زبدةالاشعار

چون گُل ، نقابِ عصمتی یوزدن کنار ایدر #اکبریه_حقیر_خویی

شهادت حضرت علی اکبر (ع)
.
✍️ #زبدةالاشعار ✍️
.
🆔: @nohe_torki
.
مرحوم حقیر خویی
.
چون گُل ، نقابِ عصمتی یوزدن کنار ایدر
بلبل گورنده نالۀ بی اختیار ایدر
.
فریاد ایدر جمالینی اغیار گورمسون
معشوق ننگی ، عاشقی بی اختیار ایدر
.
صبحه کیمی دونر دولانار باشینه گُلین
طوفِ فضای گُلشنی پروانه وار ایدر
.
ایستر شکفته اولماقینی غنچه نین گوره
یاتماز ، گجه صباحه کیمی آه و زار ایدر
.
صبحین نسیمی هم گُله هم بلبله دگر
بلبل گوزینده پردۀ خوابی خمار ایدر
.
بیدار اولاندا غنچه نی بی پرده تا گورر
لاله مثال سینه سینی داغدار ایدر
.
گُل سینه سینده خاری گورن دمده عندلیب
لابد گُلین مصاحبتندن فرار ایدر
.
ایستر گیده کناره گیدنمز کناردن
حیران باخوب یوزینه ، گوزین اشکبار ایدر
.
ناچار خوار ایدوب اوزینی خاره یالوارور
معشوق ، عاشقین بئله دور خاره خوار ایدر
.
تعلیمِ عشقی بلبلِ شوریده دن گوتور
عاشق بو مشقی عشقیده لیل و نهار ایدر
.
اغیاردن نقدر جفا گورسه لا کلام
لا سویلمز خیالینی مشغولِ یار ایدر
.
هر کیمسه سِرّ عشقدن آگاهیدور بولر
پروانه نین نه سوزشی وار ، میلِ نار ایدر
.
درد آنلاسان اوزونده ، طبیبه رجوع وار
عاشقده میل گورسه ، توجّه نگار ایدر
.
آئینه تار اولاندا گورونمز جمالِ یار
صاف اولسا ، یار صورتینی آشکار ایدر
.
هر باشدا وار محبّت او باشین بلاسی وار
باشی بلی بلایه محبّت دچار ایدر
.
اوّل قبولِ ذلّت ایدر ، عزّت آختاران
عزّتله یا عزیز دیوب اشکبار ایدر
.
خالص دگل خلوص ، نچون قلب قلبدور
پاک اولسا قلب ، صاحبینی رستگار ایدر
.
معیارِ امتحانیده خالص خلاصدن
نقدِ خلوصین عاشق کامل عیار ایدر
.
کیمدور او قلب صاحبی وا مُهجَتا دیوب؟
اوز اوغلونی ئولوم آتی اوسته سوار ایدر
.
سالدی یولا دالنجا دئدی شاهد اول خدا
بیر قومه کیم پیمبریله کارزار ایدر
.
گچدیم سنون یولوندا بیله مَه جبیندن
عهد ازلده عهد ویرن ، پایدار ایدر
.
دوتدی یوزین او قومه گَلون اکبریم گلور
باشدان گچوب ، حسینه ایثارِ ثار ایدر
.
گیردی کمندِ عشقه غزالِ حرم ، ولی
صیّادی گور غزالِ حجازی شکار ایدر
.
گر ایستیه کمنده خطا اهلینی سالا
چین چین ، کمند سلسله سین تابدار ایدر
.
عزم ایتسه تار و مار اولا عالَم ، الینده دور
گیسوی مشکباری یوزه تار و مار ایدر
.
قدّی سِنان ، کمان : قاشی ، مژگانلاری خدنگ
بیر گوزلرین دولاندورا یوز مین شکار ایدر
.
اما اوزی شهادته شایقدی قلبدن
شوقِ لقای حضرتِ پروردگار ایدر
.
هر قدر جسمینه یارا وورساز قبولیدور
هر چند سوزشی دلِ لیلایه کار ایدر
.
باک ایتمیون ، علی کیمین باشین قلجلیون
تاجِ شرف باشیندا اولان افتخار ایدر
.
گر جوی خون ایچینده دوشه سَرو قامتی
سَروِ سَهی بلی هوسِ جویبار ایدر
.
طالبدی بسکه تیره تراب اوسته یاتماقا
درویشِ حق طلبده اوزین خاکسار ایدر
.
باشین دییون سَنان بیر اوجا نیزیه وورا
گون بیر جِدا بویی اوجالا اشتهار ایدر
.
هر جور و ظلم ایستیه سوز بیشمار ایدون
حق ، حق انتقامینی یومِ شمار ایدر
.
ای ذوالفقار صاحبی ، مولا ، ظهورِ حق
تا کِی عیونِ منتظری انتظار ایدر؟
.
یرده نه وقته تک قالاجاق قانی اکبرین؟
بو انتظاره صبر ، نجه روزگار ایدر؟
.
بیر ذرّه جه شعوری (حقیرین) اگر اولا
ترک ایلمز بو شغلی همیشه شعار ایدر
.
.
#اکبریه_شهادت
#چون_گل_نقاب_عصمتی_یوزدن_کنار_ایدر
#ترکی
.
✍️ #زبدةالاشعار ✍️
.
🆔: @nohe_torki

متن پیشنهادی:  گیتمه ای نفس هوا تیره و شیطانی یولا #پندیات_سیفی_اردبیلی

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی