوندا قربانی
.
ولیک مشگینی دولدوردی تشنه لب سقا
بو قصدیله کی لب عطشان بناته سو آپارا
.
گؤروب محاصره دیر دؤره سین آلیب لشگر
چکیب قیلینجینی اول پور فاتح خیبر
.
ائدیبدی شیر دلاورهجوم او دم قوشونا
حیاتی ایله دی او عرصه ده عدم قوشونا
.
پوزوبدی لشگرین آرایشین سینیب صفلر
یاریبدی قلب سپاهی او شیر رزم آور
.
یول آچدی لشگر ایچیندن گئده خیامه طرف
ولیک مشگی او اثناده اولدی تیره هدف
.
دلیندی تا کی سو مشگی اُمیدی آخدی یئره
چکیبدی رزمیدن ال حسرتیله باخدی یئره
.
سؤزولدی تا یئره سو اولدی مایۀ افسوس
اولوب او لحظه ده اخیامه گئتمه دن مأیوس
.
ائدیب محاصر لشگر دوباره سرداری
کی لاجرم او یَلین باشلانیبدی پیکاری
.
اولوبدی حمله ور او لشگر ستمکاره
ائدیبدی عرصه نی تنگ اول گروه اشراره
.
قیلینجینین قاباقیندان قاچیردی اوباشلار
دؤشوردی تورپاقا برگ خزان کیمی باشلار
.
ائدیردی حمله یمین و یساره برق آسا
قیریب توکوردی یئره ال ایاق یل هیجا
.
ستوهه گلدیلر آخر الیندن اولشگر
کی اولدولار اونا هر سمتیدن هجوم آور
.
حریف اولانمادیلارعاقبت او سرداره
اولوبدولارمتوسل نئچه کمانداره
.
اوزاقدان ایلدیلر اوخلارا نشان آقانی
ائدیبلر اوخلار او اثناده نیمه جان آقانی
.
اصابت ایله دی تیرسه شعبه صاق گؤزونه
چکنده تیری گؤزوندن گوزی آخیب اؤزونه
.
او حالدا چیخدی کمینگاهیدن ایکی ملعون
بیری سالیبدی اونون صاق قولون بیریسی صولون
.
عمودیله بیری ده باشینه ووروب ضربت
کسیلدی تاب و توانی گتیرمه دی طاقت
.
یئخیلدی تورپاقا داش قوم باتیبدی اؤز گؤزونه
الی یوخیدی کی تا حایل ایله سین اؤزونه
.
دوشنده تورپاقا لشگر اولوب هجوم آور
آلیبلا دؤره سینی الده نیزه و خنجر
.
یارالی پیکرینی شرحه شرحه دوغرادیلار
او ظلمه شدّت غمدن ملک لر آغلادیلار
.
او قدریاره واریدی او جسم اطهرده
کی قالمامیشدی هامار یئر یارالی پیکرده
.
بئله روایت ائدیرلر صدیق راوی لر
کی شکل ظاهریسیندن یوخیدی ذره اثر
.
اودور «سدید» کی شیعه همیشه قان آغلار
او صحنه یاده دؤشنده ائدر فغان آغلار
.
.
.
#عباسیه_شهادت
#محرم_آیی_گلیر_باشلانیبدی_بزم_عزا
#ترکی
.
✍️ #زبدةالاشعار ✍️
.
🆔: @nohe_torki
نظر دهید