مهدی زهرانی گوزلر گوزلریم …
..
..
..
مصیبی تبریزی
..
..
..
مست عشقم باصفا صهبانی گوزلر گوزلریم
طور حقده سینه سی سینانی گوزلر گوزلریم
طلعتی مَه قامتی طوبانی گوزلر گوزلریم
وامدار تاجِ کرّمنانی گوزلر گوزلریم
قطره یم من ، صولت ِ دریانی گوزلر گوزلریم
دردمندم مهدی زهرانی گوزلر گوزلریم
..
..
..
گل آقا گل،ایندی سن سن جلوۀ محرا بیمیز
بادۀ وصلین اولوب هردم شراب نا بیمیز
نقش وجه ِ طلعتیندن زینت آلدی قا بیمیز
هرگونوزخورشیدیمیز سن هرگئجه مهتا بیمیز
سن سن آقا دار دنیاده بیزیم اربا بیمیز
مشعل تابندۀ عرفانی گوزلر گوزلریم
..
..
..
گوزلرون شهلادی بیرایماسی مین طوفان سالار
سوزلرین غوغادی بیرفتواسی قلبه قان سالار
قامتین طوبادی مین لر یوسفی حیران سالار
نرجسین عیساسی سن دم وئرکی جسمه جان سالار
زادۀ زهراسن آدون دردلره درمان سالار
مَفخر انسیّۀ حُورانی گوزلر گوزلریم
..
..
..
یابن زهرا جلوه گاه حُبّ جانان سنده دی
مرهم درد تمام دردمندان سنده دی
رهبروفرمانرواسن حُکم و فرمان سنده دی
بیز مطیع امریوخ گوزلر کماکان سنده دی
شاه اقلیم معانی سن بو عنوان سنده دی
گوهر گنجینۀ طاهانی گوزلر گوزلریم
..
..
..
غملی دوراندی ولایت ملکی سلطان آختارور
وادی ظلمت ده بیر خورشید تابان آختارور
دل دوشوب تاب و تبه دلبند و جانان آختارور
منزل قلبیم منای حقده مهمان آختارور
مبتلادور چاره سیز بیر درده ، درمان آختارور
چاره سیزلر دردینه درمانی گوزلر گوزلریم
..
..
..
یابن زهرا قلبیلر عشقونله بس لبریز اولوب
انتظارینده بهار دیده لر پائیز اولوب
تاج عزّت تا قیامت آدیوه تنفیذ اولوب
جام وصلیندن کیم ایچمیش مست وشورانگیزاولوب
بادۀ عشق ولایت دردیمه تجویز اولوب
گل آقا گل ساقی صهبانی گوزلر گوزلریم
..
..
..
یابن زهرا انتظاریندن دونوب قانه شفق
مقدمین تابوت شامی ایلیَر صبح ِ فلق
گل ایاقیندن ئوپوم ای تاجدار ما خلق
خاک پاین دورسنون هرشش جهات و نُه طبق
قیل منّور قلبیمی ای مظهر انوار حق
شام ظلمت ، نیّر تابانی گوزلر گوزلریم
..
..
..
یابن زهرا سن سن اقلیم ولانین گوهری
طائر قرب ِ خدای لایُریٰ نین شهپری
رتبه ده ، شان و وجاهتده علی نین بنزری
هاشمی خالون قویار حسرتده هر مه پیکری
خضر و الیاس و مسیحا و ملائک لشگری
اوچ یوزاون اوچ عاشق شیدانی گوزلر گوزلریم
..
..
..
کعبه دن ظاهر اولاندا ای فروغ ماسوا
اوندا کی ائتدون طواف خانۀ حقّی ادا
اونداکی آلدی وجودیندن صفا ، سعی و صفا
اوندا بیردشت بقیعه قوی قدم ای مه لقا
انتظارینده سنون قان آغلوری خیرالنّسا
پاسدار ِ درگه سوزانی گوزلر گوزلریم
..
..
..
گل آقا کربوبلا دشتینده قان اولدی خضاب
مست ائدوبدور یتمیش ایکّی عاشقی صهبای ناب
وئرمیوبلر آلتی آیلیق اصغره بیر جرعه آب
باغلیوبدور طفل نازین اللرین بیکس رباب
شاهد عشقه اوگون بیراوچ پراوخ اولدی جواب
اصغرین قانین آلان سلطانی گوزلر گوزلریم
..
..
..
یابن زهرا دشت غمده رونق ایمانه باخ
قتلگاه ایچره کسیلمیش باشه باخ قربانه باخ
سجده گاه عشقیده رزم آورِ عطشانه باخ
قانلی مقتلده پوزولمیش مصحف قرآنه باخ
جدّوین رگلردن آخمیش چشمه چشمه قانه باخ
پاسدار خون عاشورانی گوزلر گوزلریم
..
..
..
