وفاسیز روزگارین عادتی دایم خیانتدور #پندیات_امانی_اردبیلی

پندیات
.
.
.
حاج علیرضا امانی اردبیلی
.
وفاسیز روزگارین عادتی دایم خیانتدور
ئورگ بو عالمه وئرمه اگر قصدون سعادتدور
.
توقف گاه دنیایه گلنلر قالمیوب گئتدی
گئدر سونرا گلنلرده گئدن لردن وصیتدور
.
ورق وور صفحه ی تاریخی دنیا گور کیمه قالدی؟
اسیر رنگهای روزگار اولماق حماقتدور
.
آماندی زرق و برق روزگاره ساده آلانما
بئش اون گون فانی عالمده اولار سنده امانتدور
.
ائشیتدیم بو سوزی بیر گون دئدی بیر پیر فرزانه
کتاب زندگینون فصل فصلی درس عبرتدور
.
ئولوم حقدور گلر بیر گون الونده فرصتون اولمار
دمی دمنن آییر وار بیر مثل کی ” دم غنیمتدور “
.
خلایق فانیدور دنیاده هئچ کیم جاودان قالماز
قالان اولسا فقط بیر یاخچی آد ، بیرده شرافتدور
.
اگر کی والدینون ساقدلار دنیاده حرمت قئل
آنا دریای رحمتدور آتا تاج سعادتدور
.
آنا نور الهی دور ایاقی آلتدادور جنت
مقام مادره بو سوز پیمبردن روایتدور
.
سنه بیر سوز دئیوم سعی ائت یادوننان چخمیا بو سوز
شرف غیرت عدالت بو ایکی جمله عبارتدور
.
محبت والدینونله ائله اعماق جانوندن
اگر نیت بهشت اولسا ، محبت یوخ تجارتدور
.
آنا تک قالسا بیر ائوده سراقین دوتماسا اوغلی
اوغول علامه ده اولسا بونی بیل بی شرافتدور…
.
.
#پندیات
#وفاسیز_روزگارین_عادتی_دایم_خیانتدور
#امانی_اردبیلی
#ترکی
.
.