حالات حضرت ابوالفضل علیه السلام( استیذان، وداع، شجاعت،کارزار، استمداد ، زبانحال با برادر و نوحه بالین )
#فارسی_ترکی
.
✍️ #زبدةالاشعار ✍️
.
🆔: @nohe_torki
.
#فارسی
.
چو فرزند علی آن معدن کان وفا عباس
درآن دشت بلا سقای آل مصطفا عباس
.
بناله پیش آن سلطان غم حشمت به خاک افتاد
زخاک پای شه بوسید پس زان شد به پا عباس
.
بسان صفدر و حیدر به پیش روی پیغمبر
به اوج فرق آن سرور بزد آندم لوا عباس
.
بگفتا ای برادرجان بقربانت سرو جانم
بحسرت تا به کی ازغم کند آه و نوا عباس
.
ز سوز نالۀ طفلان به تنگ آمد دلم
مرا وین می کُشد از تشنگی گویند یا عباس
.
علی اکبر بخون غلطان علی اصغر کند افغان
سکینه با لب عطشان چسان باشد رضا عباس
.
مرا این زندگی باشد حرام آخر حلالم کن
بفرما رخصت میدان شود ازغم رها عباس
.
رسیده ناله وآهت به عیّوق ای خور رخشان
که کاش از اوج این هستی بیفتد مه لقا عباس
.
همه یاران من رفته ربوده کوی سبقت را
زعون و فضل از جعفرچنین مانده جدا عباس
.
به سر شوق شهادت حسرت قربانیت دارم
که خوش باشد بدین قامت بقربانی سزا عباس
.
#ترکی
.
سوسوز گوروب شهدا قیزلارین گتورموب تاب
بودور خیالی گیدوب خیمییه گتورسون آب
.
دوروب ایاقه علم قدّی تک گوتوردی عَلَم
گلوب حضور شه دینه با هزار اَلَم
.
قیلوبدی عرض او سلطان مُلکِ ایمانه
مرخصّم گیدوم آیا بو قانلی میدانه؟
.
واریمدی شوق لقای وصال جانانی
اجازه ویر سرکویوندا بذل ایدوم جانی
.
بوگون که ظاهر اولوب وعدۀ وَلیّ خدا
یتوب مقامی همان وقتدور بو گون گویا
.
جدال غَزوۀ صفیّن ده او گون قارداش
چوخ ایلمیشدیم آتام خدمتنده سعی و تلاش
.
جدالیدن قیدوب یوز گوزوم غبار آلود
حضور پاکینه تاپدوم اودمده فیض ورود
.
گورن زماندا منی ایستیوب برابرینه
سپهروارآلوب سینۀ پُراخترینه
.
الیله پاک قیلوبدی غبار صورتیمی
ایدوبدی لطف منه مژدۀ شهادتیمی
.
بوگوندن اوتری وصیّت ایدوب اوچولده منه
یتوم شهادته قربان ایدوم بو جانی سنه
.
چکوبدی سوزیله بیر آه شاه تشنه لبان
بویوردی حضرت عبّاسه کای برادر جان
.
کیمیم واریمدی بوجسم نزاره جان یتوره
کیمیم واریمدی که سندن صورا عَلَم گوتوره
.
اولوب بوسوز دل گرگان کوفه ده مَسطور
آچوبلا قصدیمه چنگال کین منم منظور
.
سیزیله یوخدی رجوعی گروه اشرارون
تمام قصدی منم فرقۀ ستم کارون
.
سن ایمدی قال بو غریب اهلبیته غمخوار اول
منیم یریمه عیال رسوله سردار اول
.
ایشتدی بو سوزی عرض ایتدی ای شه والا
فدا اولا سنه عبّاس جانی یا مولا
.
آتام وصیّتی دور سرخ روئی کونین
او کس ایچوندی ویروب جان اولا فدای حسین
.
همیشه مژده ویروبدی منه شهاتدن
ایدردی قلبیمی دلشاد بو بشارتدن
.
که ای اوغول آدون عالمده نامدار اولاجاق
حسینه گوهر جانون او گون نثار اولاجاق
.
خلاصه چوخ قیلوب الحاح اذن ایدوب حاصل
اولوب بو نوعیله فرمان حالینه شامل
.
که ای سریر شجاعتده حیدر ثانی
دوتان صلابتی حیدر مثال دنیانی
.
