نیلورم ثروت و سرمایه حسین نوکریم #عباسیه_شاهی_اردبیلی

امان نامه
.
✍️ زبدة الاشعار ✍️

?: @nohe_torki
.
شاهی اردبیلی
.
نیلورم ثروت و سرمایه حسین نوکریم
اگمرم باش ایکی دنیایه حسین نوکریم
.
ائشیدن لحظه حسین آدینی روحیم دیریلر
حاجتیم یوخدی مسیحایه حسین نوکریم

.
قویمارام مکریله سوز نردبانین آسمانا
هر کیمون همتی وار حاجتی یوخ نردبانا
التفات ایلمرم سلطانا خاقانه خانا
بیر شهون نوکریم که آدی سیغماز جهانا
یتمیشم منصب عظمایه حسین نوکریم

.
آقامون عشقی منیم روحیمی بی باك ایلیب
یوزومی بیر سوزومی بیر آدیمی پاك ایلیب
طبعیمی تیغ خطرساز و شررناك ایلیب
چوخ شقیلر اورگین شعرلریم چاك ایلیب
چوخ سوزوم اوخ ویریب اعدایه حسین نوکریم

.
کربلا عاشقیم خون و شهادت سسیم
بی مدد پادشهین ، ملتمسِ بیکسیم
نه مسیحم، نه ده کی جنته خاطر اَسیم
باخمارام کوثره من، چون که حسین تشنه سیم
تشنه دور روحیم او مولایه ، حسین نوکریم

.
هر یوزه آی پاراسی ، هر گوزه شهلا دیمرم
لاشه خور قوشلارا مرغانِ شکرخا دیمرم
پایمال اولسام اگر ، آلچاقا اعلا دیمرم
معصیتدور بو دیمک یا ئولرم یا دیمرم
ویرمرم ناحقه پیرایه حسین نوکریم

.
نیلورم مرتبه و منصب و نام و لقبی
فضل اگر اولسا، ایدر عالمه چوپانی نبی
شرف و شأن ویرر انسانا علم و ادبی
ورنه بیردور بشر اعجم و کلب عربی
عربی عشق و عجم پایه حسین نوکریم

.
فخر ایدر بلبلِ شیدا که گُله نغمه گرم
لیک گُلدنده گوزل وارمن اونا مفتخرم
سن دولان باغلاری بستانلاری ای اهل کرم
منده مولا آدینی هی یازارام ، هی ئوپرم
ایدرم فخر او مسیحایه ، حسین نوکریم

.
او شه تشنه دی شأنیم شرفیم منزلتیم
او شهون کپریگینه باغلیدی جان و جهتیم
اودی عشقیم ،اودی مشقیم ، اودی ذات و صفتیم
بیر توکین ویرسم ایکی عالمه ،یوخ معرفتیم
عارفم حسنِ دِلارایه ،حسین نوکریم

.
او بیر انساندی که آی ، واله اولار صورتینه
آسمان خم ایلیب قدین، اونون حرمتنه
چیخسا عیسی گُویه ده ، چاتماز اونون دولتنه
بیر گون ایکاش قویام ، صورتیمی تربتنه
دیم ای شمس جنان سایه حسین نوکریم

.
او بیر انساندی که یرده گُویی مهمان ایلیر
بیر نظر سالسا گلستانی گُلستان ایلیر
داشی گوهر، اودی کوثر، جسدی جان ایلیر
چاره سیز دردون اگر اولسا او درمان ایلیر
آگه اول سویله اطبایه حسین نوکریم

.
رتبه سین بیلمز اونین، بیلمسه کیم سرّ مگو
آدینی سویلَمگه ، عاشقه واجبدی وضو
مولری اصلده عشق آیه سیدی اِسمده مو
وصف ائدرلبلرینی فاطمه، حلقومنی هو
دیرم منده او زیبایه ، حسین نوکریم

