رجز و شهادت حبیب ابن مظاهر در روز عاشورا
.
.
محمد علی مصیبی تبریزی
.
.
نقش آلوب تا طلعتیم نقاش عالمگیریدن
آلمیشام صهبای عشقی می فروش پیریدن
.
.
من حبیبم ؛ تاجدار مشرقینون عاشقی
غزوه لر شیری همان بدر و حنینون عاشقی
سیز یزیدین پای بوسی بیز حسینون عاشقی
عرشیان حیراندی بیله عشق عالمگیریدن
.
.
ظاهرا پیرم ولیکن بیر جوان بختم بیلون
آیری تصویریز اگر ذهنیزده وار مندن سیلون
آلمیشام دریای عشق مرتضانین ساحیلون
ایستورم مخمور اولام پیمانۀ تقدیریدن
.
.
باخمیون فرتوت و پیرم یا کمانی قامتم
من اذان عشقه ذکر نافذ قد قامتم
من یسار لشگر عشقه امیر و حجّتم
تا جوشور قان رگلریمدن قاچمارام شمشیریدن
.
.
ایله قدرت منده وار طوماریزی برهم ائدم
کربلانین چوللرین قان لُجّه سیندن یَم ائدم
هنده نین اوغلی یزیدین قامتین من خم ائدم
ثابت اولسون شیرمیدان شیر اموبدور شیریدن
.
.
گرچه پیرم بلکه مینلرجه جواندان سرترم
بیشه لر شیری منم هر شیر ِنردن برترم
افسران ارشدیندن کوفه نین افسرترم
پنجۀ روبَه شکاریم واردی هر نخجیریدن
.
.
قادرم بیر گوز وُرونجا من پوزام پرگاریزی
دوغریام من تار و پود خیمۀ زرتاریزی
گرمی پیکاریمیله باغلیام بازاریزی
لیک عقلین تابعی تاثیر آلار تدبیریدن
.
.
علم و تدبیریم دیور قان ایچره لنگر ایلیوم
پهنۀ پیکاریده غوغای محشر ایلیوم
عاقبت بو جانیمی قربان اکبر ایلیوم
اکبر لیلایه خاطر حق گئچه تقصیریدن
.
.
ایستورم من بیله گونده عهدیمه ایفا ائدم
اشبه پیغمبره ئوز عشقیمی معنا ائدم
جان وئرنده تا خود پیغمبری رویا ائدم
نقش عشقه طرح آلام پیکرتراش پیریدن
.
.
من حبیبم دین یولوندا عهدو پیمان ائتمیشم
صیحۀ عشقیمله کاخ کفری لرزان ائتمیشم
بیرباجی قارداشه خاطر باغریمی قان ائتمیشم
بی ریا گلدیم کی دللر پاک اولا تزویریدن
.
.
من رسول اللهه شخصایاور و یار اولموشام
غزوه لرده ارتش اسلامه سردار اولموشام
دین یولوندا هر بلا گلدی خریدار اولموشام
صولتیمده کِلک لر عاجز قالار تقریریدن
.
.
کیمده واردور جرات ایمدی منله رودررو گله
تا حسام آتشینیم جوفۀ قلبین دله
زینبین بلکه شکسته گویلوده گلسون اله
قلبینه آرام آلا بو سوزده کی تعبیریدن
.
.
چکدی بیر نعره ، الینده تیغ جانفرسا حبیب
بانگ غوغاسی تزلزل سالدی آفاقه مهیب
بیر شجاعت گوستروبدور یاور شاه غریب
بیر آجیقلی شیر گویا قورتولوب زنجیریدن
.
.
مرتضی تک توولادی شمشیرینی بیر آنیده
ئوزگه بیر غوغا یاراتدی پهنۀ میدانیده
گوئیا شرزه نهنگیدی جوشور عمّانیده
باشلاری بیربیر بیچوردی فرقۀ تکفیریدن
.
.
مست صهبای حقیقت راهب بُرنای دیر
بیرسمندرتک ائدوردی نار ِسوزان ایچره سِیر
ناگهان بیر ضربه ووردی باشینه ابن نُمِیر
دوشدی آتدان جلوۀ حق پارلانوب تصویریدن
.
.
ایلیوبلر سینه سین نوک سِنانیلن نشان
حنجریندن ووردیلار تاآغزی اولسون لخته قان
تا مباد عباسی امداده چاغورسین بیر زمان
گلسه عباس آسمانه قان یاغار نخجیریدن
.
.
خیمیه یوز دوندروب گلدی فغانه ؛ یاحسین
گل کی اولدوم خنجر کینه نشانه یاحسین
اکبره سویله حبیبون باتدی قانه یاحسین
گل بو پیرین باشی اوسته قیل حذر تاخیریدن
.
.
ای « مصیّب» وورگیلن دامان آلُ اللّهه چنگ
نیّتین پاک اولسا گر احسان ائدللّر بی درنگ
بیله بیر یولدا حبیب ابن مظاهر ائتدی جنگ
سِیر اعلایه ،گئچوب باشی دَم شمشیریدن
.
.
#حبیب_ابن_مظاهر
#اصحاب_الحسین
#نقش_آلوب_تا_طلعتیم_نقاش_عالمگیریدن
#مصیبی_تبریزی
#ترکی
نظر دهید