دوشوب خیالیوه هر گاه آخرت سفری
یولومدا بذل ایده سن تا که گوهر جانی
.
یتور بو لشکره اتمام حجّت ایله تمام
که قالماسین قشون اهلینده عذر عنوانی
.
دلیل حُجّت قاطع مقام حُجّتده
نصیحت ایله بیان ایت دلیل برهانی
.
دئ ای گروه ستمگر دییر ولیّ خدا
بولورسوز ایمدیکه مُجرم بو شاه عطشانی
.
ولی گناهی ندور اهلبیت اطهارون
سوسوزلوقون اودی یاندیردی آل طاهانی
.
بولارعیال پیمبر،عزیز زهرا دور
مُخدّرات خدارت دیلر حیا کانی
.
بو تشنه لبلره رحم ایلیون قیلون سیراب
سالون خیالوزه دنیاده حال عقبانی
.
یتیشدی حضرت عبّاسه چونکه اذن جدال
او دمده طایر توحید تک آچوب پرو بال
.
ایدوبدی قدّینه آراسته لباس جَدَل
بئلینده مصری قلج شعله ور چو برق اَجَل
.
سپهر کتفینه سالدی سِپَر چو قرص قمر
گوتوردی نیزۀ آتش فشانی چون اژدر
.
کمان تیر زرافشان خودیلن مغفر
قیلوب وجودین احاطه او سرورین یکسر
.
او کرّو فرّیله گتدی سمند جولانه
صلابتیله یتوردی اُوزینی میدانه
.
گورن دیردی کی کیمدی گلورعقاب اوسته
اسد طلوع ایلیوب برج آفتاب اوسته
.
او دمده سسلیوب ای لشکر جفا گستر
بودورحسین علی سبط پاک پیغمبر
.
بو نوعیله بویورور اول ولیّ سبحانی
الیمدن آلموسوز ای قوم یار و اَعوانی
.
گیدوب صحابه لریم قویموسوز منی تنها
سالوبسوز اود کیمی جانیمده نار هجرانی
.
ولی بو آل پیمبر که جمله تشنه دیلر
ایچلّه سو یرینه سربسر جگر قانی
.
یوخوزدی گر بولارین جدّ پاکینه اقرار
که حکمران جزا دور عزیز ربّانی
.
گرایمدی بولمیه سوز که بولاردی میرهدا
نه نوع بس ایدیسوز دعویِ مسلمانی
.
بوهانسی مذهب ملّتدی شرط اسلامی
دوتوبدی هانسی مسلمان بودین وایمانی
.
وحوش و طیر ایچه سو دیو و دَد اولا سیراب
عطش کباب ایده امّا عیال طاهانی
.
علی عیالینه رحم ایلیوب قیلون سیراب
ویرون سو سوندورون آخر بو نار سوزانی
.
قویون منی دوتوم اهل وعیالیمون الینی
گیدوم دیار فرنگه ترک ایدوم بو صحرانی
.
عیالیمی گوتوروب عزم زنگبار ایدرم
تمام سیزلره ویرّم حجاز و بطحانی
.
سیزیله عهد ایدرم روز حشریده سیزدن
مخاصمه ایلموم بو قدر آخان قانی
.
نه ایتموسوز ایدرم من حواله بیر حَقّه
سیزیله باغلارام ایمدی بو عهد و پیمانی
.
.
بو سوز لری بویوروب تا که حضرت عبّاس
دوشوبدی حیرت تشویشه لشکر نسناس
.
.
بیری اشاقه سالوب باشنی خجالتدن
بیری ییوبدی تأسّف غمین ندامتدن
.
بیری برینه دگوب فرقۀ جفا بنیان
بیرسی شاد و بیرسی خرّم بیرسی گریان
.
برابره یرییوب اول زماندا شمر لعین
خطاب قیلدی که ای شهسوارعرصه دین
.
تمام یر یوزونی سو دوتا اولا دریا
یقین سیزلره بیرجرعه ویرمروخ اصلا
.
مگربوگون ایده سوز بیعت یزیدی قبول
اولور خلاص بو مِحنتدن آل رسول
.
گوروب بوسوزلر اثر ایتمیوبدی کفّاره
ایدوبدی لعنت و نفرین او قوم اشراره
.
خلاصه اول شه والاتبار شیر نژاد
قیتدی خیمه لره دیلده ناله و فریاد
.
