در شجاعت و شهادت حضرت امیرالمومنین علیه السلام
✍️ زبدة الاشعار ✍️
?: @nohe_torki
نوید آسال اردبیلی
نایب ختم نبی زینت خلقتدی علی
ید پر زور خدا شاه ولایتدی علی
یازماقا مدحتینی لطف خدا لازمدی
آدینی سسلمگه روحه صفا لازمدی
دیمگه غملرینی غملی نوا لازمدی
گرچه یوخ منده بولار،لیک آقامون سائلیم
درگه اطیبینون شاعر ناقابلیم
حیدرون منزلتین عیسی و موسی تانیار
آخرین مصحف حق صاحبی طاها تانیار
هامیدان یاخجی ولی حیدری زهرا تانیار
چون علی کفوی گرک مست الی الله اولسون
همسرون سینه ده هر سرینه آگاه اولسون
گورسه دوب شیرخدا عالمه شخصیتینی
دیدی سیم و زره ساتماز شه دین غیرتینی
سیندرا مین یول اگر قوم دنی حرمتینی
حقی اعلان ایلمک دن بو جهاندا، دویماز
جسمیدن شیر خدا رخت عدالت،سویماز
من بو مولانی آتوب ثانیه رهبردیمرم
فرشه سجده ایلیوب کافره سرور دیمرم
اورگدوبدور چون آتام سیم ومسه زر دیمرم
دییرم تا به ابد باشیمه افسردی علی
نقدر واردی جهان شیعیه رهبردی علی
ولی لازمدی بو سوز یدی سماده یازیلا
آب زرداریله یا ، بیت خداده یازیلا
یا کی دروازه ی هر شهر و بلاده یازیلا
بو سوزی درک ایلیون یکسره ای اهل زمین
کیم علی حقینی رد ایلیه کافردی یقین
حقیدن آدمه بیر عمده عنایتدی علی
زینت مسجد و محراب عبادتدی علی
داغیلان گلشن و گلزاره طراوتدی علی
شه بامعرفت ملک قضاوتدی علی
قوی بیله عرض ایلییم روح عدالتدی علی
بیرگونی عدل دل آچدی دیدی ای خلق جهان
دیمیون عدل آدیما قیمتیم ایلر ارزان
دیون حیدر منه سیز عالمه ایلون اعلان
منی چون شهره دنیا ایلین حیدردی
آدیمی افضل تقوا ایلین حیدردی
دم جانبخشی بونون مست ایلیوب عیسانی
بت شکن اللری حیرتده قویوب موسانی
کوز آچان گونده منور ایله دی دنیانی
ایشیدوبسن ولی بیر یولدا دییم جالبدی
گوز آچان کعبه ده تک ابن ابیطالبدی
کیم علی آدینه حرمت ایلیه حرمتی وار
باخما باغلاندی قولی لیک ابدی قدرتی وار
روحیمون چونکی حماسی سوزیلن الفتی وار
گوز باخور خامه یازور دل سوزونی دفترده
مرغ روحیم دولانور واقعه ی خیبرده
یثربی ترک ایلیوب قافله ی شاه جنان
خیبره ساری اولوب لشکر اسلام روان
بعضی مسرور گیدور بعضی غمین و نگران
اوکی مسرور گیدور عالمی زندان تانیور
اوکی محزون گیدور عالمی رضوان تانیور
بیری تسبیح ایلیور ذات حق منانه
بیری افشا ایلیور دل سوزونی جانانه
بیر باخون عشق گوزیلن سپه قرآنه
احمد ختم نبی لشکره سالار اولدی
حضرت شیر خدا دینه علمدار اولدی
تا چاتوب خیبره لشکر هامی دل زار اولدی
دین اسلامون علم پروری بیمار اولدی
گوزلری ایتدی ورم عالم اونا تار اولدی
امر ایدوب ختم نبی سالدیلا بیر بستر خواب
استراحت ایده آسوده او زیبنده جناب
امتی جمع ایلیوب احمد فرخنده مقام
ویردی ایمان و شرف لشکرینه نظم و نظام
