زبدةالاشعار

نهر فراته گوردولر سردار بی همتا گلور #عباسیه_کهنمویی

شجاعت و شهادت حضرت ابوالفضل العباس علیه السلام
.
.
مرحوم کهنمویی
.
.
نهر فراته گوردولر سردار بی همتا گلور
الده علم حیدر کیمی بیر تشنه لب سقّا گلور
.
.
بیر نحویله عزم ایلیوب سو آلماقا بی اختیار
ماه بنی هاشم اولوب یول اوسته گون تک آشکار
عازمدی فتح خیبره گویا ولیّ کردگار
کیم مرحبی ئولدورماقا میدانه بی پروا گلور
.
.
گورجاق بو حالی یوز ویروب اهل جفایه اضطراب
بیر بی حیا اوز دوندروب ایتدی عمر سعده خطاب
امرون ندور بو باره ده وار لشکر ایچره انقلاب
باخ گور فرات اوسته نجه عبّاس رزم آرا گلور
.
.
سعد اوغلی اولدی باخبر ظلم و ستم دامین قوروب
قلب رسول اکرمه معناده بیر یاره ووروب
حفظ فراته تازه دن بئش مین سواره آرتیروب
باخموب عطشدن نالیه ذریۀ طاها گلور
.
.
گَلدی علی اوغلی اولوب چون کوفیانه روبرو
فرمایش ایتدی شرم ایدون ای لشکر بی آبرو
یاندی عیال مصطفی یوخ خیمه ده بیر شربه سو
بو نهره سیراب اولماقا هر کافر و ترسا گلور
.
.
یوخسا فرات ای کوفیان مهریۀ زهرا دگل
یا بو امام تشنه لب ذریۀ طه دگل
یا بو سوسوزلار عترت صدیقۀ کبری دگل
لشگر ایشیدمیرسوز مگر، فریاد واویلا گلور
.
.
آیا روادور بو سودان سیراب اولا گبر و یهود
آل علی عطشان قالا بو چولده ای قوم عنود
لب تشنه لردن ایلیه ناله سماواته صعود
فریاده بو اوضاعیدن انسیّۀ حورا گلور
.
.
حجاجین اوغلی سویلدی، ای زادۀ شیر خدا
هرگز حسینه ویرمروخ دنیا یوزین گر سو دوتا
سو هر نه قَدری بیزده دور ممکن دگل سیراب اولا
بوندان علاوه ایلروخ فکره نه که ایذا گلور
.
.
مختاریدور ایتسون قبول آخِر ایکی امرین بیرین
یا راضی اولسون بیعته تا کسمه سونلر اللرین
یا اینکه پامال ایلسون والیّ شامین لشکرین
بو گفتگودن نالیه دنیا و مافیها گلور
.
.
فرمایش ایتدی حضرت عباس او دریای کرم
یاخشی بُلر تاج سریم من بیعت امرین بُلمرم
اما صفوف دشمنی بیر آندا پامال ایلرم
باک ایتمرم موجه قشون هر چند چون دریا گلور
.
.
بی اعتنا بیر حمله ده سمت فراته یول آچوب
لشکر هامی روبه صفت، شیرین قباقیندن قاچوب
نهری آلوب اشراریدن، دین بیرقین اوردا ساچوب
گوردی فراتی موج ایدر مثل یم عظما، گلور
.
.
گورجاق فراتین موجینی اول خسور گردون مدار
دولدوردی اوجین، ایستدی ایشسون سودا بی اختیار
حسرتله بیر باخدی سویا، سویلوبدی اول ای نفس خوار
مهر عالمنده مقصدون گور مهریله همتا گلور
.
.
سن سو ایچورسن قارداشون اما عطشدن اودلانور
سوز عطشدن اود دوتوب صد پاره دللر دوغرانور
خوردا اوشاقلار اود دوتوب سوز حرارتدن یانور
شور و نوایه گورموسن اطفال مه سیما گلور
.
.
راه مواساتی دوتوب اوز نفس پاکین سِشمدی
قارداشینی یاد ایلدی رسم وفادن گیشمدی
اوجین بوشاتدی، دولدوروب مشکین، سو امّا ایشمدی
لب تشنه دریادن چخوب ماه جهان آرا گلور
.
.
سمت خیامه آت سالوب اول سیّد عالی نسب
ناگه خبردار اولدولار بو امره گرگان عرب
دورت بیر طرفدن ایتدیلر حمله گروه بی ادب