یتیشدی محضر پاک عزیز زهرایه
قیلوبدی صورت احوالی عرض او مولایه
.
بو سوزلری ایشیدوب تا اورک گلوب درده
توکوبدی سیل کیمی اشک عارض زرده
.
بویوردی حضرت عبّاسه ای وفا پرور
بیان قیل نه دیدی شمر دون بد اختر
.
دیوبدی هرنه سنه دوغرودی اولور ظاهر
شهید ایدلّه بو چولده بوگون منی آخر
.
ایدلّه اهل و عیالیمی ظلم الیله اسیر
چکلّه مجلس ابن زیاده قوم شریر
.
سنون شهادتوه راضی اولمارام قارداش
که سن شهید اولاسان من توکم یوزه قانیاش
.
اگرامان اولا گیت اهل بیته غمخوار اول
جناب زینب و کلثومه تا هوادار اول
.
ایشتدی بوسوزی اود سالدی آهی آفاقه
اوپوب ایاقینی عجزیله دوشدی توپراقه
.
زبان حالیه بو نوعی عرض ایدوب گویا
که ای ولیّ خداوند خالق یکتا
.
مگر بو وقتیده سردار اوز علمدارین
کنار ایلر اوزوندن ویا هوادارین
.
منی بو فیض شهادتدن ایلمه محروم
اولوم بو جانیوه قربان که قالموشام مظلوم
.
علاوه غزوۀ صفّینیده آتام حیدر
منه ایدوبور وصیّت بو نوعی اول سرور
.
که سن حسینیله ایلر سن عزم کرب وبلا
گرک اونا ایده سن بوعزیز جانی فدا
.
او حینیده اوجالوب اهلبیتون افغانی
که العطش سسی چولقاشدورب بیابانی
.
اویاندا نعرۀ هَل مِن مبازر اعدادن
یتوب قولاقینه آلدی قرار او مولادن
.
سارالدی گول کیمی رنگی غم و ملالیندن
دوتوبدی قارداشینون دامن جلالیندن
.
.
که ای سریر ولایتده سروریم قارداش
پناه و ملجأ و امید داوریم قارداش
.
بو تشنه لبلرون افغانی طاقتیمی آلوب
دولوبدی دردیله قلب مضطریم قارداش
.
سوسوزلارون ایشیدن وقته العطش سسینی
توکر فرات کیمی اشک گوزلریم قارداش
.
سکینه نون سسی گلدوقجه گور گیدر صبریم
یانان اورک کیمی تیترر بو پیکریم قارداش
.
گلوبدی تنگه بو سینم ملال و محنتدن
گیچوبدی حددن آخر بوغملریم قارداش
.
مرخص ایله منی بیر گیدوم بو میدانه
سالوم شراره صلابتله جان عدوانه
.
مرخص ایتسن اگر عالمی خراب ایدرم
یزید بی ادبون باغرینی کباب ایدرم
.
چکوب قلج ایدرم شام و کوفه نی ویران
بودشتیده قویمارام بیر نفرعدوان
.
تمام لشکری دار فنایه گوندرّم
فراتی سیل کیمی خیمه گاهه دوندرّم
.
غرض ویرولدی اونا اذن و رخصت میدان
قویوب خیالینه آب فراته اولدی روان
.
خبراولوب اوزمان اهلبیت اطهاره
که عزم رزم ایدراذن اولوب علمداره
.
توکولدی خیمه دن آل عبا کناره تمام
کسیلدی زیب و کولثومیدن داخی آرام
.
زبان حالیله گویا دیردیلر قارداش
اماندی گیتمه بو دنیانی ایلروق قان یاش
.
.
گوروب که زینب غمدیده غمگساری گیدر
بو گیتمه گونله دیدی قلبمون قراری گیدر
.
قالوبدی بیرجه بو بی کسلرین گمانی سنه
بیزی فلک زدنون سنسیز اختیاری گیدر
.
اماندی صبرایله قربان اولوم اوزون قولوا
که سن گیدنده باجون عرشه آه و زاری گیدر
.
بوچولده سیز ایکی قارداشه تیکموشم گوزیمی
نجه من قویوم گوزوموم نوری مه عذاری گیده
.
علی الخصوص حسین قارداشیم قالور تنها
چتیندی ایندی اونون یار جان نثاری گیدر
.
