شجاعت و شهادت حضرت قمر بنی هاشم ابوالفضل العباس علیه السلام
.
✍️ زبدة الاشعار ✍️
.
🆔: @nohe_torki
.
مرحوم حاج جواد حسینی زنجانی
.
هانسی مکتبدی اونون منشور عاشوراسی وار
هانسی مکتبدی اونون عباس تک مولاسی وار
.
.
کیمدی عباس دل آرا شمع بزم انجمن
نور چشم ساقی کوثر ولی ذوالمنن
همراه و همراز و پرچمدار شاه ممتحن
فضل الله نه ملاحتلی گوزل سیماسی وار
سرو تک قد رساسی قامت رعناسی وار
.
.
کیمیدی عباس دلاور پور میر مومنین
رهبر احرار عالم حامی دین مبین
افتخار آل هاشم زادۀ ام البنین
هانسی گلزارین ابوالفضل تک گل زیباسی وار
فخر ائدر شیعه ابوالفضل تک اونون آقاسی وار
.
.
کیمدی عباس علی سردار صحرای بلا
حیدر ثانی سپهسالار دشت کربلا
منصبی باب الحوائج اللری مشکل گشا
بندۀ فرزانه و شایسته رب المعاد
نام زیبا ابوالفضل شهرتی باب المراد
.
.
کیمدی عباس عبدصالح بنده پروردگار
کان تقوا مرتضا طینت اوزق هاشم تبار
مجتبی خصلت حسین خو گوهرکنزوقار
قاف عشقون بی مهابا پر وران عنقاسیدی
دردین اولسا سسله عباسی کرم دریاسیدی
.
.
شیعه نی الله ابوالفضلیله ایتموش مفتخر
یوخدی معصومیندن غیر از نظیری بیر نفر
خلق ائدوب عباسی تک خلقتده حی دادگر
عشقینون عباسین هیچ کیم درک ایدنمز پایه سین
باشیمیزدن آلماسون الله ابوالفضل سایه سین
.
.
گوردی عاشورا گونی تنها قالوب سبط رسول
تنگ ایدوبدی شاه دینه عرصه نی قوم جهول
اشک چشمی آخدی گول رخسارینه اولدی ملول
گلدی گوز یاشلی حضور زادۀ پیغمبره
بوینی چگنینده سلام ائتدی ولیّ داوره
.
.
عرض ائدوب دل خانه سین تیر محنله اویموشام
جامۀ الوان عیشیۀ پیکریمدن سویموشام
ویر منه رخصت جهاندا زندگیدن دویموشام
جانیمه رعشه سالوبدی دلده نار حاطمه
اذن ویر منده گیدوم میدانه یابن فاطمه
.
.
ئوپدی عباسون یوزوندن شهریار ماه رو
ائتدی فرمایش ابوالفضل ، ای جوان نیک خو
ممکن اولسا قیزلارا قارداش گتور بیر مشک سو
خورداجا قیزلار گلوب سوز عطشدن شیونه
سو گتور قوی قیزلاریم قارداش دعا ائتسون سنه
.
.
اذن الوب شهدن ابوالفضل رشید نامدار
دیلده بسم الله علی تک مرکبه اولدی سوار
بیر اله پرچم بیر الده تیغ تیز آبدار
رزمگاهه ئوز قویوبدی حیدر کرّار تک
ایلیور قرآن تلاوت جعفر طیّار تک
.
.
عزم جنگ ایلوبدی شیر نامدار کربلا
مرکز میداندا گلدی دوردی پور مرتضا
ئوز دوتوب اعدایه سسلوب ای گروه بی حیا
دیللروزده سیزلرون یوخ نور ایماندان نشان
سیزلری خوار ایلسون الله جهاندا کوفیان
.
.
ای جماعت من ابوالفضلم مه چرخ ادب
لافتا الا علی اوغلی ، اوزوم هاشم نسب
کربلاده قارداشیم ویرموش منه سقا لقب
سبط طاهانون بو چولده من شجاع الناسیم
قارداشیمون قانلی صحراده یل هیجاسیم
.
.
من حسین ابن علینون با وفا سربازیم
نور چشم مصطفانون عاشق ممتازیم
قلۀ قاف صفانون تیز پر شهبازیم
من علمدارم حسین نیروسینون سرهنگیم
قونداقی عرشه گئدن شاهون وزیر جنگیم
.
.
کسمیسیز سو یولارین ای فرقۀ بی نام و ننگ
عرصه نی آل رسوله ائتمیسیز ظلمیله تنگ
ائتمیسیز آل عبایه زندگی شهدین شرنگ
صود امر سوز عطشدن آز قالور اولسون کباب
سو تاپانمور خیمه لرده اوغلونا بی کس رباب
.
.
حب دنیا محو ائدوب دلده اولان ایمانوزی
زیر پاده قویموسوز قلبوزده کی وجدانوزی
سیندروبسوز شاه دینله ائتدیگوز پیمانوزی
ننگ و عار اولسون گوروم سیز تک وفاسیز ملّته
اَیمیسوز خفتله باش دنیادن اوتری ذلته
.
.
گوردی تاثیر ائتمدی پند و نصیحت لشگره
مرتضا تک باخدی بیر غیضیله قوم خودسره
هاشمی گوزلر قیزاردی ال آپاردی خنجره
سسلنوبدی ای الاه واد و حیّ احد
ای نجف شاهی علی ، یا مرتضی سندن مدد
.
