وداع شهزاده علی اکبر (ع)
زبانحال لیلا (س)
.
✍️ #زبدةالاشعار ✍️
.
🆔: @nohe_torki
.
سیفی اردبیلی
.
نور طاها توکولور ماه جمالوندن علی
گئدوسن قوی بیر ئوپوم هاشمی خالوندن علی
.
.
واردی ای سروریم عجب نازلی خرامان یریشون
مصر عشقوتده سالوب گور نجه طوفان یریشون
یوسفیم صبر ائله لیلادن آلور جان یریشون
الیمی اوزمه او دامان وصالوندن علی
.
.
گلن اعصاریده بسیار دلاور دوغیلار
لاله صورتلی خمار گوزلی گوزللر دوغیلار
حسن قامتده نه چوخ یوسفه بنذر دوغیلار
چشم دنیا گوره هیهات مثالوندن على
.
.
گل یوزون لعل لبون جدّوه آیتدى یقین
بو قد و قامت ئوزی سرّ قیامتدی یقین
چشمه ی صافی جنّتده خجالتدی یقین
جام چشمونده اولان اشک زلالوندن على
.
.
نه گوزل طره لرون آلنوا تل تل توکولوب
پای مژگانه نه خوش سرمه ی جنت چکلوب
سنی کیم گورسه دیر آغ کفنه آی بوکولوب
آغ کفن چوخ یاراشور ترمه و شالوندن على
.
.
دونوب آهن قفس اولدی منه دنیای فراخ
گئدوسن رشته ی عمروم اوزولور سویلورم آخ
تلّه جن باری دولان نازیله تئز تئز منه باخ
دویمیوب غملی ننون چشم غزالوندن علی
.
.
مست سین باده ی خمخانه ی کرّمنادن
بو خمار عاشقوه غصّه چاتوب دنیادن
خالوون حضّ تماشاسین آلوب لیلادن
باری سن آتما بر شیدانی خیالوندن على
.
.
آچیلاندا دوداقون غنچه کیمی لبخنده
سندیروب قیمتینی طعنه ووراردی قنده
ایندی گور بوسوه واردور نجه حسرت منده
نه سیاق گوز گوتوروم عارض آلوندن على
.
.
نه قدر سن واریدون سندن على آد واریدی
دائماً لیلینون عمرینده شیرین داد واریدی
ای مسافر آیق اول یوللارا جلاد واریدی
دیولر تیغی گرور کام قتالوندن على
.
.
تنگ ائله عرصه نی ای شیر نریم قوم شره
ایشدی شمشیرون الوندن گوزلیم دوشسه یره
تیر مژگانلاروی قهریله ور سینه لره
جان قوتار مهلکه ی سخت جدالوندن على
.
.
داغ هجرون بیلورم آغ گونومی ایلدی شام
صبر ائله قوى الوى قلبیمه اولسون آرام
ایستورم من ایکی ایللیگ صوده بیر بوسه آلام
وسط طاق دو ابروی ملالوندن على
.
.
دوزدوم اون سگیز ایل اوغلوم سنه خاطر محنه
سنده بیر یول نچه ایل زحمتیمه جان دی منه
قاره وی باشیمه سالسامدا قییتسم وطنه
دیرم دویمادیم افسوس مقالوندان علی
.
.
ایندی که آیرلیقا حکم یازوب چرخ عبوس
شهپرون نازیله چال جلوه وی گورسون طاوس
لیلی باخدوقجا دئسون جان بالا یاندیم افسوس
آیری دوشدوم بو کمال و بو خصالوندن علی
.
.
.
.
#اکبریه_سیفی_اردبیلی
#اکبریه_شهادت
#نور_طاها_توکولور_ماه_جمالوندن_علی
#ترکی
.
✍️ #زبدةالاشعار ✍️
.
🆔: @nohe_torki
نظر دهید