اُولوبدی تازه جوان اوغلی غصّه سی چوخدی
غم اوسته غم یتیشه الدن اقتداری گیدر
.
سنون کسلّه باشون ال تاپار بیزه دشمن
اسیر اولوب باجون کوفیه قطاری گیدر
.
اودم سکینه اولوب با خبر که میدانه
عزیز شیر خدا عمّ نامداری گیدر
.
گلوب دوشندی ایاقینه عرض ایدوب عموجان
عطشدن ایمدی حزین گوگلومون قراری گیدر
.
سالوب شرارعطش جانیمه شراره منیم
دوتوبدی اود جگریم گویلره شراری گیدر
.
دلیم یانوب سو دیمکدن دونوب سویا بدنیم
دیینده سو گوزومون اشک آبداری گیدر
.
زبس فراته باخوب گوزیاشین روان ایدرم
گوزومه سو کیمی گور آق گلوبدی تاری گیدر
.
گوزوم قالوب بو گون اللرده هرکیمی گورورم
بیله خیال ایدرم بو فراته ساری گیدر
.
سودان اوتورعمو آغلاتموشام بو خلقی تمام
اودور که سو یرینه قان اولوبدی جاری گیدر
.
من اُلمَسَم بو سوسوزلیق منی هلاک ایلر
اماندی چاره ایله جان قویوب بو زاری گیدر
.
سنه دخیلدی (غمناک) اوز غلاموز دور
بیر التفات ایده سن درد بی شماری گیدر
.
.
.
ویروب تسلّی او دمده سکینۀ زاره
آز آغلا ویرمه داخی غصّه بو دل زاره
.
بوگون سودان اوتورآفاقه ولوله سالّام
اگرسو خیمۀ افلاکیده اولا آلّام
.
غم ایتمه گرچه سویون قیمتی بوگون جاندور
تاپولسا سنه مین جانیم اولسا قرباندور
.
خلاصه ساکت ایدوب اهلبیت والانی
قیلوب ارادۀ میدان او حیدر ثانی
.
بیرآزگیدوبدی باخوب آغلاماخ صداسی گلور
دونوب باخاندا گوروب شاه کربلاسی گلور
.
قییتدی عرض ایدوب ای پادشاه عرش اساس
سنون بو حالیوه یوخدور لیاقت عباس
.
نجه روادی منی بس تعاقب ایلییه سن
نولورکه لطف ایلیوب خیمییه طرف گیده سن
.
بویوردی شاه جگر تشنه ای علمداریم
گیدنده سن چخار افلاکه نالۀ زاریم
.
بو گلمه گیمده واریمدی مُرادیم ای عبّاس
سن اُولمَه میش گوره بس خیمه ده دوتولموش یاس
.
اوزاد که خضره عیاندی نهاندی موسایه
چون آیرلیق گونی دور گلمیشم تمنّایه
.
سنیله بیرجه بو گون قول بویون اولوم قارداش
وداع آخرایدوب دیده دن توکوم قانیاش
.
بو گیتمگون داخی یوخ بیرده گلمگی بولّم
سنون قولون کسولر منده تشنه لب اُولّم
.
بیری بیرینه باخوب غصّه دن اورک دولدی
او دمده ایکی قارداش قول بویون اولدی
.
باسوبدی جان کیمی آغوشه نازلی قارداشین
باخوب یوزونه ایدوبدی نثار گوزیاشین
.
زبانحالیله گویا بولوب مناسب حال
ویروبدی طرز کلامه بو نوعی حُسن مقال
.
بوگون زمانه دن افسوس باغریقان گیدیرم
اورکده داغ کیمی مِحنَت جهان گیدیرم
.
سنوبدی قوش کیمی هر سمتیدن پروبالیم
اودور که ترک ایلیوب ایمدی آشیان گیدیرم
.
اگر اوزوم گیدیرم گلموری اورک دایانور
سنون یانوندا قالوب فکر ناتوان گیدیرم
.
اوجان یوخومدی قویوب بیرعزیزجانی گیدم
غریب جانیوه قربان گیدوربوجان گیدیرم
.
محالدورکه چکم سندن ال اوزون بولوسن
سنه نثارایلیوم تا که باش وجان گیدیرم
.
گلوب طلاطمه جسمیم داشوبدی بحرملال
گوروب گوزون یاشنی سوکیمی روام گیدیرم
.
