مدح حضرت زهرا (س)
.
✍️ #زبدةالاشعار ✍️
.
🆔: @nohe_torki
.
احمد شاهمرادی
.
من فاطمه، حبیبۀ خلاق داورم
آئینۀ تمام نمای پیمبرم
ام الائمه یم، شرف آل حیدرم
آزاده آرمانم و آزاده پرورم
هر ناامید امیدی، منیم اللریمده دی
قفل دعا کلیدی، منیم اللریمده دی
.
.
گون آسماندا تابشینی مندن ئورگشوب
آی محورینده گردشینی مندن ئورگشوب
اولدوزدا ئوز درخششینی مندن ئورگشوب
حقه ملک نیایشینی مندن ئورگشوب
یئر ناز ائدر قعودیمه، گویلر قیامیمه
حق خلقتی یاراتدی منیم احترامیمه
.
.
الله ذوالجلال جلالت وئروب منه
نسوانین اورتاسیندا فضیلت وئروب منه
محشر گونونده اذن شفاعت وئروب منه
هر رجسیدن بری ائدوب، عصمت وئروب منه
گر اهل بیتی پنج تنیلن تانیتدیروب
پنج تنی سماده منیلن تانیتدروب
.
.
عرش اهلی سایۀ شرفیمده ائدوب مقام
جبریل آستانیمه هر گون ائدر سلام
دامانیمه فرشته ویرار چنگ اعتصام
حجت بیلر منی اؤزونه یازده امام
اوضاع خلقته سر و سامان وئرن منم
پرده دالیندا مهدیه فرمان وئرن منم
.
.
سجاده می آچاندا نمازه به وقت راز
ایلر فرشته لرده در آسمانی باز
اوندا گلر قولاقلارا بو صوت دلنواز
ای اهل راز فاطمه دن ئورگشون نماز
الله سؤزی ملکلری بی صبر و تاب ائدر
اوندان منیم دعالریمی مستجاب ائدر
.
.
دشمن تلاش اندور بیزی تضعیف و خوار ائده
نسل جوانی خط علیدن کنار ائده
کیمدور پیام فاطمه نی انتشار ائده
شیعه اؤزون گرکدی ولایتمدار ائده
سیندیر بت غروری دئنن یاعلی مدد
گؤر جلوۀ ظهوری دئنن یاعلی مدد
.
.
انگشتر اولسا خلقت اگر من نگینی ام
طاها امیدی من، او امینون امینی ام
حوری لرین، فرشته لرین همنشینی ام
هم آسماندا واردی یئریم، هم زمینی ام
من آسمانیدن یئره بیهوده انمدیم
چون مرتضانی یئرده کمک سیز گورنمدیم
.
.
قرآن بلا گونونده بیزی صبره تاپشوروب
دینی نبی نه ملحده، نه گبره تاپشوروب
حق، آفتابی هاردا پس ابره تاپشوروب؟
مظلوم علی، بقیعده منی قبره تاپشوروب
تصویر عشق، قلبلر آئینه سینده دی
قبریم ائله بو شیعه لرین سینه سینده دی
.
.
ای روزگار من هارا، درد و بلا هارا؟
ابلیسیان عصر هارا، مرتضی هارا؟
اوچ یوز نفر هارا، حرم مصطفی هارا؟
نامحرمین الى هارا، خیرالنّسا هارا؟
عزّتله عمر ائدن طلب ذلت ایلمز
غاصبلره عم اوغلوم على بیعت ایلمز
.
.
ای بحرلر گؤزوم یاشی تک ایلیون خروش
یئللر اسون، بو آتشی سیز ایلیون خموش
ای توستی چخ گویه ائله عرشی سیاه پوش
سینه مده خون مصطفوی ایلیوبدی جوش
کرب و بلایه حاضر ائدوبلر زمینه نی
مسمار ساکت ایلیه بیلمز بو سینه نی
.
.
اهل مدینه دام بلا قورمیون گئدون
بیزدن نه ایستوسوز؟ قاپودا دورمیون گئدون
باب سرای عترتی یاندیرمیون گئدون
پیغمبرون نشانه سینی ویرمیون گئدون
بیر سس گلور قولاقیمه گل تک سارالموشام
سسلور حسین، آنا، ایاق آلتیندا قالموشام
.
.
ای ذوالفقار تیز على، چیخ نیامیدن
کسمه حمایتون بو کمک سیز امامیدن
برّنده سن جدل گونی سن هر حسامیدن
آل مرتضانین حقّینی، قوم ظلامیدن
سال شعشعه که برقی منه نور دیده دی
دور صاحبونده سن کیمی قدی خمیده دی
.
.
ابر بهار مثلی عجب دولدون ای فدک
گل آچمادی شکوفه لرون سولدون ای فدک
دلدن نشاط ریشه سینی یولدون ای فدک
آتدون بیزی، غریبه لرین اولدون ای فدک
بیر پارچا، دل قباله غمیندن شراره دی
قلبیم همان قباله کیمی پاره پاره دی
.
.
یا حمزه، ای عموی رسول بزرگوار
ای شیرگیر بیشه و ای مرد کارزار
روباه لر مدینه ده بیر شیر ائدوب شکار
سرپنجه سین بلند ائده گر شیر کردگار
روباه لر فراره قویار یوز دالین دالین
یثربدن آیری شهره قاچالار ایاق یالین
.
.
ای قونشولار ساقیمدا سولومدا دایانمادوز
من یاتمادیم نه چوخ گئجه لر سیز اویانمادوز
کفری آتوب حقیقته ساری دولانمادوز
یئر گوی یانور بو غمده، سیز افسوس یانمادوز
تاریخ دفترینده یازیلسون حکایتیم
سیزدن گرک قیامته قالسون شکایتیم
.
.
ای قنفذون هواده دوران تازیانه سی
ای میخ در، ای آتش ظلمون زبانه سی
شاهد اولون نه ایدی بو قومون بهانه سی
قبر اولدی محسنه قاپومون آستانه سی
بیر درده دوشموشم، نه دوا نه علاجی وار
زهرا قیامت اولسا، سیزه احتیاجی وار
.
.
ای اللریم، على اتگیندن اؤزولمیون
ای گوزلریم، باخور بالالاریم سؤزولمیون
ای قطره قطره اشگیم، عذاره دؤزولمیون
من یاسلیام، دئین یوخ عزاداره گولمیون
خوشدی عزا حالیندا دئیم وامحمدا
ایندی قاپی دالیندا دئیم وامحمدا
.
.
گل فضه جان، تعادلیمی ساخلیانمورام
دشمن هجوم ائدور، قاپونی باغلیانمورام
نامحرم اورتاسیندا اورک داغلیانمورام
پهلولریم سینوب، اوجادان آغلیانمورام
نه وار کمک، امان نه ویرور سینمون قانی
من هئچ هله، دوشوب خطره محسنون جانی
.
.
ای محسن، ای یارالی بالا، خسته جان بالا
آخرنفسلروندی، بیر آزدا دایان بالا
من یانموشام على حالینا، سنده یان بالا
بیر گون گلر آلار قانیوی قان آلان بالا
گل جسمیوی قوجاقیمه افسوس آلانمادیم
گهواریه سالوب سنه لایلای چالانمادیم
.
.
#فاطمیه_احمد_شاهمرادی
#فاطمیه_مدح #فاطمیه_شهادت
#من_فاطمه_حبیبه_خلاق_داورم
#ترکی
.
✍️ #زبدةالاشعار ✍️
.
🆔: @nohe_torki
نظر دهید