وداع حضرت اباعبدالله الحسین علیه السلام
.
✍️ زبدة الاشعار ✍️
?: @nohe_torki
.
فغانی تبریزی
.
وقت او وقت اولدی خیمدن شاه عطشان آیریلا
آز قالوبدور جسم زینبدن او دم جان آیریلا
.
آلدی اطرافین خواتین حرم قیزلار تمام
دل پریشان دیده گریان چهره لر فیروزه فام
ایلیوب عطف نظر بیربیر خواتینه امام
دلده مین حسرت چون ایستردی او سلطان آیریلا
.
اوخشادوبلار خاتم انگشتره اول سروری
دوره ایتمیش نچه بلبل شاخه نیلوفری
گرچه اولماز آیرلوق بلقیس رولر باوری
گوردولر اما مصمم دور سلیمان آیریلا
.
اهل عصمت اهل عفت نچه بانوی عفیف
خوف نامحرمدن اما دلده وار ذکر خفیف
زیر لب ورد زبان یا مستعان و یا لطیف
بیزدن ایستور بارالها شاه خوبان آیریلا
.
دل پریشان بو محندن عالم ناسوت دور
هر بیری بو قیزلارین چون وجهه لاهوت دور
عالم و آدم وداع شاهدن مبهوت دور
آز قالوبدور عالم هستیدن ارکان آیریلا
.
اوپدی القصه الیندن بانوان دل کباب
مقدم شاهه دوشوب آئینه داران حجاب
بولمورم قالدی نه احواله اوساعتده رباب
آز قالوبدور جسملردن روح نسوان آیریلا
.
گوز گوزه تکموش خانم قیزلار اودم سلطانیله
هر باخشدا مین حدیث غم دیئر جانانیله
سالدلار آخر یولا اول سروری قرانیله
نصّ قران باشی اوسته دوتدی قران آیریلا
.
ذکر بسم اللهیله یول باشلیوب دور شهریار
خیمه گردون جلالیله اولوب بیر آز کنار
گوردی پشت سرده ناگه اسوه صبر و وقار
زینبین آهیندن ایستور دلده طوفان آیریلا
.
ای منیم آمال قلبیم عزتیم شاه جهان
کیتماقا ایتمه بیله تعجیل ایاق ساخلا دایان
گورموسن قلبیمده واردور آیرلیقدان نه فغان
قوی اورگدن نچّه لحظه درد هجران آیریلا
.
ای منیم عزت گولوم ترک بو گلزار ایلمه
زینبی درد فراقیله گرفتار ایلمه
بیر ایاق ساخلا حسینیم بیله رفتار ایلمه
ایستمز سندن باجون بیر لحظه بیر آن آیریلا
.
ایمدی کیم زینب دچار فرقتون ایستور اولا
اولما راضی قلبیمه اندوه عالملر دولا
نچّه لحظه قوی گورون قارداش دوباره دوش یولا
بلکه بو قلبیمدن اندوه فراوان آیریلا
.
بیرده ور رخصت بو غازوندان اوپوم ای شهریار
ایلیوم بو فعل یم اوسته تا قیامت افتخار
امر ایدوب بو بوسه یه زهرای اطهر اشکبار
اوندا که ایستوردی مندن دیده گریان آیریلا
.
صبریمون قورخوم بودور یخسون حصارین غصه لر
یتدی قارداش غصه سی بو قلبیمه ایلور اثر
قلبیم اوسته بو یدالله اللرون قویسان اگر
قویمارام طوفان غمدن بحر عمان آیریلا
.
قویدی زینب سینه سی اوسته یدالله اللرین
باجی قارداش توکدی گوزدن اشک همچون گوهرین
گرچه آیرلدی یولا سالدی خانم اوز دلبرین
کیم دوزر جاندان مگر بیر لحظه جانان آیریلا
.
گیتدی میدانه امام عزم ایتدی زینب خیمه نی
بیر نچه لحظه سورا نه ظلم ایدوب شمردنی
گلدی میدانه خانم گوردی داغلموش گلشنی
قارداشندان اولدی مجبور اول پریشان آیریلا
.
سوز دایاندی بیر یئره یافاطمه قلبیم یانار
قتلگاهین صحبتی قویماز اورگلرده قرار
سنده ختم ایله #فغانی نوحه نی یازما قوتار
قتلگهدن وار یری صد چشمه قان آیریلا
.
کربلاده اولموشوق بیر جمعیله مهمان اگر
ظاهرا مهمان ولیکن زائران خون جگر
#آذری اولموش بو جمعه نوحه خوان و نوحه گر
کربلادن گلمور اما دل که انسان آیریلا
.
#وداع
#وقت_او_وقت_اولدی_خیمدن_شاه_عطشان_آیریلا
#فغانی_تبریزی
#ترکی
.
✍️ #زبدةالاشعار ✍️
?: @nohe_torki
نظر دهید