در ولادت و منقبت حضرت جواد (ع)
..
..
منتظری شریف آباد
..
..
معرفت پیکرینه جاندی رضانون بالاسی
مرد اندیشه و اِمعاندی رضانون بالاسی
..
وارث ختم رسولاندی رضانون بالاسی
صاحب حکمت وعرفاندی رضانون بالاسی
..
..
طفل هفت ساله ده بیر رتبه و حِجّیّته باخ
ایت نظر سیره سینه علمینی گور رفعته باخ
اسدالله بالاسوندا جنم و قدرته باخ
ثانیِ زادۀ عمراندی رضانون بالاسی
..
..
وار یری قدرینه گر ایلسه موسی غبطه
نسب و نسبتنه ایتسه مسیحا غبطه
نه فقط آدمیان عالم اعلا غبطه
مورد غبطۀ رضواندی رضانون بالاسی
..
..
اوّل زهد و ورع آخِر تقوادی تقی
مظهر مرحمت حضرت یکتادی تقی
آتاسی تک شرف عالم دنیادی تقی
وارث زمرۀ خوباندی رضانون بالاسی
..
..
نه تقی نوریدی بو نور علی النّوریدی بو
طوریده جلوه ایدن جلوه یه منظوریدی بو
شرع پیغمبری جاری ایده مأموریدی بو
مرشد و مفتی انساندی رضانون بالاسی
..
..
روح تقوا و فضیلت بشر نیک نهاد
آمر امر خدا اهل رضا ضدّ فساد
ایدوب حاتملری شرمنده سخاوتده جواد
آدی سرلوحۀ احساندی رضانون بالاسی
..
..
ازلی نوری شاخوب اولدی جهان نورانی
خلقه تکرار ایلدی خاطرۀ سینانی
یری وار هر قبسی یاندورا مین شیطانی
شاخۀ لَمعۀ یزداندی رضانون بالاسی
..
..
نورِ روی تقوی یثربی ایتدی روشن
عِطر سرشار بهشتیله مدینه گلشن
قاماشوب گوزلری خفّاش صفت اهریمن
تخت حرییّته سلطاندی رضانون بالاسی
..
..
بیرگونی جمع ایدوب عالملری مأمون دغا
اولدی صدر علما اکثمون اوغلی یحیی
درکیده علمیده سنجش اولونا ابن رضا
بیلونه عالم دوراندی رضانون بالاسی
..
..
بیرحقیرانه باخوب حضرته اول زشت مَأل
گوردی کودکدی اونی خوار ایلیه تاپدی مجال
دیدی مأمونه امیرا منه ویر اذن سؤال
هدفِ مبحث عدواندی رضانون بالاسی
..
..
الغرض عرض ایلدی حضرته ای نیک تبار
ندی حکمی بیری احرامیده گر ایتسه شکار
ناگهان لعل گهَر باری ایدوب فیض نثار
ناشر فیض اماماندی رضانون بالاسی
..
..
دیدی یحیایه اودم نهج بلاغه نوه سی
بوسؤالی که دیدون واردی نچه مرحله سی
متفاوتدی جوابوندا اولارون هره سی
بیلن هر مشگلی آساندی رضانون بالاسی
..
..
فرق ایدور حکم شکار حالت حِلّیله حرم
عالِم و جاهل اولا روز اولا یا لیل ظُلَم
بیر سؤالی ایلدی ییرمی ایکی نوع رقم
کشف اولوب حجّت رحماندی رضانون بالاسی
..
..
صله ایستور سوزونه منتظری سیزلردن
یازاجاق تا ئولنه عترت پیغمبردن
عمرینون آخِریدی وحشتی وار محشردن
حشریده شافع عصیاندی رضانون بالاسی
..
..
#جوادیه_مدح #جوادیه_میلادیه
#معرفت_پیکرینه_جاندی_رضانون_بالاسی
#منتظری #ترکی #زبدةالاشعار
نظر دهید