راه شام
.
✍️ #زبدةالاشعار ✍️
.
🆔: @nohe_torki
.
دکتر یوسف معماری اردبیلی
تضمین از سعدی زمان
.
مرآت قلبیم اولموش علی پاره یانمیشام
دریای غمده غرقم و همواره یانمیشام
یوخ چاره دردیمه من بیچاره یانمیشام
هجرونده من علی یانار اودلاره یانمیشام
زلفون کیمین اولوبدی گونوم قاره یانمیشام
.
.
یولدا قالوبدی گوز وطنیمون غریبیم
یوخدور سوزیمه سوز وطنیمون غریبیم
ای دل بودرده دوز وطنیمون غریبیم
هم ناخوشام هم اوز وطنیمون غریبیم
یوخ مونسیم منیم قالوب آواره یانمیشام
.
.
بیر کیمسه یوخ قاپومی آچوب حالیمی بُلَن
پرسش ایدوب تنزل اقبالیمی بُلَن
بیر ناخوشام اورگده که آمالیمی بُلَن
بو یالقوز ایوده یوخ منیم احوالیمی بُلَن
یوز قویمشام بوحالیله دیواره یانمیشام
.
.
وار بیر نچه سوزوم بیرینی قوی دیوم ازل
تاپدی بو گونده کوکب اقبال عجب خلل
صید اجل گلوبدور علی باشیم اوسته گل
قارداش گیلنجه سن منی درک ایلسه اجل
کیم دفن ایدر بو درده ندور چاره یانمیشام
.
.
دائم اجل اوخی باشیم اوستونده قان یاخور
برق شرار هجرون علی هر زمان شاخور
ایو گوشه سینه هی علی حسرت گوزوم باخور
قلبیم یانور جگر آلشور گوز یاشیم آخور
آخدوقجا قانلو گوزیاشی رخساره یانمیشام
.
.
ائت بیر اورک گوزیله برادر منه نظر
قطع امید ایتمه منی قویما بی خبر
یولّا خبر آچوبدی دل آیا او سود امر
عمّه آتا عمو باجی یکسر ایدوب سفر
ایلدن کنار اولوب من بیماره یانمیشام
.
.
باد خزان اسوبدی سولوب گلشن و چمن
یاددان نیه چخارتدی منی شاه ممتحن
بیر سوز خصوصی قوی سنه عرض ایلیوم که من
خوار اولموشام گوزوندن ایراق یوخ گلوب گیدن
غمدن گونوم دونوبدی شب تاره یانمیشام
.
.
قارداش مکانون هاردادی بس هاردا قالموسان
جام وصالوی نه زمان داشه چالموسان
هجرونده سن گجه گونوز آرامیم آلموسان
بلمم نوار باشوندا منی یاده سالموسان
فکر ایتموسن که طعنۀ اغیاره یانمیشام
.
.
تک قالمیشام بو ایوده دونوب کهربایه یوز
گوز تیکمشم یولوندا قالوب انتظار گوز
عرض ایلیوم حضوروه قارداش یانقلی سوز
دیواریده یوزوم گوزی یولدا گجه گونوز
مدتدی فکر وصلیله مه پاره یانمیشام
.
.
«معماریَم» بو دردیمی اکبر سنه دیَم
دردیمه چاره ایله منیم ای وفا شیَم
بر نوکرم قاپوندا اودور فخر ایلیَم
لطف ایله ای شبیه پیمبر «حسینیَم»
نامرد الینده قالمیشام آواره یانمیشام
.
.
#راه_شام_معماری_اردبیلی
#اکبریه_اکبریه_شهادت
#سعدی_زمان
#مرآت_قلبیم_اولموش_علی_پاره_یانمیشام
#هجرونده_من_علی_یانار_اودلاره_یانمیشام
#ترکی
.
✍️ #زبدةالاشعار ✍️
.
🆔: @nohe_torki
نظر دهید