دوشوب قباقه که چوخ دوشمیوم ایاقه بوگون
اوزومی تز یتوروم کچدی کاروان گیدیرم
.
اوز اُولماقیمی خیال ایتمرم بودور فکریم
که ال تاپارسنه آخرده کوفیان گیدیرم
.
بوغملی قلبیمه قارداش گراندی درد وغمون
ایدوبدی قامتیمی تیرغم کمان گیدیرم
.
هزارحیف که قلبیمده حسرتیم قالدی
بو نوعی دُورایلدی دُورآسمان گیدیرم
.
اگر اُولم گینه گیتمز بو درد دل مندن
که قالمیوب سنه بیر یار مهربان گیدیرم
.
باخوب گیدنلره یا لَیتَنا نَفوز دیوب
سرای ماتمه ( غمناک ) نوحه خوان گیدیرم
.
وداع ایدوب ایکی قارداش بیری بیرین او زمان
باش اندیروب یولا دوشدی جداله اولدی رون
.
او دم عقابه گوستردی تند بیر مهمیز
قیام ایدوب او بیاباندا شور رستاخیر
.
کار زار حضرت عباس
.
آچوب پرعقاب اوسته مثل عقاب
چکوب تند مهمیز ویردی رکاب
.
گلوب سیره سیّار ثابت کیمی
ایدوب ثابت افلاکیده پیچ وتاب
.
آچوب حلقه حلقه کمند جدال
نجوم و کواکب ایچون ویردی تاب
.
باشی اوسته زرتارعلم مشتری
قرین قمردن اولوب کامیاب
.
سهیل جلالی اولوب چون عیان
قیلوب کرم شب تابی نابود خواب
.
آلوب تاب ناهید تک رنگیدن
سارالدی اولوب زرد رنگ تراب
.
کمان زر افشانی مانند قوس
اولوب رُمحی الینده چوتی شهاب
.
کتبیه کتیبه قیروب لشکری
سالوب دختر نعش تک انقلاب
.
ایدوب قولّاری مثل کَفّ الخضیب
باشندان آخان قانی ئیلن خضاب
.
دیردی گورن کیمدی بو گوئیا
اسد بُرجی اوسته چخوب آفتاب
.
زحل طبع لر قلبینه یول تاپوب
قباقیه چخوب دولدورب دلو آب
.
قمربرج عقرب ده دوتدی مقام
گوروب طالعین نحس اهل عذاب
.
گلن رزمه اولدی جوزا صفت
مقامین ایدوب اوندا بئس المآب
.
بلا تک آلوب لشکرن اوستونی
فرار ایتمگه خلق ایدوب اضطراب
.
دوشوب قدّلرمثل خرچنگ وچنگ
اولوب حوت تک نار قهره کباب
.
سالوب خرمن خصمه قهرآتشین
یانان سنبله تک چکوب التهاب
.
ویروب هرکیمه تیغ ایتدی دونیم
قوروب عدل میزاننی اول جناب
.
داخلدی قشون گتدی فوج نظام
علم لریاتوب اولدی گردون خراب
.
سنوب میمنه گتدی هم میسره
پوزوب قلبی ایتدی جناحه شتاب
.
قالوب خلق حیرتده تاپسون نجات
هلاکت مقامینی گوردی ثواب
.
هژبر بیشۀ هیجا سلالۀ اسدی
صفاتی مظهر پاک ظاهر صمدی
.
نهنگ قُلزم ذخّار قدرت قهّار
گلوب طلاطمه دریا کیمی آچوبدی کنار
.
داشوب فرات کیمی یوز قویوب عدو اوسته
قاتوب قباقه قُواردی عدوانی سو اوسته
.
دوتوبدی معرکۀ کارزاری بس طوفان
یخوب گویلراوین سیل تک ایدوب ویران
.
ایدوبدی قاچماقا هرکیمسه قلبیده تدبیر
گوروردی گوزده مجسّمدی اود توکن شمشیر
.
بولود کیمی قره توز چولقادی بیابانی
او تُوزدا برق کیمی سیر ایدردی هریانی
.
قلج الینده قرانلیق هوایه اود سالدی
ویراندا خلقی دیردیلر ایلدیرم چالدی
.
ویراندا هرکسه شمشیرتیزآتشبار
دوتاردی خرمن جانین اودمده سوز شرار
.
ایدردی صفلره حمله او شیر داور تک
قلج ویروب آلوشوردی شرار آذر تک
.