.
نه فقط بنده غلامم او شه تشنه لبه
جبرئیلون جانی نوکردی او معنا نسبه
بیرده باخ ماه بنی هاشم او شیر عربه
گورنجه الده امان نامه گلن بی ادبه
دیور ای رذل فرومایه حسین نوکریم

.
سن دِیورسن که آتیب حقی دوتام باطلی من
بش گونون عشقینه تأیید ایلیم قاتلی من
صاحب امر ولایت تانیام جاهلی من
قویارام توپراقا جاری اولا خونِ دلی من
قویمارام بو سوزی اجرایه حسین نوکریم

.
سن دِیَن شه شرف و مرتبه دن دوریدی دور
اونی بو مردمه سلطان ایلین زوریدی زور
من حسینه دیَرم شه که حسین نوریدی نور
خاک نعلینین اوپوب فخر ایلین حوریدی حور
من وزیر اولمارام ادنایه حسین نوکریم

.
سن دیَن رهبر ئوزی فتنه دی روباه ئوزیدی
منی گمراه ائلمز حیله سی گمراه ئوزیدی
من دین رهبری تعریف ایدن الله ئوزیدی
ئونی مفتون ایلمز ماه فلک ماه ئوزیدی
والهم منده او والایه حسین نوکریم

.
سن دیورسن پوزا قرآنی عدم منده باخام
باش آچیب خیردا خانملار چکه هو منده باخام
آلتی آیلیق بالانی یاندیرا سو منده باخام
قارداشیم ایلیه قانیله وضو منده باخام
اوتان ای ارزل کم مایه حسین نوکریم

.
سن دیورسن که فراموش ائلیم اصغری من
تاپشورام حرملیه قمری نازک پری من
تک قویام عرصه ده شاهنشه بی لشکری من
شمره تسلیم ائلیم عترت پیغمبری من
ویرمرم تن بو تمنایه حسین نوکریم

.
دئنن اربابیوه ای رذل که آتسون داشیمی
فاطمه اوغلونا من ائتمیشم اهدا باشیمی
ایده ممکندی جدا نیزه گوزومدن قاشیمی
ایده بیلمز ولی مندن آیرا قارداشیمی
دئمیشم حضرت زهرایه حسین نوکریم

.
بو اوشاقلار که گلر کعبه زیارتلرینه
گل باخا آغزی آچیخ نظم و نزاکتلرینه
حیفیدور لکه دوشه روح عطوفتلرینه
تا وارام توز قونا بیلمز سر و صورتلرینه
دئمیشم عترت طاهایه حسین نوکریم

.
ترک ایدب قاصد اهریمنی اول ماه عرب
محضر شمس هداده ایلدی عرض ادب
دیئی ای شه که ثناگودی سنه روزیله شب
فیض عشقوندن اولار بحر تعب بحر طرب
عاشقم منده بو معنایه حسین نوکریم

.
قویارام کسسون ایکی پنجه می بدخواه آقا
قویمارام لیک رقیون چکه بیر آه آقا
سنه قرباندی سر و جان و زر و جاه آقا
کیم سنه باخسا ائدر سیر الی الله آقا
گلمیشم منده تماشایه حسین نوکریم

.
پرآچوب عشقویلن عرشیده جولان ایدرم
مست اولوب قوللاریمی هدیه عدوان ایدرم
آتسالار گر سنه اوخ آلنیمی قلخان ایدرم
یوز جانیم اولسا یوزونده سنه قربان ایدرم
سلطان اولسامدا ثریایه حسین نوکریم

.
ایتدی تایید او سوزی رزمگه واهمه خیز
یتیشیب اوجه کشاکش قیزیشیب جنگ و گریز
گود حلقوم عدودن قان ایچیب نیزه ی تیز
خنجرین قابض الارواح ایدوب اول مرد ستیز
سس سالیب عرصه ی هیجایه حسین نوکریم