خطبه ایراد ایله دی تا بیلینه اصل قیام
سونرا بوبکری آقا ایسته دی اوز محضرینه
دین حق پرچمین ی ویردی اونون اللرینه
الینه آلدی دنی دین خدا پرچمینی
بیلمیوردی چون ابوبکر جدل چم خمینی
خیبرون درک ایلیوب تا دژ مستحکمینی
قیدوب پرچمی ویردی دیدی عفو ایله منی
بیلورم ایلمیشم عرصه ده شرمنده سنی
بار دوم دا ویروب پرچمی بیر خیره سره
یعنی اسلام علمین ویردی پیمبر عُمَره
باخدی بوبکر کیمین عرصه ده بیر دور و بره
قلعه اوستونده باخوب دسته ی سربازیلره
فکر ایدوب گر ایده پیکار دوشر جان خطره
قیودوب محضر پیغمبره عرض ایتدی آقا
قلعه نی باشدان ایاقه بوریوب قوم دغا
راضی اولما جانیمیز قانینه بی جا بویانا
هامی بیلدی بو عمر بیر یل تن پروردی
غیرتی بیر صود امردنده یقین کمتردی
بویوروب ختم نبی ای سپه دین مبین
حضرت حقدی بو صحراده بیزه یارو معین
یمیشوک صدمه ولی اولمیاسوز زار و غمین
قلعه نی فتح ایلین بیر یل نام آور وار
یعنی فتاح بیزوک چون بیزیلن حیدر وار
امر ایدوب ختم نبی تا گله سلطان ولا
حیدرون سمعینه تا چاتدی بو سوز اول مولا
امر چون امر نبیدور ایله دی حقین ادا
شیر حق ایتدی اطاعت شه محشر سوزونه
بیر دعائیلن اودا ایتدی طبابت گوزونه
اذن پیکاری آلوب صاحب شمشیر دوسر
سیل تک فرشه گلور اهل سما سرتاسر
سسلنوللر بو گونون مثلینی گورمز گوزلر
حق بو گون حیدره بیر منصب دیگر ویره جک
منصب دست حق و فاتح خیبر ویره جک
چوخ وقاریلن علی عازم میدان اولدی
کیم گوروب هیبتینی دست به دندان اولدی
گورجگین خندقی شه مرکبی پران اولدی
بیر یریشده نچه عاشق دیلینی کسب ایله دی
قلعه دروازه سینه دین علمین نصب ایله دی
شیر تک شیرخدا باشلادی کفریله جدل
عزم میدان ایله دی حارث مکار و دغل
ویرمه دی فرصت پیکاری اونا دست اجل
شیر حق گوردی بیر ایش عالمی حیران ایله دی
بیر باخیشدا او یلی عازم نیران ایله دی
تا باخوب مرحب دون یرده جوان قارداشینا
گیینوب جنگی زره خودینی قویدی باشینا
نوبت جنگ ، یهودین یتیشوب اوباشینا
بیر طرفده غرض اول کافر نادان دوردی
بیر طرفده ولی سرچشمه ی ایمان دوردی
دیدی مرحب آدیمی خلق بیر اژدر تانیور
شهرت و مدحتیمی قلعه ی خیبر تانیور
قلعه اهلی منی بیر شهره برابر تانیور
جنگیدن هاردا سوز اولسا منیم آدیم دییلر
سن دئنن کیمسن ایا فارس زیبا منظر
بویوروب شیرخدا خالقیمون بنده سیم
احمدون صولتینون عاشق زیبنده سیم
او کی قرآن ایشیدوبسن من اونون زنده سیم
بعضی اعراب آدیمی فارس شجعان تانیور
ولی عرش اهلی منی پیکر قرآن تانیور
ال آتوب هر ایکی رزمنده اودم خنجرینه
ویردی مرحب نچه ضربه شرفون پیکرینه
ولی بیر ضربه علی ویردی او کافر سرینه
هامی مبهوت قالوبدور فلکون گردشینه
کلهی بولدی یاروب باشینی چاتدی دیشینه