.
حمله ور اولدی سپاه کفره چون شیر ژیان
هر طرفدن حمله ایلور دشمنه ویرمور امان
کوفه اشرارین توکور توپراقه چون برگ خزان
الحذر صوتی عروج ایلوبدی یردن گویلره
عرصه نی تنگ ایلیوب عباس قوم کافره
.
.
گزدیرور عباس الینده تیغ آتشبارینی
صولتی سالموش هراسه کوفه نون اشرارینی
فنّ جنگی لشگر کفرون پوزوب پرگارینی
کربلاده زنده ایلوب خاطرات حیدری
ایلیوب دللرده احیا نقش جنگ خیبری
.
.
غیرت الله اوغلی ایلور کوفه اهلین تار ومار
قهر عباسی گورن میدانیدن ایلور فرار
قورتاران جانین قویور ئوز چوللره دیوانه وار
ضرب شصتیندن دوشوبدی رعشه قلب دشمنه
گوئیا اولموش سلیمان حمله ور اهریمنه
.
.
شیر غضبان تک ابوالفضل سرور عالم پناه
هیبتیله دشمنه هر دم ایدن وقته نگاه
قورخوسوندان تیترشور دشمن بسان پر کاه
سرنوشت مارده ایلور فلک بعضین دچار
بعضی توپراقه آت اوستوندن دوشور بی اختیار
.
.
لشگری سیندیردی نهری آلدی پور مرتضا
مشگی دولدوردی ابوالفضل ، یادگار هل اتی
تشنه لب چخدی سودان سقای دشت کربلا
مشگ چگنینده علم الده مه برج هنر
گئتمگه اخیامه نخلستانیدن سالدی گذر
.
.
دورموشیدی کنج نخلستاندا بیر فرد لعین
ایلمیشدی روبه مکار تک یولدا کمین
ووردی بیر شمشیر ابوالفضلین سالوبدی صاق الین
همتی تنها بودی سو مشکینه اوخ دَیمیَه
سعی ایدور سو مشکینی سالم آپارسون خیمیه
.
.
ساخلیوب مد نظرده خیمه نون اصلی یولون
لیک عدو جرأت تاپوب دوتموش یولون صاق و صولون
دَگدی بیر یاره دوباره سالدی تندن صول قولون
مرتضا بوسه ووران قوللار اولوب تندن قلم
سینه سینده اهتزاز ایلور هله قانلی علم
.
.
سفله پرور عالمی یارب گوروم ویران اولا
خیمیه ساری گیدور باخمور نه صاقه نه صولا
ویرمیوب بیر مشک سو آخر فلک بیر جوت قولا
آتدیلار بیر اوخ او دم گلدی دَگوب سو مشکینه
دَگدی بیر اوخدا گوزوندن قان قاریشدی اشکینه
.
.
باشینه اما دَگن وقته عمود آهنین
ئوز دوتوب اخیامه سسلوب زادۀ ام البنین
درک ایله یالقوز قالان قارداشیوی قارداش حسین
گل هرایه قوللاریم قارداش اولوب تندن قلم
دوشموشم توپراقلار اوسته سرنگون اولموش علم
.
.
خیمه ده قارداش سسون آلدی امام خونجگر
گلمگه قارداش سراقینه آچوبدی بال و پر
گلدی قارداشین گوروب توپراقلار اوسته دیده تر
آلدی آغوشه ابوالفضلین یارالی باشینی
دیندیروب یالقوز قالان شه ، تشنه لب قارداشینی
.
.
آچ گوزون قارداش دئدی دور ، ای منیم آرخام ائلیم
دور الیمدن دوت ابوالفضلیم سئنوب قارداش بئلیم
دردیمی قارداش سنه اظهار ائدم دوتمور دیلیم
تیر آهیم غصه لی قلبیمی آز قالدی بُله
قویما میداندا شمادتله منه دشمن گوله
.
.
یاتما ایستی قوملار اوسته سر سپاهیم آچ گوزون
قویما اوج ائتسون سمایه دود آهیم آچ گوزون
دور منیم ای بو بیاباندا پناهیم آچ گوزون
باتما ای مه خیمه ده گوزلور یولون اولدوزلاریم
جام الینده منتظر دورموش یول اوسته قیزلاریم
.
.
قوی دیزیم اوسته ابوالفضل قویما توپراقه باشون
توکمه بیر بیله آتام اوغلی عذاره گوز یاشون
سنده گئتدون قالدی تک ، قارداش کمکسیز قارداشون
خیمه ده آلدوم سسون قارداش کسیلدی طاقتیم
دور ابوالفضل گور نجه قارداش بوکولموش قامتیم
.
.
ای ابوالفضل ای کسیلموش اللری مشگل گشا
معدن رحم و مروت درگهی باب رجا
ئوز قویوب درگاهیوه ایلر « حسینی » التجا
قیل نظر ای باب حاجت دلده آه سردینه
ایسته اللهدان شفا عباس ، گیزلین دردینه
.
.
#عباسیه_شجاعت
#عباسیه_شهادت
#هانسی_مکتبدی_اونون_منشور_عاشوراسی_وار
#ترکی
.
✍️ #زبدةالاشعار ✍️
.
🆔: @nohe_torki
نظر دهید