اگرچه قهریله ایلردی دشمنی تسخیر
سکینه ناله سی امّا اولوردی دامنگیر
.
قلج ویراردی ولی غم دل نهانینده
گوزی فراتیده قلبی سکینه یانینده
.
اگرچه قانیله دریا کیمی بو چول دولدی
سکینه ایمدی سوسوز دان یقین هلاک اولدی
.
تیکوبدی گوز یولا اطفال تشنه لب یکسر
توکوب فرات کیمی اشک سو یولون گوزلر
.
سو گلمسه اله گلمز اله بو گون مطلب
خجالت ایتمه منی اهلبیتیدن یارب
.
دوباره باغلادی همّت بیلین گلوب هوسه
اوزین فراته یتوردی او دمده بیر نفسه
.
باخوب سویون یوزونه گورمیوب اوزونده سکوت
سوروب عقابنی داخل اولوب فراته چو حوت
.
یانان بالیق تک عطشدن اوزون سویا سالدی
سوسوزلیقین ایتیروب اوزگه حالته قالدی
.
دیدی گوروم دونه سن قانه ای فرات سنی
اوزون کیمی سویا دوندردون ایمدی گورنه منی
.
روادی سن آخاسان سیل تک بیابانه
که سندن اوتری اورکلر دونه قزل قانه
.
روادی سندن ایچوب اوزگه کامیاب اولسون
حسین عیالی سوسوزدان یانوب کباب اولسون
.
بو چولده اولدون عجب آشنایه بیگانه
گوزوم یاشی کیمی دونسون گوروم سویون قانه
.
اورکده درده گلوب دردی حدّیدن آشدی
دولوب زبس گوزونه اشک کاسه تک داشدی
.
سوئیله کاسه تک اُوجون او دمده دولدوردی
یتورممیش لبینه باخدی نفسین اولدوردی
.
دیدی اگرچه سوسوز آب صافه طالب اولور
ولیک کامل اولان عقل نفسینه غالب اولور
.
نقدرنفس فنا ایتسن امراصغر دور
بو پاک نفسوی اولدور جهاد اکبر دور
.
گرایمدی ایتمیه سن نفس پاکیله ایثار
سنه نه نوعی ایدلّر خطاب یا انصار
.
حسین جمالی که مرآت حق نمادی سنه
اوز آدیوی سال اونا صورت دعا دی سنه
.
چیخاتما یاددان اونون حقی چوخدی بوینوندا
قویوب دعا کیمی بوالّریوی قوینوندا
.
گرک بو گونده سوسوز قارداشوون غمین چکه سن
سو دگمیه دلیوه سو یرینه قان ایچه سن
.
نجه ایدرسن اوزون بو فراتدن سیراب
عطشدن آل پیغمبر تمام اولوبدی کباب
.
نجه سوئی ایچه سن قان اولوب گوزوندن آخار
سکینه ایندی دوروب خیمه دن الیوه باخار
.
بو ال اونوندی آپارسون گرک سوئی اوزونه
الیمده گورسه سو مشکین اوپوب قویار گوزونه
.
اگرسو اولسا اولوبدور سو اولماسا بولّم
او قدر خیمه لره گیتمرم بو گون اُلّم
.
حسین یولوندا ویروب باش جاندان ال چکرم
سرین سودان کیچرم ایسّی قانیمی ایچرم
.
فراتیدن او زمام دولدوروبدی سو مشکین
چخوب کناره سودان جاری ایلیوب اشکین
.
سودان چخوب قزیشوب سو کیمی حرارتدن
اورکده قهروغضب جوش ایدوب صلابتدن
.
فراتیدن چخوب اول تشنه لب چو اسکندر
اوزونی لشکر شامه ویروب بدیدۀ تر
.
گوروب اوحالی ابن سعد بد فرجام
او دمده سسلنوب ای اشقیای کوفه وشام
.
بوسروری که گورورسوزغضبده چون هرماس
نشان اسد الله دور آدی عباس
.
بودورامیرعرب شاه لافتی اوغلی
بودور ولیّ خداوند کبریا اوغلی
.
بودورصلابت وصولت ده حیدرثانی
الینده دورایده آفاقی سربه سر فانی
.
دلیرمعرکۀ کارزار دوران دور
آتاسی تک بودا دعواده تیغ برّان دور
.