یابن زهرا وار گلایم گردش ایّامیدن
مملکتده شیوۀ اجرائی احکامیدن
بعضی مسئولین امرین ثروت آشمیش بامیدن
بعضی سی فارغ اولا بیلمیلله اخذ کامیدن
بعضی سی سیراب اولانمورجام رنگین فامیدن
یوللارا گوز تیکمیشم مولانی گوزلر گوزلریم
..
..
..
حقّی ناحق ایلیَن لر وامدار دین اولوب
صاحبان فتنه ایندی حافظ آیین اولوب
بعضی سی دوز بعضی سی امّا قانی رنگین اولوب
پول بیت المالیدن چوخ کیسه لرسنگین اولوب
چوخلاری غرق غنا و بزم آهنگین اولوب
ناخدای کشتی ِ دورانی گوزلر گوزلریم
..
..
..
گل آقا ظلم و فساد اوسته گئدور باده وطن
فقر و فحشا سایه سالمیش مملکتده تازه دن
کشور اسلامیده اخذ ربا اولموش علن
رشوه و پول نزوله یوز گتورمیش مرد و زن
قیردیرورچک،سسلورامّا روزوشب یابن الحسن
ذوالفقار قاطع ُ البُرّانی گوزلر گوزلریم
..
..
..
چوخلی ائوده نئچه آیدان گلموری بوی کباب
سفره باشینده طعامی یوخدی الّا نان و آب
نان شب محتاجی اولموش خلق پر سوزوعتاب
پولدا ارزش قالمیوب آخر،رفاه اولموش سراب
بیر نفر مسئول لردن وار وئره آیا جواب؟
بیله گئتسه ظلمت و طغیانی گوزلر گوزلریم
..
..
..
پول وسرمایه بیرعده فرد خاص اوستونده دی
مملکت تقدیری آخر نَرد و تاس اوستونده دی
مشکلون حل اولماقی رشوه،زاکاس اوستونده دی
زیرمیزی وئرماق اوسته التماس اوستونده دی
لُپّ مطلب بطن کشور اختلاس اوستونده دی
وامدار مَسلک ِ طاهانی گوزلر گوزلریم
..
..
..
آه و افسوس و فغان از هر ریاکارِ دغل
بعضی سی اسلامه اولموش مقتدای بی محل
مسجدی آلمیش الَه با پول و اسنادِ جَعل
اصلیده فعلی نماز و نیّتی امّا بدل
بیله کی یرلرده یوخ حیّ علیٰ خَیرالعَمل
شهسوار عالم معنانی گوزلر گوزلریم
..
..
..
بعضی مسجدده ریا اهلی نمازاوستونده دی
درگه معبودیده راز و نیازاوستونده دی
یوخ نمازینده اثرچون حرص وآزاوستونده دی
فکرائدور جمعیت ایچره امتیازاوستونده دی
ظاهرًا حق باطنًا امّا مَجازاوستونده دی
مقتدای مسجدالاقصیٰ نی گوزلر گوزلریم
..
..
..
ایکّی ئوزلی زاهد و عالِم لرائتدی قلبی قان
چَک قلنجین تاپماسین بیرآن منافقلر امان
ذوالفقارین حیدری دور ظلم و بیدادی ییخان
من دعا ایلیم سن آمین دی ایا صاحب زمان
عزّت ایرانی آرتیر ای امیر جمکران
اقتدار کشور ایرانی گوزلر گوزلریم
..
..
..
مدّعی لر ایلیور ایراد یابن فاطمه
ایستیور سالسون قلوب شیعیانه واهمه
گل آقا گل چات بو غوغاده منیم امدادیمه
گورنه وهّابی صفت لر داش آتولّار راهیمه
گل آقا بو اضطراب و ظلمته وئر خاتمه
تاجدار نیمۀ شعبانی گوزلر گوزلریم
..
..
..
گل آقا ، عشقینده عاشق لر قوروب اجلاسیه
بیر قیام ائت ماورای جنگ بدر و قاسیه
ظلم جائرلردن ایمان اهلی ایلور جاثیه(1)
رام اولوبدورنفسلرشیطان قوران وسواسیه
بیرگویول آلچاق لیق ائت،گل«مسجدعبّاسیه»(2)
یوسف گمگشتۀ زهرانی گوزلر گوزلریم
..
..
..
ای « مصیّب » گلشن عشقه صفا شهدی گلر
اول مسافر کی همیشه عازم ره دی، گلر
کیم ده وار حُبّ ولا بو سرّه آگه دی، گلر
اولما نومید عاقبت دنیا ولیعهدی گلر
کعبه بامیندن او گون بانگ انَا المَهدی گلر
قبلۀ آمال ِ مظلومانی گوزلر گوزلریم
..
..
..
(1) جاثیه : به زانو درآمدن
(2) ازمساجد تازه تجدید بنا شده شهر تبریز
..
..
..
#مهدیه
#مست_عشقم_باصفا_صهبانی_گوزلر_گوزلریم
#مصیبی_تبریزی
#ترکی
#زبدةالاشعار
نظر دهید