زبانحال رقیه خاتون خطاب بجناب زینب در خرابه
.
✍️ #زبدةالاشعار ✍️
.
🆔: @nohe_torki
.
#سبک_بالام_آغلاما_گلوم_آغلاما …
.
مرحوم عاصی تبریزی
.
من او بلبلم که جفائیله
پوزولوبدی گلشنیم عمّه جان
نقدر ساقام گرک اوج ایده
گوگه داد و شیونیم عمّه جان
.
.
دیوسن منه قیزیم آغلاما
نیه بس اوزون بئله آغلوسان
باخوسان خرابه نشین لره
یوزه سیل اشگوی باغلوسان
دم آتشینیله دمبدم
او یانقلی قلبوی داغلوسان
بویور اشگ آلیله دولماسون
نئجه بس بو دامنیم عمّه جان
.
.
نئجه آغلاماز او عفیفه قیز
که عذاره زلفی نقاب اولا
بو صغیر سنّیله عمّه جان
ایکی قولاریندا طناب اولا
بولوسن نئجه من عزیزیدیم
بئله روزگاری خراب اولا
گئدوب عزّتیم بو خرابه یر
اولوب ایندی مسکنیم عمّه جان
.
.
من اگر ئولم بو خرابه ده
هانی اکبریم دوتا یاسمی
فلکون گوروم یوزی گولمه سون
نئجه برهم ائتدی اساسمی
گلوری او کس که خرابیه
گوروری بو کهنه لباسمی
هاموسی شماتت ائدور گُلور
دوتور اود دلیم منیم عمّه جان
.
.
ائله کهربای غم و الم
سارادوبدی عارض آلیمی
یوزیمه نظر ائیلین بولر
منیم انتهای ملالیمی
بودور حسرتیم که بابام گلوب
بوله بیرجه صورت حالیمی
نئجه شام شومده شام اولوب
گوره روز روشنیم عمّه جان
.
.
منیم عمّه بیر ائیله ساعتی
گئجه گوندوز آختاروری گوزوم
که اجل گلوب منی قورتارا
بو زمانه دن کسیله یوزوم
سن اوزون بو بارده منصف اول
بئله بیر جفایه نئجه دوزوم
وورا شمر سلسله بوینوما
اولا طوق آهنیم عمّه جان
.
.
دگی بی سبب گوزومون یاشین
توکورم بئله رخ زرده من
داخی جانه گلموشم عمّه جان
یاتا بولمورم قوری یرده من
گنه بیر به بیر دیمورم سنه
چکورم ملالیمه پرده من
بوقدر که ئوللم اولور همین
بو خرابه مدفنیم عمّه جان
.
.
اگر ئولمیوبدی آتام منیم
باشوون ندور بس او قاره سی
نیه وا اخا دیوب آغلوسان
ندور آهوین او شراره سی
اورگون اوغوشدوروسان بئله
اورگونده واردی نه یاره سی
نیه واضحین دیموسن گنه
پوزولوبدی گلشنیم عمّه جان
.
.
منِ زاری بیر بئله مدّتی
بابام عمّه یادینه سالمیوب
دئمیوب خرابه ده دور قزیم
ندی سرّی قیدیمه قالمیوب
اگر ئولمیوب نیه گلمیوب
اوره گیمده دردیمی آلمیوب
نئجه سخت دلدى اوزی بولور
منِ زاره دشمنیم عمّه جان
.
.
بولوسن نه نحویله عمریمون
باشا وئرموشم گئجه گوندوزون
بو خیال و فکریله بیر گورم
بابامی، دیم من اورک سوزین
ئولورم نه خوشدی بو وقتیده
گله باشیم اوسته گورم یوزین
اولا آخرین نفسیم منیم
آتا قُربی مأمنیم عمّه جان
.
.
یریدور بو نوحییه عاصیا
سن حسیندن ایستیه سن صله
بو خانم بالاسنا آند وئر
او صِله یتیشمسه گَل دیله
اوزونون توجهی وار یقین
که بو سوز مؤثر اولور دله
من او بلبلم که جفائیله
پوزولوبدی گلشنیم عمّه جان
.
.
#حضرت_رقیه_عاصی_تبریزی
#حضرت_رقیه_شهادت
#من_او_بلبلم_که_جفائیله_پوزولوبدی_گلشنیم_عمه_جان
#ترکی
.
✍️ #زبدةالاشعار ✍️
.
🆔: @nohe_torki
نظر دهید