زبانحال حضرت امام حسین (ع) به حضرت زینب (س) در شهادت حضرت علی اصغر (ع)
.
✍️ زبدة الاشعار ✍️
.
🆔: @nohe_torki
.
مرحوم حسینی سعدی زمان
.
هلال برج عزّت گون اَلینده باتدی گَل زینب
چوخ آغلوردی بالام لایلای دیدی اوخ یاتدی گَل زینب
.
.
آلان یوخ بیر نفر بو قانلی قونداقی قوجاقیمدن
منه معلومیدور حالی رُبابین اوز سیاقیمدن
یوزیندن اوپموشم از بس آخور قانی دوداقیمدن
یوزیمده، اَللریمده تازه قانه باتدی گَل زینب
.
.
آچیلدی عالم ارواحیده تا عشق بازاری
متاع وصل حقّین اولمادی من تک خریداری
آچوب اکبر آدی اصغر قانی ختم ایتدی طوماری
بالام اوخلاندی من آلدیم حبیبیم ساتدی گَل زینب
.
.
رباب آغلوردی سویلوردی آز آغلا سینه می داغلا
گورنده آغلامور ایمدی دیر آغلا بالام آغلا
آناسیندان باجی گیزلین یاراسین گَل آپار باغلا
آنا آغوشینین فکرین باشندان آتدی گَل زینب
.
.
دگن ساعت بوغازیندن بو قوم سفله پیکانی
یارالاندی جگر گوشم گلوب جوشه جگر قانی
پوزولدوم باغریما باسدیم باجی بو تشنه قربانی
یاراسندان آخان قان سینه می ایسلاتدی گَل زینب
.
.
عطشدن ایله سولموشدی سارالموشدی بو دلخسته
گورنده سس چکوب آغلاشدی دشمن دسته بدسته
سُها تک اصغری هر کیم باخوب گوردی اَلیم اوسته
منی مهره بالامی اولدوزا اوخشاتدی گَل زینب
.
.
بوغاز نازک آتان قول قوّه لی اوچ شعبه لی پیکان
اودور علّت بوغازین بیچدی اوخ چون خنجر برّان
گیچوب دگدی قولومدان آخدی قان بو فرقۀ عدوان
ایکی قان بیر بیرینه بیر اوخیله قاتدی گَل زینب
.
.
ربابین سینه سین اوز صورتین دیرناق یاراسیله
خراش ایلوردی آجلیقدان سو فکری سود هواسیله
نه آغلور نه دینور نه حسّی وار بیر اوخ صداسیله
بالامی حرمله سسدن سالوب یوخلاتدی گَل زینب
.
.
بالام پستان خیال ایتدی ازل پیکان دمین اَمدی
بُلوب تا سوزشین آچدی گوزین گوردی ئولن دمدی
ایله گُلدی او گُلماق تا جهان وار مایۀ غمدی
دوباره گوزلرین یومدی مرامه چاتدی گَل زینب
.
.
«حسینی» ویردی اَلدن سود امر بیر طفل شش ماهه
یتوب بُلدی نه غم اصغر غمینده حُجّة الّلهه
نشست ایلر بو سوز چون نوک پیکان قلب آگاهه
هلال برج عزّت گون اَلینده باتدی گَل زینب
.
.
#اصغریه_شهادت
#هلال_برج_عزت_گون_الینده_باتی_گل_زینب
#لمعات_حسینی ص 175
#ترکی
.
✍️ #زبدةالاشعار ✍️
.
🆔: @nohe_torki
نظر دهید