تنور خولی
.
✍️ زبدة الاشعار ✍️
?: @nohe_torki
.
مرحوم عابد تبریزی
.
هر کیم جهاندا طالب عیش و سروردور
یا عقلی یوخدی یا گوزی بالمرّه کوردور
.
نزدیک اولان سروره بو دارالسّلامیده
راه تمیز عقلیدن البته دور دور
.
ای هوشیار دل بیله غمخانه ملکیده
فکر اقامت ائتمه که جای عبوردور
.
دنیا اساسی درد و غم استه بنا اولوب
بد بخت او کسکه طالب عیش و سروردور
.
باخ گور ننوعی اوزدی هامی ماسوادن ال
سبط نبی که شافع یوم النشوردور
.
عشقینده عقلی ایلدی عاجز ویروبدی باش
بیر باشدا درک ایدنموری کیم بو نه شوردور
.
زهرا آناسی شام غریبانه تا گلوب
گوردی اوغول منامی مقام تنور دور
.
خولی ایوینده سبط نبی ایلیوب مکان
باطل مقرّی حقّه محل ظهور دور
.
کول اوستی مکر بازی دور سپهریدن
مشکوة نور معنی الله نور دور
.
حق جلوه سیله ساحت مطبخ سرا دولوب
کنج تنور غیر تجلای طوردور
.
راحت یاتوب کول اوسته شهنشاه مشرقین
گویا حریم وصلیده محو حضوردور
.
آئینه اخذ رنگ ایلیوبدور تنوریدن
دوتقون جمالی وجه خدای غفور دور
.
بالین ایدوب تواضعیله کوللر استینی
بیر باش که نازی مایۀ اعزاز حوردور
.
حال رضایتیله قویوب باش او بستره
فعلیله حق قضاسینه دلدن شکوردور
.
اما لبی حکایت ایدور سوز قلبینی
بیر لب که فیض بخش شراب طهوردور
.
«عابد» هوای مرقد پاکون ایدوب شها
بو آرزوی قلبی سنین و شهوردور
.
آگاهسن اورکده کی اسراره سن اوزون
اما گدایه عرض تمنا ضروردور
.
تا وار ولایتین اثری دلده یوخ غمیم
جرم و خطا شماره سی گور بیر کروردور
.
اوز ایتدیقیم گناهلری سانمورام حقیر
چوخ آگهم بو فعل کمال قصور دور
.
اما او یر که حقدی خطا بخش سن شفیع
جرم و گنه خیالی ایدن بی شعور دور
.
#تنور_خولی
#هر_کیم_جهاندا_طالب_عیش_و_سروردور
#عابد_تبریزی
#ترکی
.
✍️ #زبدةالاشعار ✍️
?: @nohe_torki
نظر دهید