شهادت حضرت امام حسن (ع)
.
✍️ زبدة الاشعار ✍️
.
🆔: @nohe_torki
.
مرحوم سعدی زمان
.
هر چند هامی ظلمه اولوب صبری حسینون
اما گینه وار صحنی گوزل قبری حسینون
.
.
واردور یری سسلنسه بقیعی گورن ای وای
ای وای قالان قبری خرابه حسن ایوای
.
.
مسموم جفائیله بو والا گهر اولدی
هم حال حیاتینده یانوب خونجگر اولدی
هم حال مماتینده خدنگه سپر اولدی
هم قبرینه جور و ستم بی شُمَر اولدی
ای وای قالان قبری خرابه حسن ایوای
.
.
هر بی کسه یار اولسا بو دنیاده سعادت
قبری شه لب تشنه نین اولسا اونا قسمت
مدّ نظرینده گورونر روضۀ جنت
سویلر حسنین قبرین ائدن لیک زیارت
ای وای قالان قبری خرابه حسن ایوای
.
.
هر کیمسه اونون دوشسه یولی کرب و بلایه
باخسا حرم و زینت ایوان طلایه
شوقیندن آخار اشکی ائدر سجده خدایه
اما حسنین زائری آغلار بو ندایه
ای وای قالان قبری خرابه حسن ایوای
.
.
هر چند حسینون سویولوب جسم طریحی
عریان قویولوب قبره او اعضای جریحی
صحنیندن ائدر اوج گویه نام ملیحی
اما حسنون واردی نه صحن و نه ضریحی
ای وای قالان قبری خرابه حسن ایوای
.
.
جان تک آلار آغوشه حسین قبرینی زوّار
سورتر در و دیواره یوزین گوزلری خونبار
گُل عطری سَپَر زائره خدّام وفادار
اما حسنین قبرین اؤپن لر گورر آزار
ای وای قالان قبری خرابه حسن ایوای
.
.
زوّار ضریحه قویار اوز توزلی عذارین
اشکیله سیلر قبر حین گرد و غبارین
دشمنلر آلوبدور حسنین لیک کنارین
قویمازلا بیری اؤپسون اونون خاک مزارین
ای وای قالان قبری خرابه حسن ایوای
.
.
گونلر قاباقیندا بدنی یاندی حسینون
امّا حرمی ایمدی چراغاندی حسینون
گون قبرینون انوارینه حیراندی حسینون
حال حَسَنه گوزلری گرباندی حسینون
ای وای قالان قبری خرابه حسن ایوای
.
.
ای مُنتقِم مُنتَظَرای حجت قهّار
گل ایله بقیعه گذر اول عارضه خونبار
پوزقوندی حسن قبری نظرلرده قالوب خوار
نه شمع یانور گَردِ مزارین نه سیلن وار
ای وای قالان قبری خرابه حسن ایوای
.
.
اؤز لیلۀ دفنی هر امامین بودی مرسوم
قاره چکیلر قبرینه زوّار اولی مهموم
زهرانی ائدر قبر حسن نسگلی مغموم
قبرونده اؤزون تک دیر اولدی بالا مظلوم
ای وای قالان قبری خرابه حسن ایوای
.
.
قبر حسن اوسته نه اولار شمع نه قاره
نه کیمسه عزادار او مظلوم و فکاره
بیر عصرین امامی گئدر اول توزلی مزاره
آغلار دیر اول مرقده ائتدوقجا نظاره
ای وای قالان قبری خرابه حسن ایوای
.
.
گر گئتسه حسن کرب و بلاهی گوزی گریان
یاد ایلر او وقتی که حسین وئردی سوسوز جان
آغلار دیر ای وای کفن سیز قالان عریان
واردور یری سس وئرسه اونا شاه شهیدان
ای وای قالان قبری خرابه حسن ایوای
.
.
زهرانی «حسینی» گتور اللهه شفیعه
وئرسون ایکی دنیاده مقامات رفیعه
ثبت ائتسون علی دفترینه آدیوی شیعه
گئت اشکویله یاز بو سوزی خاک بقیعه
ای وای قالان قبری خرابه حسن ایوای
.
.
.
#حسنیه_شهادت
#سعدی_زمان
#هر_چند_هامی_ظلمه_اولوب_صبری_حسینون
#واردور_یری_سسلنسه_بقیعی_گورن_ای_وای
#آثارالحسینی2 ص 20
#ترکی
.
✍️ #زبدةالاشعار ✍️
.
🆔: @nohe_torki
نظر دهید