وداع حضرت اباعبدالله (ع)
.
✍️ #زبدةالاشعار ✍️
.
🆔: @nohe_torki
.
مرحوم سید حسین رجایی تبریزی
.
هامی بولر که شهون واردی نه مقاماتی
شه آتلاناندا اولار بیر پارا علاماتی
.
گییله دولتیان تازه رسمی بیرجامه
یازالا نچه گون اوّل بو امره برنامه
.
قوشون دوزللر یول اوسته سیاست ایله لر
شهون وجودینی لشگر حراست ایله لر
.
وزیرلر دوزولر دوره دن نظامیله
کسلّه رهگذری خلق ازدحامیله
.
امیرِ لشکر و سرهنگ ال ال اوسته دورار
نظامیله هامی یول اوسته دسته دسته دورار
.
دوزله دوره سینه پاسبان او حالیله
قوشون ایدر حرکت حشمت و جلالیله
.
آلولا شاهی آرایه ایدوب اراده گیدر
اونی سوار ایلینجه هامی پیاده گیدر
.
بو رسم کربوبلاده نجه تاپوب صورت
ئولونجه شیعلره اولدی مایه حسرت
.
گوروبدی زینب او سرفوجِ عدّهء نسوان
سوار اولور آتنا شهریارِ کلِ جهان
.
رکابنی دوتانی یوخدی تکدی بیکسدی
بوغصه زینب مظلومه صبرینی کسدی
.
توکوب سرشگینی عرض ایتدی اول حمیده سیر
شه آتلاناندا سپاهی مشایعت ایلر
.
دیمه یوخوندی سپاهون بیله خیال ایتمه
دایان باجون سنه قربان بو نوع تک گیتمه
.
منیم باشیمدادا بیر فوج لشگریم واردی
بیر عده یاسه باتان قاره معجریم واردی
.
اجازه ویرمنه بوقیزلارا ویروم فرمان
گلوب سنی یولا سالسون بو جمعِ سرگردان
.
اگرچه یوخدی اباالفضل و قاسم و اکبر
غم ایلمه نقدر ساقدی زینب مضطر
.
بو امره لشگر ایچینده چوخ افتخارایلرم
رکابوی دوتارام مرکبه سوار ایلرم
.
اگر ویریدی اجازه جهاده پیغمبر
گورردیلر که بو زینب نجه جهاد ایلر
.
نشان ویرردیم علی ضرب و شستینی بیرده
مگر قویاردیم آنامون قانی قالا یرده
.
اگرقبول ایلسن حاضرم علم گوتورم
دوشم قباقه سنی فوج لشگره یتورم
.
تصوّر ایلسه هرکیم بولور ندور مطلب
نجه رکابنی دوتدی او دم خانیم زینب
.
گوروب داخی گیدیری قارداشندان ال اوزدی
او خیردا قیزلاری گیتدی یول اوستونه دوزدی
.
قویوب کناره نگهبان رباب و لیلادن
گوزتلیون دیدی سیز شاهی مکرِ اعدادن
.
دورون یانندا اوزومی خیامه تیز یتوروم
یارالی قاراداشیمون کهنه کوینگین گتوروم
.
ویراردی حسرت الین اوز بلالی سینه سینه
او حالیله قیدوب وارد اولدی خیمه سینه
.
دولاندی خیمه لری کهنه پیرهن تاپدی
اوپیرهن دولوسی غصه و محن تاپدی
.
آلوب دوباره اونی پاره ایلدی شه دین
بلّوله معرفت اهلی بومطلبین سرّین
.
بولوردی چونکه اونون رختینی عدو سویاجاخ
وجودِ اطیبینی یرده بیکفن قویاجاخ
.
بو مطلبیدی همان شاه کربلا نظری
تمام عالمی یاندوردی فکرینون اثری
.
نظر بونیدی اونا رغبت ایتمیوب سویالار
اوکهنه کوینکنی ساترِ بدن قویالار
.
گلنده قتلگهه عترتِ شه مدنی
چتندی گورسه لر عریان قالوبدی گل بدنی
.
بیری بومطلبی نقل ایلیوبدی اعدادن
دوشنده یادیمه آهیم گیچر ثریادن
.
دیر او قدر یوباندی حسین تشنه جگر
دوشوبدی حیرته بو امریده قوشون یکسر
.
گوروبله گلمدی میدانه شهریارِ حجاز
اولوبدی خیمده شیون سسی طنین انداز
.
دوشوبدی حیرته لشگر هامی بیله بولدی
حسین گلنمدی میدانه خیمده ئولدی
.
باخان گورر قوشونون وضع و حالی برهمدور
هامی تعجب ایدردی نه وار نه عالمدور
.
دیردی بیربیرینه اول سپاه کینه شعار
اوشاقلار اوز اوزون ئولدوردی خیمه لرده نه وار
.
پیاده آتلو بو امره قالوبدی حیرتده
سکوت رزمگهی چولقیوب حقیقتده
.
سکوت خیمه سینون من حصارینی یخدیم
اوزوم سوروب آتومی تلّین اوستونه چخدیم
.
تعجبیله باخوردوم خیامه اوز اوزیمه
که ناگهان گورونوب غملو منظره گوزومه
.
بیری الندن اوپور عرض ایدربابا گیتمه
فراق دردینه گل بیزلری دچار ایتمه
.
بیری دیردی منه بیرده قیل نظاره بابا
واروندی فرصت اگرآل منی کناره بابا
.
بیری دیردی بیزی هجر اودیله یاندورما
باشون دالیجا سالوب چوللری دولاندیرما
.
بیری دیردی بیزه نوشدور قالاخ عطشان
گل ایله ترک سفر ای عزیزِجان باباجان
.
آپار بو حالتیله ویر منی اوقومه نشان
اوزوم گیدیم ایلیم بلکه دردیمه درمان
.
دیمه بو لشکر کفاریدن هراس ایلرم
قلج ویرانماسام البته التماس ایدرم
.
گوتورمرم باباجان ال گروه اعدادن
اوقدر عجز ایلرم ال چکلله دعوادن
.
او لشکره دیرم ای شرارِناس جهان
بابامدان ال گوتورون ایلیون منی قربان
.
اگرگورم که سنی ئولدورور بوقوم کفر
دونوب خیامه طرف سسلرم علی اکبر
.
نجه بو قیزلاری درد و بلایه توش ایدوسن؟
بو قدر دشمن ایچینده قویوب هارا گیدیسن؟
.
گیدرسن ایندیکه باخ قیزلارین نوا سسینه
اماندی گل بیزی قیتر بابام مدینه سینه
.
وصال وقتینه گوردی بیر آز زمان قالدی
قویوب عیالینی گوزیاشلی رزمه آت سالدی
.
(رجائی) بسدی کلامون خفیف ایله قوتار
سوزین لجامینی یغ قورتولان دگور اخبار
.
اگر چه بیتوه بیربیت واردی جنتده
حقیقت اولماسا ویرمزله یر بو قیمتده
.
.
#حسینیه_وداع #وداع
#هامی_بولر_که_شهون_واردی_نه_مقاماتی
#ترکی
.
✍️ #زبدةالاشعار ✍️
.
🆔: @nohe_torki
نظر دهید