.
تیر و زوبیندی چالور حنجره دن حنجریه
قانلی میدانی سالور منظره دن منظریه
یاغدیرور خنجری اود میمَنه دن میسریه
آز قالور پیکر عدواندا سوموکلر اَریَه
داد ائدور لشکر رسوایه حسین نوکریم

.
سیندیروب سیل خطر لشگر آشفته سری
چار میخه چکیلوب خوفیله پنج حس لری
شش جهتدن بوریوب جانلاری دوزخ شرری
هفت افلاکه سالوب هلهله طاها قمری
دئیور الحمد اهورایه حسین نوکریم

.
حیف بر ویرمدی اول جرات بی مثل و مَثَل
گوردی عرش اهلی دوشوب تپراقا بیر شیر جدل
نه گوزی صافدی نه آلنی نه ساغ ال وار نه صول ال
تیتریور لبلری اما دیور ای پیک اجل
حمد اولا حضرت یکتایه حسین نوکریم
.
.
زبانحال حضرت ابوالفضل (ع)
#عباسیه_شهادت
.
.
بولونوب چوخدا باشیم جملۀ عشاقه سرم
چون که من عاشق شاهنشه معنی گهرم
بوشلایوب جان او شهی ، آختارا گر عدن و اِرَم
ریسمان رشته سیدی من او جانا جان دئمرم
جان فدایم شهِ بطحایه حسین نوکریم

.
ای اجل پیکی او قدری منه بخش ایله مجال
که باشیم اوستونه گلسین شه فرخنده خصال
بیر نظر عارض مولانی گوروم جانیمی آل
او باخیش جانیمه جاندی او جانا یوخدی زوال
داخلم دولت ابقایه حسین نوکریم

.
سمع سلطانه یتیب زمزمه و ذکر وزیر
گلدی بالینینه اول حضرت بی شبه و نظیر
گوردی بیر پیکره مین نقشه سالیب خنجر و تیر
آیریلیر عضولر اما دیور آهسته او شیر
باخمیون آیریلان اعضایه حسین نوکریم

.
باشینی آلدی دیز اوسته دیدی اولام سپرون
روحیمون طایری سن حیف اولا کی یوخدی پرون
داغیلیب جان حسین تپراقا یا عضولرون
من شرمنده ائدور سیرت و لفظ و نظرون
یازوسان قانیله صحرایه حسین نوکریم

.
جنگیده دگسه باشا خنجر خونپاش یری وار
ولی بو باشدا برادر نقدر داش یری وار
دیدی دوغرانسا بو باش مین یره قارداش یری وار
دلبرا عشقون اولان یرده مگر باش یری وار
حاجتیم یوخ سر و سیمایه حسین نوکریم

.
نیه افسرده دی حالون بو نه افغاندی آقا
آغلاما سختیدی نوکر گوره گریاندی آقا
باش ندی قول ندی عشقون جانیما جاندی آقا
کیش هفتاد و دو ملت سنه قرباندی آقا
بالاخص من که ذَوی الآیه حسین نوکریم

.
چوخ باخیب ساغ گوزومه آه چکورسن علنی
خیردا بیر تحفه دی گوز ایلمه شرمنده منی
من گوزی ایستمورم ایستورم ای شاه سنی
دولانیم قوی باشیوا مکه کیمی ای مدنی
سس سالیم مسجد الاقصایه حسین نوکریم

.
نیه حسرتله باخورسان بو نه حالتدی آقا
یاریلیب آلنیم اگر عین سعادتدی آقا
بو گوزومدن دین اوخ روحیمه منتدی آقا
گوز قالا مشک گیده مایه ی خجلتدی آقا
دوشمرم ننگیلی غوغایه حسین نوکریم

.
#امان_نامه
#عباسیه_شجاعت
#نیلورم_ثروت_و_سرمایه_حسین_نوکریم
#شاهی_اردبیلی
#ترکی
.
✍️ #زبدةالاشعار ✍️

?: @nohe_torki