قلعه نون قصد جدل ایله دی نچه نفری
ویردیلار دوشدی الیندن یره حیدر سپری
بیر عمل ایتدی علی مات ایله دی دیده لری
اودری کی گوتورنمزدی اونی اللی نفر
او همان دربی علی صول الینه ایتدی سپر
ذات حق شیر حقی فاتح خیبر ایله دی
حیدر اول دربیله بیر خدمت دیگر ایله دی
خندقون اوسته قویوب لشکره معبر ایله دی
الغرض قالب اولوب اهل سخا اهل شره
لطف حقیله چاتوب لشکر احمد ظفره
ایندی اول حیدری کی فارس شجعان اولدی
قالدی بیر حاله جهان حالینه گریان اولدی
صبح وقتی او علی قانینه غلطان اولدی
دگجگین باشینه خنجر بویوروب فزت ورب
یعنی من گیتملیم قارووی باغلا زینب
شیعه لر باغلادیلار شه باشینی دقتیلن
بوکدولر تز بیر عبایه بدنین محنتیلن
قییه ده منزله تا شیر خدا سرعتیلن
بیر طبیب تا کی گلوب شاهه طبابت ایلیه
قویا دارو باشینا رفع جراحت ایلیه
تخت شاهانه اولوب حیدره بیر کهنه عبا
آز قالوردی یتیشه منزله سلطان ولا
آز یولی قصد ایلیوبدور یریه اول مولا
دیدیلر گر یریسون باش یاروون قانی گلر
دیدی گورسه منی قان ایچره یقین زینب ئولر
منزله گلدی نجه شاه ولا قالسون هله
بیرطبیبی ایوه گتدیله غرض باعجله
باخدی بیر راس امامه اوحکیم گلدی دله
زهریدن گوردی سارالمیش اوشهین مه روسی
دیدی سوتدور بوجهان ایچره فقط داروسی
تابوسوز کوفه ده اقوام آرا افشااولدی
دیده لرابربهاران کیمی غمدن دولدی
دیدیلر گول بجرن دهریده گول تک سولدی
شاه دین اونلاراکی نان و غذا پایلاردی
باشلارین گوشه دیواره قویوب آغلاردی
سوت گتیردی نقدر عشقیمیزه کوفه لیلر
ولی حیدر حالینا ایتمه دی بیر ذره اثر
توکدی رخساره اودم آل علی اشک بصر
ئولمه میش شیرحقون تعزیه سین ساخلادیلار
باش باشا ویردیله نوحه دیدیلر آغلادیلار
سوروشاردی هامی آیا نجه دور رهبریمیز
تا اولوب جام وصال شه محشر لبریز
اویتیم لر گینه ده کوفه ده قالدی آتاسیز
دیدیلر بیر بیره بیز شه داشینی آتمالیوخ
دای بو گوندن گینه بیز کوفه ده آج یاتمالیوخ
دیدی جان اوسته علی ای حق یکتا گلدیم
محضر اقدسووه حضرت طاها گلدیم
آی منه گوره باتان قانینه زهرا گلدیم
سن ئولن گونده من ئولمیشدیم ایا غمخواریم
منه بیر جان دگر ویردی حق داداریم
هجره یوخ بوندان علاوه داخی حیدرده توان
بیلمه دی منزلتیم حیف اولا بو اهل جهان
ویردیلار باشیمه خنجر توکولوب صورته قان
دردیمی چاهه ویا اولدوزا زهرا دیمرم
دای اورکده نه سوزوم اولسا سنه فاش ایدرم
چون حسین شاعریم یدی گویه ناز ایدرم
شعریمیلن گیجه لر گویلره پرواز ایدرم
اشک چشمیله حقیقت قاپوسین باز ایدرم
من (نویدم)خانیموم فاطمه نون شاعریم
نوکر حلقه به گوش حرم طاهریم
#حیدریه
#حیدریه_شجاعت
#حیدریه_شهادت
#نایب_ختم_نبی_زینت_خلقتدی_علی
#آسال_اردبیلی
#ترکی
✍️ #زبدةالاشعار ✍️
?: @nohe_torki
نظر دهید