چون گوردولر الده دوتوب شمشیر برق آسا گلور
.
.
باک ایتمیوب اصلاً او دم یوز دوندروبدی لشکره
گویا آجیقلی شیریدی بیر حمله ایتدی صفلره
لشکر پراکنده اولوب صفلر قاریشدی بیربیره
دنیاده بیله نامور گور فکریوه آیا گلور؟
.
.
بو قصۀ پرشوریدن سعد اوغلی اولدی با خبر
سمت علمداره دونوب حسرتله بیر سالدی نظر
گوردی علی اوغلی سالوب تیغیله آفاقه شرر
مردانه حمله ایلیوری، هر سمتیدن اعدا گلور
.
.
فریاد قیلدی لشکره ای قوم مهلت ویرمیون
اطرافینی یکسر دوتون، عبّاسه فرصت ویرمیون
ایلر صفوفی تار و مار، آنی فراقت ویرمیون
بو غیظیله که زادۀ شیر حق یکتا گلور
.
.
بو شیر صولتمنددور خیلی دلاوردور بُلون
شاه ولایت اوغلیدور فرزند حیدردی بُلون
هَیجاده سانسیز لشکره، بیردی برابردی بُلون
بو قدری لشکردن گورون باک ایلمور اصلا گلور
.
.
سعد اوغلینون قصدین بُلوب چون فرقۀ بی نام و ننگ
دورت مین قوشوندان اوخ آتان آیریلدی اللرده خدنگ
بیر تیرباران ایتدیلر صاحب لوانی بی درنگ
سویلوب گورن، عباسیدور یا پر آچوب عنقا گلور
.
.
ظلم عدودن عاقبت صدپاره میداندا دوشوب
سرو صنوبر تک او گُل جسمی بیاباندا دوشوب
مشک اوخلانوب، بیرق یاتوب، قولّاری بیر یاندا دوشوب
هر آن بو غمده نالیه پیغمبر و زهرا گلور
.
.
سسلندی قارداش یا حسین درک ایت منی گَل دادیمه
سندنصورا بیر کیمسه یوخ یتسون منیم امدادیمه
جلاد الینده قالمیشام دورما یتیش امدادیمه
عبّاسیدن گَل گور نجه فریاد وا غوثا گلور
.
.
بُلمم نجه قارداش سسین درک ایلدی شاه زمن
سولدی سارالدی گُل کیمی آخِر امام ممتحن
عبّاسه امداد ایتماقا بیر نوعی چخدی خیمه دن
دنیا گوزونده تار اولوب مثل شب یلدا، گلور
.
.
سسلردی قارداش قارداشون سال یاده گلدیم هارداسان
ای ظلم الیله صید اولان صیّاده گلدیم هارداسان
امداده سسلردون منی امداده گلدیم هارداسان
سس ویر سسیمه دادیوه سبط شه بطحا گلور
.
.
تاپدی یارالی قارداشین بیر یرده شاه غم حشم
گوردی علمداری دوشوب بیر یرده، بیر یرده علم
فرمایش ایتدی قامتیم قارداش غمونده اولدی خم
قارداشه هر بیر غصّه دن قارداش غمی بالا گلور
.
.
ازبسکه شاه کربلا غمدن ایتیرمیشدی اوزین
ناله گلوگیر ایلیوب کشف ایلینمیردی سوزین
لطف ایلیوب قارداشینون بیر نحویله سیلدی گوزین
بو ماجرادن نالیه صدیقۀ کبری گلور
.
.
سسلندی قارداش سو یولون گوزلور سوسوزلار دور گیداخ
الده سو جامی قیزلاریم آغلار سیزیلدار دور گیداخ
سن گیتمسن اطفالیمون فریادی آرتار دور گیداخ
میدانه یکسر عترت سلطان اَو اَدنی گلور
.
.
ای کهنموئی دائماً وور دامن عبّاسه چنگ
توک اشکیوی تاپسون سوزون گوزیاشیویله آب و رنگ
عرض ایله یا رب یر یوزی اسلامیانه اولدی تنگ
ظلمت اولوب دنیا، هاچان مهر جهان آرا گلور

متن پیشنهادی:  ساغر عشق آمد اختر عشق آمد #عباسیه_بابک_اردبیلی

.
#عباسیه_شجاعت
#نهر_فراته_گوردولر_سردار_بی_همتا_گلور
#کهنمویی #ریاضی_تبریزی
#ترکی #عباسیه
#زبدةالاشعار

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی