حالات حضرت امام حسن (ع)
.
✍️ زبدة الاشعار ✍️
.
?: @nohe_torki
.
اسماعیل زرّین
.
وصیّ ختم رسول حُجّت خدادی حسن
امام خَلقیدی هر خُلقی مُستَحسَن
.
بو اسم پاکی بو نا حقیدن اولوب تعیین
ایدوبدی خالق اوزی خَلق و خُلقونی تحسین
.
اوچ ائیل مرور ائیلدی روزگار هجرتدن
عنایت ایتدی خدا خلقه مهرو رأفتدن
.
گتوردی عالمه بو شاهی اون بش رمضان
بونور پاکیله روشن اولوبدی چشم جهان
.
بو نوریله آپاروب فرشه رشک عرش برین
رسوله تهنیته گلدی جبرئیل امین
.
قدم قویوبدی بو عزّتیله دار دنیایه
آناسی حضرت زهرا اولوب اونا دایه
.
وئروبدی شیرۀ جان زحمتیله لیل و نهار
آچوب شکوفه ده گل عطره دولدی مثل بهار
.
اولوب بو عنچه گله باغبان خیرالنسا
آچاندا ایلدی تسلیم اُمّته زهرا
.
که بلکه رایحه سیندن تمام فیض آلا لار
بوعطر گلدن اَلَه روح جانفزا سالالار
.
نه عطر و گل اونی هر کیمسه ائتسه استشمام
اولار اونون اثریندن وجودی مشک تمام
.
نه مشک و عطر یقین بو سوزومده اولدی خطا
دلیم گلیلیدی تقریره ائیلینمور ادا
.
جهانی دانش و علم اوسته خلق ائدوب خلاّق
بولاردی دهریده ارباب دانش و اخلاق
.
بولاردی دینیله دنیانی ائیلین اصلاح
بولاردی خلق آرا خیرو وصلح و صلاح
.
بولاردی خلقی هدایت ائدن طریق حقه
بولاردی خلقه جهاندا امید گاه وثقه
.
بولاردی سوق ائیلن خلقی دانش و علمه
بولاردی امر ائیلین صبرو رفقت و حلمه
.
بولاردی دعوت ائدن خلقی حرمت و ادبه
شرافت بشری سایمیوب حسب نسبه
.
بولاردی سعی ائدوب هر دمده خدمت بشره
بولار تمیز جهاندا ویروبله خیرو شره
.
تمامی گولدی خوصوصا بو سبط اکبر دور
بهشت جوانلارینا بالحصوص سرور دور
.
بیله بویوردی مکرر پیمبر اکرم
بهشت اهلینه سروردی بو امام هُمَم
.
آدی حسن اوزی خلق ایچره مُحسِن و مَکرَم
تمام مفلس م مسکینه مُبذِل و مُنعَم
.
بساط عدلیده هر صاحب عدلیدن اَعدَل
مقام علمیده خلق ایچره اعلم و افضل
.
بلا و رنجیده صاحب وِقار و خُلق عظیم
معاشرتده هامی دوست و دشمنیله حلیم
.
وجودی دولت و ثروتله صابرو زاهد
حضور حضرت جاناندا خاضع وجاهد
.
گجه گونوز هامی ساعتده خالقه ذاکر
تمام عمروده هردمده حامد و شاکر
.
هامی امور و حوادثده عارف و کامل
هامی فرایض و احکامه عالم و عاقل
.
کمال فضلیده پیغمبر خدایه بدیل
حسب نسبده شرافتده منتهای اصیل
.
فصاحتیله بلاغتده حیدر ثانی
شجاعتینده سالان یاده شیر یزدانی
.
رسول بضعه سینه نور دیده طاقت دل
ولِیّ لم یزلین نخل عمرونه حاصل
.
هامی خلایقه مطلق امام و حجت حق
تدبّریله ویرن شرح احمد رونق
.
مقام و رتبه ده هر فرد و فریدیدن فائق
هامی صفاتیده هر فرد خلقیدن لایق
.
بئله وجوده روا دور دیولّه سبط رسول
سزادی بیله و جودین آناسی اولا بتول
.
بیله وجود اولا لازمدی جانشین علی
بو دور امام هدا و حیّ لم یزلی
.
بودور ولی خدا لنگر زمین و زمان
تمام ما خلق الله حجت یزدان
.
رسول و عترتنه وار نقدر الده حیات
تمام شوقیله بیرگوندرون اوجا صلوات
.
او دم که ترک جهان قیلدی ساقی کوثر
باتوردی ماتمه دنیانی صهر پیغمبر
.
بو محترم شهه بیعت ائدوب تمامی خلق
امام مفرض الطاعه بولدولر مطلق
.
علی کیمی اوتوروب مسند خلافتده
علینی یاده سالوب عدل و داد و رأفتده
.
بیر عدّه مؤمن خُلّص تمام رغبتیله
امامه تابع اولوب دینیله دیانتیله
.
بیر عدّه قلبیده فکر ریاست و دولت
اوشاهه حیله و تزویریله ائدوب بیعت
.
بیر آز زمان دولانوب روزگار بومنوال
یتوبدی موقع تشخیص و امتحان رجال
.
معاویه ایشیدوب ترک ایدوب جهانی علی
او گرگ مست گوروب یوخدی شیر لم یزلی
.
دئدی دیون داخی آسوده چوللری نسناس
نه نوعی سویوردولانسون که یوخدی خوف وهراس
.
محال دور گله دنیایه بیرده مثل علی
علینی ئولدورن اهریمنون شل اولسون الی
.
او کس که رعب علیدن چکینمزیدی نفس
بولوب که سسلسه ایمدی یتر جوابینه سس
.
آچوب خزانه نین او دشمن خدا قاپوسون
قزل سونلره پول وئردی تولادی هاموسون
.
بیرینه وعدۀ ملک و بیرینه وعدۀ مال
بیرینه وئردی زرو سیم بیرینه وعدۀ حال
.
آلوب اول پول لاری تولاندولار منافق لر
قویوب خلیفۀ برحقی گئتدی لر فاسق لر
.
علاوه یازدیلار هند اوغلونا او دین سیزلر
سنه کمک لیقا هر نوعیله واروق بیز لر
.
عراقه اگر گلسن ایلروق سنه تکریم
دوتوب امامی سنه فورا ایلروخ تسلیم
.
گوتوردی لشکرینی عازم عراق اولدی
خیال باطلیله نحس خاطری دولدی
.
یتوشدی بو خبر اول شهریار بطهایه
که معاویه گلوری لشکریله دعوایه
.
گلوبدی مسجده بیر خطبه ائیلدی ایراد
هامی جماعتی دین حقه ائدوب ارشاد
.
.
بویوردی ال چکون ای قوم بو کسالتدن
نتیجه یوخ سیزه هرگز بو خواب غفلتدن
.
بو دور معاویه قصد ایلیوب گلور جنگه
سیزون تهاونتوز سینمی سالور تنگه
.
.
جهاده حاضر اولون دشمن خدائیله
رضای حقی دوتون رغبت و رضائیله
.
نتیجه اولمادی عصرین امامینه حاصل
سکوت ائدوب هاموسی باخدی فرقۀ جاحل
.
بیری او دمده ایاقه دوروب احبّادن
بویرده یوخدی دئدی فارسان هیجادن
.
هانی رشید جوانلار هانی غیور اصحاب
پیمبراوغلونا وئرسون شهامتیله جواب
.
ندن عذاب خدادن سیز ائتموسوز وحشت
قتال زادۀ سفیانه ائتموسوز سرعت
.
اونون او سوزلری گتدی جماعته هیجان
جهاده حاضر اولوب ائستر ائستمز او زمان
.
پیمبر اوغلی او دم خلقی ائلیدی آگاه
نخیلیه یغیشون کیم او یردی لشگرگاه
.
اگرچه ایتمیه جاقسوز وفا- اوزوم بولورم
ولی کئدون اورا فورا اوزومده من گلورم
.
آتام او اَخیَر ناسین نه حقین ائدّوز ادا
منیمده اییله سوز عهد و بیعتیمده وفا
.
لباس رزم گیوب گیتدی حجت یکتا
گلوب نخیلیه وارد اولوبدی میر هدا
.
گوروبدی بعضی اوجمعین گلوبدی بعضی سی یوخ
اوگلمین لرایچون ائلیدی تأسف چوخ
.
ولی گلنده گلوب مختلف خیالیله
کیمی جهاد- کیمی فکر جاه و مالیله
.
منافقین و خَوارِجده اوزگه نیّت وار
دیانتیله گلن مختصر جماعت وار
.
قباقچا رزمگهه نچّه لشکر ائتدی روان
فنون جنگیه سرلشگره ویروب فرمان
.
نجه گئدوب نجه تا جنگه ایلسون اقدام
قالان سپاهیله آردیجا تا که گتسون امام
.
گیدوبدی لشکر شامه یتوشدی لشکر دین
او دمده مهرجهانتاب جمع ائدوب اتگین
.
گیجه اولاندا ائدوب حیله زادۀ سفیان
وئروبدی ائلچیه بیرقدرپول ائدوبدی روان
.
دئدی یتور اوزوی سرسپاه اسلامه
بوپوللاریله آپار وئرالونده بیر نامه
.
او نامه ده وئروب اول دین تباهه وعده وعید
ائدوب سپاهینه ملحق اونی او شوم و عنید
.
خیانت ائتدی او بی دین سپاه اسلامه
ساتوبدی دینی تولاندی والی شامه
.
صباح اولاندا گوروب لشکرامام حسن
که سرسپاه لرین تولیوب دنی دشمن
.
گورنده وضعی بو منوالیله سینوب لشکر
تمام ما وقعی وئردیلر امامه خبر
.
امام چوخ متأثر اولوب بو حالتدن
شکسته خاطر اولوب منحرف جماعتدن
.
ائیکمجی دفعه قوشون گوندروب امام مبین
مراد طایفه سیندن رئیس ائدوب تعیین
.
آلوب تعّهد ائدوب کاملا نصیت لر
ثبات امریده تأکید ائدوبدی اول سرور
.
اوزوده لشکریله کوچدی منزل دیره
که امتحان وئره تا اوردا یاریله غیره
.
خبریتوشدی او یرده که ای امام زمن
رئیس لشکریوی تولادی گینه دشمن
.
بولوب بو مطلبی اولدی ولیّ حَق دلگیر
بو ناگوار خبر وئردی حالینه تغییر
.
دوباره عاطفه سیز قومه ائدی موعظه لر
اگرچه اونلارا اصلا نصیحت ائتموب اثر
.
سبب ندوردئدی ای قوم- نقض عهدائدوسوز
ره سعادتی ترک ائیلیوب هارا گئدوسوز
.
یقین بولون بونی ای قوم زادۀ سفیان
اگرتاپا سیزه ال ظلموده ائدرطغیان
.
گلون شریعت و قرآنه اولمیون یاغی
دانار حقایق قرآنی یاغی وباغی
.
دوباره یوللادی دعوایه لشکر اون ایکی مین
رئیس لشکر عبیداللهی ائدوب شه دین
.
علاوه قیس وفا داری ایلدی همراه
اونیله مشورتین ایلسون عبید الله
.
خدا نکرده اونون گر باشندا اولسا قضا
جناب قیس اولا فورا یرینده پا برجا
.
امام لشکری تدبیریله یولا سالدی
قالان جماعتیله اوردا نچّه گون قالدی
.
گئدوب یتشدیله تا که سپاه اعدایه
عراق لشکری ائتدی نزول او صحرایه
.
باتوبدی گون شب تاره جهانی دوندردی
گجه معاویه چوخلی پول گوندردی
.
گوروبدی چوخلی پولی تولانوب عبیدالله
که پوللار ائتدی او بدبختی حقدن گمراه
.
اولوبدی لشکرکفره اوبی وفا ملحق
ساتوبدی دینینی دین سیزلره وئروب رونق
.
سبب اوکس لر اولوب سیندی تا که لشکر دین
دوشوب مشقّته بیر عمر اهل دین یقین
.
امام عصره جری اولدولار منافق لر
اورکده کینه لرین ظاهر ائتدی فاسق لر
.
او قوم پست مُقدّم دوتوبدی دنیانی
اولوبلا عاقّ امامه آتوبلا عقبانی
.
هوای نفس اورک گوزلرینی کورائتدی
امام محضرینی ترک ائدوب گئتدی
.
امام گوردی آزالدی داخی حقیقی کمک
یقین بو نوعیله جنگ خطادی ویرسا اتک
.
حقیقی شیعه لرین زحمتی هوایه گئدر
توکلله قانلارینی جانلاری فنایه گئدر
.
اگر بو شیعه لره تاپا ال بنی سفیان
اساس شیعه نی بالمرّه ائدیر ویران
.
علاوه معاویه صلح ائتماقا ائدور اصرار
بو صلح اولماسا الدن گیدر هامی اخیار
.
هامی کراهتیله صلح نامه قطع اولدی
سطور نامه شرایطله سربسر دولدی
.
امام باب تعدینی اوردا بست ائتدی
او صلح نامه ده هر امر و نهیی ثبت ائتدی
.
او صلح نامه ده شرط و شروط باغلاندی
بوباره دن ولی قلب امام داغلاندی
.
رضا دگولدی او قوم حکم حقیدن چیخالار
نقیض عهد ائلیوب دین اساسینی یخالار
.
ولی او قوم خطا کار حقیدن چیخدی
نقیض عهد ایلیوب دین اساسینی یخدی
.
امامه عاقّ اولوب حقی پایمال ایلدی
خیال باطلیله اوزگه قیل و قال ایلدی
.
بو سهلدورکه اولار شرعیده فساد ایلدی
امام عصره منافقلر انتقاد ایلدی
.
دئموبدولرکه بیزوخ حقی پایمال ایلدوخ
امور دینی سالوب مشکله محال ایلدوخ
.
دئموبدولرکه بیزوخ فکریده خطا گیدوخ
امام حقه کمک ائتمدوخ جفا ایتدوخ
.
گلوب ویرادیلار دائم امامه دل یاراسی
امامین حرمتینی هتک ائدوبدی بیر پاراسی
.
توکولدی خیمه سینه بی حیا منافق لر
امام خیمه سینی غرت ائتدی فاسق لر
.
نماز اوسته چکوبلر بساطین آلتیندان
مَجال ویرمدیلر قورتولا صلاتیندن
.
جهادی ترک ایلیوب نقض عهد ائدن اصحاب
اهانتیله امامه گلوب ائدردیله خطاب
.
که ای معاویه نی صاحب اختیارائلیین
قبول صلح ایلیوب مؤمنینی خوار ائلیین
.
دئدی منافقلرین برینه شه ابرار
بونامه نی سن اوزون گوندرموسن ای غدّار
.
منی معاوییه دستگیر ائدوب ویره سوز
ویا که فرصت ائدوب غفلتیله ئولدوره سوز
.
غرض امامه یتوب حدّ سیز اذیت لر
گتوردی قلبینی درده یتن مصیبت لر
.
مقام سلمیده هر ابتلایه صبر ائتدی
بحکم قاطع حق راه مستقیم گئتدی
.
اوتوردی مسند توحیدی اختیار ایلدی
علوم دینی بیان ائتماقی شعار ایلدی
.
خیال ائتمه چیخوب صحنه دن کنار اولدی
حریم دینه حراستله پاسدار اولدی
.
سکوت ائتمدی ابلاغ دینده بیرآنی
دئیردی خلق آرا هر دمده حکم قرآنی
.
گلوب حضورینه علم اهلی فیض یاب اولدی
علوم دینیله مستغنی شیخ وشاب اولدی
.
حقایقی هامی اشخاصه آشکارایلدی
حدود دینی بو نوعیله برقرار ایلدی
.
اگرچه خصمیله ظاهرده ائتمدی دعوا
بو نوع معاویه نی لیک ائلدی رسوا
.
