راه شام
.
✍️ #زبدةالاشعار ✍️
.
🆔: @nohe_torki
.
مرحوم انور اردبیلی
.
چاتدی ایله که قافلیه یولدا قالان قز
غم چتری بلالی باشنا سایه سالان قز
یول زحمتی دیلن سالوب آرامین آلان قز
سرنیزه ده گوردی آتاسین فوری دیل آچدی
گویا سارالان غنچه گلستاندا گل آچدی
.
.
سن محض کرم من باباجان عشقده کامل
کامل اولان البته اولار خیر ایشه عامل
افتاده لره ائتدون عجب لطفوی شامل
سن شه ولی من غرقۀ دریای تأثر
سندن نه دیلیله ائدوم اظهار تشکر
.
.
ائتدون منی سن قافلۀ غمده سرافراز
اولدون اوجا نی ده بو گونی قاریه دمساز
مثلون آتالیق عالمی عالمده تاپولماز
وار باغ بهشتون نه صفاسی سنه گلسون
قانلی باشوون درد و بلاسی منه گلسون
.
.
عشقیدی بو صحراده منی یادوه سالدى
یا که منیم آهیم سنون آراموی آلدی
باشون بو کسوک باشلاریلان گئتمدی قالدی
ساندون باشیم اوسته باشوون سایه سین ای شاه
بو باشی یتیم قزلارا چوخ گورمسون الله
.
.
ایسلاتمشیدیم دامنیمی اشک تریمدن
قورتارموسان الحق منی سن جان خطریمدن
بلمم نه گلایه ائلیوم عمه لریمدن
خوار ائتدیله غم اولدوزون اولدوزلار ایچینده
سندیردیلا شخصیتیمی قزلار ایچینده
.
.
هر چند منی گوردی بیبیم زینب علیا
پیشواز ائدوب آغوشه آلا اولدى مهیا
هی سسلدی گل سینمه من گئتمدوم اما
گوگلوم سنوب اوندان سوزی گزلتماقا گلمز
بو تزلیگه قلبیم هله عمه مله دوزلمز
.
.
ای کاش قوشون آز بیزی یوللاردا یوباتسون
ویرانه ده اولسا الیمیز منزله چاتسون
بو یورقون اوشاقلار هره بیر گوشه ده یاتسون
عالی اطاقون فکرینی باشدان آتاروق بیز
زجر اولماسا هر نقطه ده راحت یاتاروق بیز
.
.
بیر قمچی وئروب زجر الینه چرخ جفاکار
پیچ و خم ائدور قالخوب اننده چو سیه مار
قول قوّه لی بازوسی قوی ای شه ابرار
قمچیله بالا قزلارون آرامین آلوبدور
سالم یتیشک مقصده اقباله قالوبدور
.
.
منکه سنی امداده چاغوردوم بابا غمله
گلدی بو دنی تاپدی منی فکر ستمله
قالخزدی گوگه قمچیسینی ایلدی حمله
صیادی گورنده ئوزومی قوش تک ایتوردوم
تعظیم ائلدوم یولداشینی رحمه گتوردوم
.
.
یا شیخ دیدوم قویما منی ورسون آماندی
ئولم بو بیابانیده قلبیم نگراندی
بیر حالدا گوروب دشمنیم احوالیمه یاندی
زجرون نقدر کینه و اجحافی واریمیش
یولداشی گنه اهلیمیش انصافی واریمیش
.
.
اول خرداجا قز درد دلین ایلدی اظهار
باجائیدی ائتسیدی حسین نیزه ده گفتار
سیل گوزیاشوی چکمه قزیم آه شرربار
من نیزه نون اوستونده دایاندوم سنه خاطر
گیت عمه وون آغوشینه سنده منه خاطر
.
.
ای طوطی شیرین سخن بزم سلیمان
سس وئردی سلیمان سسیوه اولما پریشان
شامه کیمی اولام سنه هر یرده نگهبان
چرپنما قناد چالما ائله قلبوی آرام
یاددان گنه چخسون گنه من نیزه ده دورام
.
.
ای گوهر شایستۀ گنجینۀ عفت
بیلدوم سنه چوخ زجر لعین وئری اذیت
قاچدون تیکان اوسته ائلدون واقعا همت
نامحرم آتین مینمدون احسن سنه احسن
سن تک قزا البته گرک فخر ائلیم من
.
.
انتدون نه گوزل پیروی اصل و نسبوندن
خشنود ائلدون معرفتوندن ادبوندن
ممکن دگل افسوس اوپم غنچه لبوندن
مابینیمیزه نیزه نی قوی تفرقه سالسون
بو حسرتیمیز منزل ویرانیه قالسون
.
.
ایام اسارت قوتارار ایلمه افغان
نه زجر اولی نه قمچی و نه خار مغیلان
نه سیلی ورالار نه ایاقوندن آخار قان
تاب ایله مصیباته ئوزوندن بیله چخما
مظلوم بالا یورقون بالا صبر ایله دارخما
.
.
دردی بی بوون چوخدی سالوب غصه فشاره
یوخ وقتی یتیشسون هاموزا اول گونی قاره
منزل ائلسه قافله چوللرده دوباره
قوی باشوی سن خواب ائله طفلان آراسندا
یات ایستیده گیزلنمه مغیلان آراسندا
.
.
#راه_شام_انور_اردبیلی
#چاتدی_ایله_که_قافلیه_یولدا_قالان_قز
#یادگار_انور #ترکی
.
✍️ #زبدةالاشعار ✍️
.
🆔: @nohe_torki
نظر دهید