بو نوعلن که آچوب بال و پربسان عقاب
گرآچسا پنجۀ قهرین ایدر جهانی خراب
.
اگر سوئی آپاروب ایچه آل پیغمبر
ویرالّا خرمن عمرِعدویه اود یکسر
.
نظرده چون سوئی منظور ایدوبدی اوّلدن
گرکدی قویمییه سیز احتیاطوزی الدن
.
توکون بولود کیمی یکسر خدنگ خون افشان
آلون آرایه ایدون تیرجان فشانه نشان
.
.
چون ویردی فرمان سعد بد اختر
یکسر یریندن اوینادی لشکر
.
آتلی پیاده دورت بیر طرفدن
آلدی آرایه اول شاهی یکسر
.
اوخلار قویولدی بیربیر کمانه
پرآچدی گلدی جولانه پُر پر
.
قاره بولود تک کوچدی یراوسته
گویا یاغاردی باران اختر
.
دگدوقجا اوخلار بال و پرآچدی
اوخدان دوزولدی جسمینه شهپر
.
گوز گزدورودی میدانه هردم
گویا دیردی ای قوم کافر
.
بیردم اماندی ال ساخلیون سیز
چوخ سالمیون بو جانیمه آذر
.
واردورالیمده بیرجه امانت
گوزلور یولونی آل پیمبر
.
ایمدی سکینه آغلار سوسوزدان
دورموش یول اوسته بو مشکی گوزلر
.
مشکی یتورسم اوز صاحبینه
بوغملی قلبیم اولماز مکدّر
.
هر نه ویراسوز منّتدی جانه
اوندا سیزوندی بوباش وپیکر
.
اولسام خجالت آل علیدن
اُولّم باتارسوز قانه سراسر
.
آلسازالیمدن ایندی سو مشکین
قالّام اُلونجه بو چولده مضطر
.
بومشکه باغلیدی تل تل بورشتۀ جانیم
قیرولسا بندی چخارجان آخارسوتک قانیم
.
گلون ویرون منه یول رحم ایدون سیزی تاری
سکینیه یتوروم بیرسومشکینی باری
.
بوقدرایلمیون قیل وقال بوبسدور
گلورقولاقیمه بیرسس گوروم بونه سس دور
.
یقین سکینه دورالعطش دیوب آغلار
او آغلادوقجه منیم ال ایاقیمی باغلار
.
او وقتیده یتوشوب نوفل ستم گستر
کمین ایدوب دالیدان اول لعین بد اختر
.
قلج الینده آچوب محنت و بلا یولونی
ویروب او سرورون اولدمده سالدی صاق قولونی
.
الیمی اوزدوز الیمدن گینه یوخومدی هراس
نچون سو اوسته قویوب اللرینی بوعبّاس
.
سو اوسته قویموشام آخر بو ناتوان جانی
دییلسون آدیمه تا سکینه قربانی
.
منه بو حالت اگر مایۀ شهادت دور
دوشوبدی صاق قولوم امّا صولوم سلامتدور
.
خیال ایلمرم درد و مِحنتیم چوخ دور
سکینیه یتورم گر سوئی غمیم یوخ دور
.
یوخومدی سوز آخا قانیم سو اوسته سو یرینه
گیدر سو مشکینه دکسوز سو آبرو یرینه
.
دگول سو مشکی بولون بیرجه آبرودی منه
بو آبروئیله جان گتسه صاف سودی منه
.
نقدر واردی سو قخمارام ملالتدن
اگر سو گیتسه من اولّم بوگون خجالتدن
.
دوشنده صول قولی اول سرور علی نسبون
کسیلدی صبرو قراری حسین تشنه لبون
.
بو چولده نخل وفانی گوروب گولون دردوز
رسا قدیمی بوغمدن کمانه دوندردوز
.
داخی بو نخل امیدیم سنوبدی بر ویرمز
دوشودی قولّاریم السیز الیم ثمر ویرمز
.
الیمدن ایندی دوتان یوخدی ساخلیام اوزومی
گلون قبول ایلیون سیز منیم بو سوزومی
.
سوزوم بودور که گویول آرزوسنی یتورم
ویرون امان بو سوئی من سکینیه یتورم
.
بوسویانومدا امانتدی خسته جانیم تک
گوزاوسته حفظ ایدرم چشم خونفشانیم تک
.
