وداع
.
✍️ زبدة الاشعار ✍️
?: @nohe_torki
.
مرحوم شأنی تبریزی
.
نقدر ساقی غم ساغر شراب دوتار
او قدر دردیله الفت بو دل خراب دوتار
.
آلوبدی قلبیمین اوستین قرا بولود کیمی غم
بهارده چمن اوستین نجه سحاب دوتار
.
من ایستورم غمیله الفت ایتمیوم اما
منیله الفت ایچون باوفا صحاب دوتار
.
محبت اهلینه درد و غمین محبتی وار
بولوب که راحت آتار اهل دل عذاب دوتار
.
حسینه باخ نجه گوزدن هامی جهانی آتار
رضای یاری مقدم او مستطاب دوتار
.
حرملرینی اوتوز مین جماعت ایچره توکور
گیدور ئولوم یولونا مرکبین شتاب دوتار
.
بونون وداعینه عصرین امامی چوخ آغلار
اگر چه یاسینی هر یرده شیخ و شاب دوتار
.
نجه وداعیدی نه آیرلیق نه هنگامه
یازیلسا شرحی هامی عالمی کتاب دوتار
.
سوسوز امام گیدور قیزلاری ایله آغلور
سوسوزلوق اولماسا روی زمینی آب دوتار
.
علاوه آیریلقین وار اوزینده ایله بیر اود
او مشتعل اولا اود طاق نه قباب دوتار
.
ابوتراب بویوردی وداع اولان یرده
سرشگ اولماسا شعله یقین تراب دوتار
.
حسین ایستوری گیتسون اوشاقلار ال چکمور
عباسین عاتکه سی دامنین رباب دوتار
.
سو یوخدی دولدوروب اشگیله گوز پیاله سینی
سکینه سو عوضی شیشۀ گلاب دوتار
.
یولا سالاندا باجی قارداشین مسافرته
بیر الده آئینه بیر الده جام آب دوتار
.
ولی بو امره خانم زینبون یولی یوخیدی
بو باره دن دلنی غصه بی حساب دوتار
.
یولا دوشنده مسافر آلوب اوپر قرآن
بو رسم عالمی منظور اول جناب دوتار
.
قویار دوداقلارینی فخر ساجدین یوزینه
دوباره تشنه لبی تبدن التهاب دوتار
.
باخار بو رسمیدی آئینیه دوشنده یولا
مسافریکه اوزاق بیر سفر صواب دوتار
.
شهید عشقده مرآت حق نمایه باخار
جمال یاری گورر قلبین انقلاب دوتار
.
که یعنی حسرتیله زین العابدین یوزینه
باخار ایکی یولا توشه او پور و باب دوتار
.
باجیسی گوردی حسین چوخ باخور اویان بویانا
گوزینی حسرت اوزیله سرشگ ناب دوتار
.
دئدی حسین بئله حسرتله صاق صولا باخما
بو خسته قلبیم او باخماقدان اضطراب دوتار
.
سنی بو حالیله یالقوز گورنده یاشلی گوزوم
مگر شکسته گوگل اوز یرینده تاب دوتار
.
غم ایتمه قالمیوب عباس و اکبر و قاسم
مکدر اولما سنه زینبون رکاب دوتار
.
باخوب فراته طرف چکمه آهی آه اوسته
لوای عشقی بو کلثوم دلکباب دوتار
.
هوا چوخ ایستی دی بو سهلدور سوسوزلوق وار
علاوه گون یوزیوی تاب آفتاب دوتار
.
باش اوسته چتر کیمی دود آهیمی آچارام
گونون قباقینی آخر او احتجاب دوتار
.
یازاندا #شانی بو در خوشابی #خوشخوانه
خجالتندن اوزین لؤلؤ خوشاب دوتار
.
#وداع
#نقدر_ساقی_غم_ساغر_شراب_دوتار
#شانی_تبریزی
#ترکی
.
✍️ #زبدةالاشعار ✍️
?: @nohe_torki
نظر دهید