واریدی نقدر سبط مصطفی نفسی
واریدی شیعه لرین بیرامیدودادرسی
.
ولی وجود امامیله زادۀ سفیان
گورودی سلطنتین بی اساس و بی بنیان
.
بولوردی تا نقدر وار امامیده قدرت
یزیدی ائیلیه بولمز خلیفۀ امت
.
اودورکه سعی ائلیوبدور او نطفۀ شیطان
امامی اولدوره تا عمرونه ویره پایان
.
نچه یولیله نچه دفعه گوندروب او لعین
امامه زهر وئروبلر گروه بی آئین
.
نتیجه آلمیوب آخرده چون او خصم خدا
بیر آیری فکره دوشوب سعی ایدوب نتیجه آلا
.
عیالی جُعدیه یول تاپدی منحرف ائتدی
آتاسینون یولونی کج او بیوفا گتدی
.
امامه زهر وئروب دین ایون خراب ایلدی
بوغمده عترتینون دیده سین پرآب ایلدی
.
خباثت دلین آخرده آشکار ایلدی
بهشت عدنیده زهرانی داغدار ایلدی
.
بنات فاطمه نی ظلمیله قویوب باشسیز
شهیدکرب و بلانی ائدوبدی قارداشسیز
.
اوزونی هرایکی دنیاده ایلدی رسوا
ساتوبدی آخرتین فکر خامیله بیجا
.
امام عصری ایاقدان او زهرکین سالدی
حیاتیدن ال اوزوب قیزلاری یتیم قالدی
.
شرارزهریله یکسر وجودی اودلاندی
او زهریله جگری قطعه قطعه دوغراندی
.
یواش یواش دئدی ای برج آفتاب ادب
اماندی قارداشیوی درک قیل باجی زینب
.
ائشیدّی قارداشینون تا سسین خانم زینب
تمام هولیله گلدی گوره ندور مطلب
.
گوروب که قارداشینون حالی چوخ غم افزادی
بدندن آیرولوری روحی بی توانادی
.
دئدی بویور گینه قارداش نه یوز وئروبدی سنه
سولوبدی صورتون اوخشور سولان گل چمنه
.
نولوب دوداقلارون آیا بو نوعی پارچالانوب
دوتوبدی آغزیوی قان دیشلرون قانا بویانوب
.
بویوردی ای باجی دشمن داخی یتوب کامه
وئروبله زهر یتوب مِحنتیم سرانجامه
.
گوروم بو قوم شرورین اولا یوزی قاره
بو زهریلن اولرم قالمیوب ره چاره
.
ائشیدّی بو خبرغم فزانی آل رسول
امامین آلدیلار اطافینی غمین و ملول
.
گوروبله حال امامی توکوبدلر قانیاش
دگوبله بیر بیرینه قیز-گلین- اوغول- قارداش
.
تلاش ایدوبله که بلکه اولا بو درده علاج
گوروبله روحی ولی آزقالور ایده معراج
.
بو حال حُزنده نا گه یتوب پیام فراق
یقین اولوندی گیدور مجتبی رسوله قوناق
.
حسین یوزونه حسن حسرتیله بیر باخدی
باشی دیزاوسته او حالیله گوزلری آخدی
.
خلاص اولوب داخی آزار قوم باطلدن
که ارتباطینی کسدی گروه جاهلدن
.
گئدوب عزیزلرین کردگاره تاپشوردی
خصوص عترتینی بُردباره تاپشوردی
.
تمام شوقیله فیض حضور یاری تاپوب
وصال حقه چاتوب ماسوانی آتوب
.
ویروب بلالری تحویل حسین قارداشینا
اطاعتین ایدوب الزام یار و یولداشینا
.
اگر قبول ایده( زرین )آقان بو آثاری
یازیلسا بسدی آدون مجتبی عزاداری
.
#حسنیه_شهادت
#وصی_ختم_رسول_حجت_خدادی_حسن
#اسماعیل_زرین
#ترکی
.
✍️ #زبدةالاشعار ✍️
.
?: @nohe_torki
نظر دهید