حالات حضرت امام کاظم (ع) «خبر»
.
✍️ #زبدةالاشعار ✍️
.
🆔: @nohe_torki
.
مرحوم #معزی_اردبیلی
.
موسی جعفرِ زهرای دل افکار منم
گوهر صبر و شکیبایه خریدار منم
باغلانان سلسلیه خسته و بیمار منم
اون بیر ایل زندگیده گولمدی دنیا یوزومه
آغلیور محبس تاریکیده زهرا یوزومه
.
.
ستم و ظلم زمانه ائلدی پیر منی
یوردی زندانیده بو کُنده و زنجیر منی
دوتوب هر شب دل شب نالهٔ شبگیر منی
قالمیشام بیرحالاگورسه تانیماز احبابیم
آغلیور وقت عبادتده منه محرابیم
.
.
آند اولا جدّهٔ ساداتون اورک یاره سینه
آند اولا عممون آغ زلفینه باش قاره سینه
آند اولا قارداشینون پیکر صدپاره سینه
آختاروردیم اوزومه بیر بئله خلوتگه راز
سجده گاهیمده دویونجا ائلیم راز و نیاز
.
.
هانسی ائودن آتا ایللر بویی گئتسه سفره
نامه سی گلمسه ائو اهلی دوشر دردسره
قزی اولسا گجه گوندوز بویانار اشگ تره
بولگیده چوخ غم هجران من مظلومه دوشوب
نیلیم الله گینه ده گوگلومه معصومه دوشوب
.
.
آل عباس آچوب ظلمه الین چون اموی
قالمیا زنده دیوبلر نقدر وار علوی
قوجا بیر سیدم افتاده ولی سند قوی
گوگرن اللریمه قمچی نماز اوسته ویرور
سیلی پوزقون یوزومه راز و نیاز اوسته ویرور
.
.
بوالعطاهیّه عَرَبده ادبی شاعریدی
شعراده یارادا منظره نی قادریدی
شعری طاووس مثالی بذیه ماهریدی
بیرگون هارون ستم پیشه محبت ائلدی
شعر زیبا اوخیا مجلسه دعوت ائلدی
.
.
قصر هارونیده فهمیده جماعت چوخودی
دین اسلامه او ملتده همیّت یوخودی
وصف هارونیده گلدی نچه بندشعر اوخودی
سفرا سوزلرینی صاف و مبرهن دئدیلر
اوجادان شعرینون هر بندینه احسن دئدیلر
.
.
گوردی هارون دنی قصریده تشریفاتی
شاعریندن اولونان بزمیده تعریفاتی
ایستدی محضره تحریک اولوب احساساتی
دئدی روحیم قوشی شعرونده بوگون هوشه گلوب
سیم و زر ایسته وئریم چوخ کرمیم جوشه گلوب
.
.
دئدی بیر سید نورانی یاتوب زنداندا
یوسف فاطمه دور شهرتی وار هر یاندا
جدینون شأنینه چوخ آیه گلوب قرآندا
نیلورم سیم و زری گل منی سن شاد ایله
موسیِ جعفری زندانیدن آزاد ایله
.
.
فوری مکّار زمانه الینه آلدی قلم
آلّادا ساده لری خیره طرف آتدی قدم
یازدی زندانیدن آزاد اولا سلطان امم
ظاهراً بو سوزی هارون علنی یازمیشدی
حکم قتلین ولی قبلا او دنی یازمیشدی
.
.
بوالعطاهیّه همان گون غرض حکم آلدی اله
چاتماقا محبس بغدادیده ائدوب چوخ عجله
حکمی مأموره وئروب تا اله مقصودی گله
سوروشوب حالینی زندانیده زندانباندان
دئدی مظلوم آقانی تز چخادون زنداندان
.
.
شاعره دوتدی دوتدی یوزون گلدی دیله زندانبان
دئدی صبر ایله گلور موسیِ جعفر الان
آچمیوبلار هله ده سلسله سین بوینوندان
ناگهان جنت الاعلا گولونون عطرین آلوب
بارماقین قویدی دوداقلارینه مبهوت قالوب
.
.
فلکین بو عملی قلبیمه مین اوخدی دئدی
گر ئولوبدور آقا تابوتی نیه یوخدی دئدی
شیعه لر رهبریدی ایستینی چوخدی دئدی
دفنینه کفنینه هرکیم گله اجلال آپارور
صاحب منزلتی دورت نفر حمال آپارور
.
.
چشم پیغمبر خاتم گینه اشگیله دولوب
قرمزی گول کیمی زندانیده دلبندی سولوب
حبس خانه قاپوسی تخته ی تابوتی اولوب
یانور انسان ئورگی یاندیریجی سوزلردن
نور چشم نبوی گورنه دوشوب گوزلردن
.
.
عصر چاقینده ئولن باشی بلالی آقاوای
اون بیر ایل اهل و عیالیندن آرالی آقاوای
گردنی سلسله لی بوینی یارالی آقاوای
ایاقین کنده سیخان دیده سی گریان آقاوای
اریین جسمی رطوبتده پریشان آقاوای
.
.
ای محبان حسین اولدی گینه قان اورگیم
گرچه چوخداندی پریشاندی پریشان اورگیم
حال فرزند رسوله دیورم یان اورگیم
بوالعطاهیّه دئدی حضرته مظلوم آقا وای
اوردا معصومه سی اولسیدی دیردی باباوای
.
.
گورممیشدی گوگرن میّتینی آغلاردی
ئولمگین ائوده ائشیتمیشدی جگر داغلاردی
قاره سین باشه سالوب هرگون عزا ساخلاردی
ولی مظلومه رقیه گوروب عریان باباسین
باشلیوب شامه گئدن وقته بیلور اوخشاماسین
.
.
ای منیم قلبیمون عمرینده صفاسی باباوای
جسمیده غارت اولان کهنه لباسی بابا وای
آغلادان قیزلارینی سینه یارالی باباوای
الووی تازه کسوبلر ائله بیل جان یارالی
یاره دن چشمه مثالینده چخور قان یارالی
.
.
قلبیمه یاتمادی سنسیز اویانیق کاشانه
قورخاقورخا گجه گلدیم گوروشه میدانه
شمعیدی یاره لی جسمون بابا من پروانه
داغلی سینوندن ئوزوم اخلاری دردیم یارالی
یاروون اوسته آچوب زلفیمی سردیم یارالی
.
.
بابا بیر عده آدامسیز لارووی دور یولا سال
نعشوی دوره لین قیزلاروی دور یولا سال
گوزلری پرنم اوغولسوزلاروی دور یولا سال
ئوزووه مقتل آراسیندا تکان وئر یارالی
ائووون اهلی مسافردی اذان وئر یارالی
.
.
ای«معزی»نگران اولماکی شاهوندی حسین
صفرسن زندگینده عزت وجاهوندی حسین
روز محشرده یقین پشت وپناهوندی حسین
سنی تأیید ائده گر اولماز ئورکده محنون
ذره شکّ ایلمه جنتده یرون واردی سنون
.
.
#کاظمیه_شهادت
#موسی_جعفر_زهرای_دل_افکار_منم
#ترکی
.
✍️ #زبدةالاشعار ✍️
.
🆔: @nohe_torki
نظر دهید