ویرون او قدر امان چکمیوم ملامتینی
سکینیه یتوروم بیرجه اوز امانتینی
.
یاغاردی اوستونه اوخلارهوادن چون باران
یارالی سینه سی اولدی نشان تیر و سنان
.
دگوب بیر اوخ او زمان مشک خونفشانینه
که مشکی پاره لنوب سو قاریشدی قانینه
.
باخوب سوگتدی گیدوب تاب دوشدی طاقتدن
آخوب سو مشکی کیمی اشک چشم حسرتدن
.
سویا باخاردی آخاردی یوزه گوزوندن یاش
دیردی گتدی سویوم راضیم اولم ایکاش
.
هلاک ایدرمنی بوغم مصیبتیم چوخ دور
داخی اوخیمه لره گیتمگه یوزوم یوخ دور
.
بو من بو سیز ویرون ایمدی نه قدر ورساز اگر
یارالی سینمی قیلّام سنان و تیره سپر
.
او وقتیده یتیشوب بیرلعین شوم ودغل
دمیرعمود الینده آچوبدی دست جفا
.
ویروب عمود باشندان سالوبدی طاقتدن
عقابیدن یره دوشدی همان جراحتدن
.
عجب سالوبدی فلک درد بی شماره منی
که بیرخزان گولی تک تاپشوروبدی خاره منی
.
سالوب کمنده منی بیر یارالی آهوتک
ویروبدی بیربیله صیّاد جان شکاره منی
.
سنوبدی بال و پریم بیر قناد سیز قوش تک
بو آشیانۀ غمده چکوبله داره منی
.
آلوب آرایه منی فرقۀ زحل آثار
ایدوبله خنجر ظلمیله پاره پاره منی
.
تزاولدورون منی ای قوم دون بد اختر
وِیرون بو دمده دَمِ تیغِ آبداره منی
.
تو کون فرات کیمی قانیمی ایدون جاری
که بلکه قان آپارا دشت کوهساره منی
.
سکینه قورخورام ایمدی گله باشیم اوسته
سوایستیه سالا درد وغمه دوباره منی
.
کسون بوباشی علی اصغر آدینه قربان
که سو بهاسی ایدون سیز او شیر خواره منی
.
اولوم او روضۀ (غمناکوه) اوزوم قربان
بوایل سن ایسته او شش گوشه لی مزاره منی
.
.
.
.
تشریف آوردن حضرت سیدالشهداعلیه السلام به سر بالین حضرت ابوالفضل علیه السلام
.
چوخ چکمه داد آچ گوزون داده گلموشم
فریاد ایتمه بیر بیله فریاده گلموشم
.
یالقوزگوروب بوچولده سنه ایتمگه کمک
یالقوز قالان بو جانیله امداده گلموشم
.
قارداش قالوردی بیرسنه ایمدی گمانیمیز
سندن کسوب امیدیمی دنیاده گلموشم
.
اوز جانمی سالوبلا کناره بو جسمیدن
تا تاپماقا بو جانیمی صحراده گلموشم
.
سن بیرسن اوزگوزومده منه جان برابری
بیرصورتا بوهیکل معناده گلموشم
.
بیر نورودون گوزومده حقیقتده گون کیمی
ایتدون غروب ظلمت لیلاده گلموشم
.
ای مُلک مِحنت ایچره سلیمان غم حشم
کیم ویردی بو بساطوی برباده گلموشم
.
گوردوم یارالی باشیوی حیدر بابام کیمی
سالدوم آتام علینی بودم یاده گلموشم
.
قویما یوزوی توپراقه ای سبط بو تراب
دور چوخدا یاتما بستر خاراده گلموشم
.
دوربیرایاقه گورنه قیامتدی خیمه ده
ماتم اساسوی ایدوب آماده گلموشم
.
سندی بیلم یاتوب علمیم یوخدی بیر کسیم
سنسیز تاپالّا ال منه دعواده گلموشم
.
(غمناکوام) سن ایله منیم چاره دردیمه
چون باغلیوب امید سیز اولاده گلموشم
#عباسیه_غمناک_تبریزی
#عباسیه_شهادت
#چو_فرزند_علی_آن_معدن_کان_وفا_عباس
#سوسوز_گوروب_شهدا_قیزلارین_گتورموب_تاب
#ترکی
.
✍️ #زبدةالاشعار ✍️
.
🆔: @nohe_torki
نظر دهید