اربعین
.
✍️ زبدة الاشعار ✍️
.
🆔: @nohe_torki
.
مرحوم میرزا عبدالوهاب حقیر خوئی
.
هر گوشه دن نوای حنین و انین گلور
دلدن شکسته نی کیمی ناله حزین گلور
.
برق شرار آه اولوب بسکه سینه سوز
کانون سینه دن نفس آتشین گلور
.
طوفان گریه موجه گلوب بحر دیده دن
دریا کیمی کنارینه درّ ثمین گلور
.
یر , گوی اولوب حسینه مگر مجلس عزا
فریاده ساکنان سپهر برین گلور
.
جوش و خروش و ضجّیه سکان آسمان
آه و فغان و نالیه خلق زمین گلور
.
ایتموش احاطه شش جهتی بانک الصلا
گویا صلای ماتم سلطان دین گلور
.
ماتم نشین پیمبر و صاحب عزا خدا
هم انبیا عزاسینه هم مرسلین گلور
.
گوی دن یره نزول ایلیوب بزم ماتمه
فرش ایتماقا ملائکه بال و پرین گلور
.
خورشید آسمان حیا بنت مصطفی
صف صف صاق و صولا دوزوب حور عین گلور
.
عشرین ماه عاشر شهر محرمی
تکمیل ایدور صفر خبر اربعین گلور
.
شاه شهید روضه سینه روضه خوانلیقا
بیر کاروان اسیر خرابه نشین گلور
.
کلثوم نوحه خوان دالیجا سینه زن زنان
اطفال دسته دسته یسار و یمین گلور
.
کیمدور خبر ویره گله تا پیشوازینه
لیلا خانم زیارتنه اکبرین گلور
.
مدهوش ایدر مشامینه ناف ترابدن
مشکین شمیم نافه گشا عنبرین گلور
.
بیر نامراد تازه جوان قبری اوستنه
بیر بختی قاره , قاره گینموش گلین گلور
.
یول گوزلوری عم اوغلوسی چخسون قباقینه
اما گتورموری دله قلبنده کین گلور
.
زینب الینده قارداشا قارداش نشانه سی
حاضر دوتوب او قانه باتان کوینگین گلور
.
شش گوشه قبرینی چکوب آغوشه جان کیمی
آغلار آنان یرینده اولوب جانشین گلور
.
هر تیر غم که شست فلکدن اولور رها
اول نشانیه دل زینب قرین گلور
.
صیاد تک کمان کش گردون جانیمین
قصدینده دور ایدوب منی دائم کمین گلور
.
هانسی مصیبتندن ایدوم ذکر یابن امّ
بیر بیر خیالیمه ستم اهل کین گلور
.
گویا ووراللا هلهله میداندا غارته
فرمان ویروبله خیمه لره مشرکین گلور
.
زلفیم آغاردی اوندا که گوردی بو گوزلریم
خنجر الینده قتلوه شمر لعین گلور
.
قدّیم کمانه دوندی او گوندن دوزلمدی
گوردوم جداده تا که سر انورین گلور
.
گاهی معاینه نظره ، گه خیالیمه
عریان قالان او گل بدن نازنین گلور
.
بیمار امام خاک شفادن شفا آلا
حاذق طبیبه تا دیه درد دلین گلور
.
صد آه کربلادن ائدوب کوچ یثربه
اولاد طاهرینِ رسولِ امین گلور
.
آزاده لر کمند جفای یزیددن
آزاد اولوبلا عترت حبل المتین گلور
.
قاصد گلوب خبر گتوروبدور مدینیه
حِلّ و حرم امینی امام مبینی گلور
.
بوینوندا شال ماتم الینده قرا علم
غمناک سینه چاک گلور شرمگین گلور
.
آشوب رستخیز پیمبر وفانی تک
فریاده یثرب اهلی کَهین و مَهین گلور
.
اطرافینی آت اوسته بشیرین دوتوبلا خلق
اما گورولله خیل ملول و غمین گلور
.
بیر بیر خبر دوتولّا جوانلار که هانسی گون
اکبر او سرو لاله رخ و مه جبین گلور
.
وقتین معیّن ایله نه گونده عراقدن
عباس نامدار او جوان گزین گلور
.
گوردی بشیر بیر اوجا قامت خانم اله
بیر طفل مه جبینین آلوب دور الین گلور
.
زهرا عزیزی اوغلی حسینی سوروشماقا
عباس آناسی فاطمه امّ البنین گلور
.
قلبی یانوب گورنده اونون حالتین بشیر
عرش ایلدی سنون بو سفردن کیمون گلور
.
عباس آناسی وئردی بشیره بئله جواب
سویله گوروم نه وقت حسینیم یقین گلور
.
هر قدر ایستدی دیه گوردی محالدور
بیردن وئره ئولوم خبرین چوخ چتین گلور
.
عرض ائتدی هئچ سوروشموسان عباسوی ندن
حیفی اونون جوانلوقونا عالمین گلور
.
دولدوردی گوزلرین دئمه قاصد آدی دله
هرگز آقا وجودی ایله نوکرین گلور
.
عباس و عون و جعفر و فضل حسینیمه
وئردوم فدا بو قدره گمانیم همین گلور
.
قربان اونون وفاسینه عباسیمه «حقیر»
حقّا که مستحقّ هزار آفرین گلور
.
#اربعین
#حقیر_خویی
#هر_گوشه_دن_نوای_حنین_و_انین_گلور
#ترکی
.
✍️ #زبدةالاشعار ✍️
.
🆔: @nohe_torki
نظر دهید