مین مین اوجالان قصر بیر آلچاق داغا دَیمَز #پندیات_صادقی_فرد

پندیات
.
.
.
مرحوم صادقی فرد
.
مین مین اوجالان قصر بیر آلچاق داغا دَیمَز
ظلم اوسته دوران قله، اَسَن چارداغا دَیمَز
.
یوز پارچا تیکانلیق دره باغبان باخیمیندان
بیر باغچا قرنفیل بیتیره ن توپراغا دَیمَز
.
حشمت لی سرای لاردا کی مرمر پاسیولار
دامان طبیعت ده حصارسیز باغا دَیمَز
.
اشرار الی نین زینتی قیمت لی بیلرزیک
احراره دمیردن دوزه لن قولباغا دَیمَز
.
بی غیرت آدام قصرده ایلشسه ده آنجاق
زندان دا شهامت له یاتان دوستاغا دَیمَز
.
هر بیر یاراماز قولدورا تعظیمه اَنَن باش
ظالم باشینا اندیریلن توخماغا دَیمَز
.
ناحق لره یاردیم لیغا قالخان یوموروق لار
حق اوسته گناه سیز چکیلن دیرناغا دَیمَز
.
ایش گؤرمه ین آرتیق یئیه ن آغ جانلی بیله ک لر
بیر ایلمه سالان خیردا قابار بارماغا دَیمَز
.
هر گون بو فنا دهرده مین رنگه دوشن لر
یئل لن دولانان یئرده گئدن یارپاغا دَیمَز
.
بو جرم و جنایت یئری نین جاه و جلالی
مولا بویوروب بیرجه جیریق باشماغا دَیمَز
.
خوشدور بو شعار آز یاشا، انسان یاشا #صادق
چوخ چوخ یاشایان گؤرموشم اوچ متر آغا دگمز
.
.
#پندیات
#مین_مین_اوجالان_قصر_بیر_آلچاق_داغا_دیمز
#صادقی_فرد
#ترکی
.
.