گفتار امام حسین با خواهر
نوحه روز عاشورا
زبانحال امام مظلوم خطاب به حضرت علیا مکرمه زینب کبری سلام الله علیها
.
.
#سبک_زینبم_جان_اوستیم … 4 سبک
.
.
مرحوم شانی تبریزی
.
.
چکمه منت بو قدر شمر ستمگردن باجی
قلبمی یاندیرما چوخ ال چک بو خنجردن باجی
.
.
دوتماشمرین خنجرین یالوارما چوخ افغانیله
من بویاندیم قانه سن باری بویانما قانیله
قوی منی خنجر دمینده بو لب عطشانیله
ایله رجعت ایتمه غفلت آل حیدردن باجی
.
.
آغلاماجان اوستیم پوزما بو پوزقون حالیمی
گورمیوم حالون سنون سن گورمه بو احوالیمی
گئت خیامه باشوه یغ دربدر اطفالیمی
خیمه لردن قورخورام گلسون حرملردن باجی
.
.
قویموشام بو قانلی توپراقه رضائیله من اوز
صابر اول سنده منیم تک هربلایه باجی دوز
آخرین بیر ساعتمدور عمرده مندن ال اوز
من نجه گوردون ال اوزدوم اوغلوم اکبردن باجی
.
.
جان ویرنده اکبریم اولدی یقین حاصل منه
مطمئن اولدوم بو امره حل اولوب مشگل منه
شمرده یوخدور حیا لازم دگل قاتل منه
ایستوری اولسون جدا باشیمده پیکردن باجی
.
.
تاپدی جرأت گوردی دشمن قوم قارداشسیز منی
گورمه سن خنجر دمینده باری یولداشسیز منی
اون ایکی ضربتله ائیلر شمر دون باشسیز منی
گه قویار خنجر قفادن گاهی حنجردن باجی
.
.
من ایدنده ناله ائیلر آه و واویلا آنام
یالواراندا شمر شومه، گور دوزر آیا آنام
دورما گیت قوی گوزلریمی باغلاسون زهرا آنام
سن خجالت سن اگر بیر قاره معجردن باجی
.
.
من کیمی صید دلون دام بلایه رام ایله
خیمه ده اوغلی ئولن چوخ وار گئدوب آرام ایله
قویما تک اکبر آناسین چوخ اونا اکرام ایله
داغلانوب قلبی غم شبه پیمبردن باجی
.
.
من کیمی گوزدن باجی نازلی ربابی آتماسن
آل گجه آغوشوه او یاتمینجا یاتماسن
آغلادور دشمن علاجون یوخ اوزون آغلاتماسن
دیندیروب آل دردینی قلب مکدّردن باجی
.
.
منده نوک نیزه ده باشیله همراهم سیزه
مونس محنت انیس ناله و آهم سیزه
یوز ویرر بوندان صورا نه گونلر آگاهم سیزه
شامده یا کوفه ده یا اوزگه یرلردن باجی
.
.
سسلینده من جداده نام حیّ داوری
باشیمه جمع ایله سنده عترت پیغمبری
قویما قالسون بیر یتیمه مسکن ایتسون چوللری
گوز گوتورمه اهل بیت زار و مضطردن باجی
.
.
باخما دورتمین یاره نین مین ناله سی بیر یاره وار
عاشقانه ناله دور بو یار نازی یاره وار
قلبده پنهانی یتمش بیر ساغالماز یاره وار
آلمشام مرهم سراغین روز محشردن باجی
.
.
گرچه سولموش لبلریم سوز عطشدن غنچه وش
اوزگه بیرعالمدی بو نه یاره نه سوز عطش
عشق اولان باشدا نه خنجر زحمتی نه کشمکش
حق یولوندا آب خنجر خوشدی کوثردن باجی
.
.
ایستیوب بوحالیمی جانان اودورخوشدور منه
یوخ غمیم یتدی الیم بیر ال یتشمز دامنه
لیک مشگلدور منه سن یالواراندا دشمنه
چونکه آرتوخدی شماتت جمله غملردن باجی
.
.
شیعه لرحشره گلنده الده عصیان نامه سی
منده گلم الده اوغلوم اکبرین عمامه سی
شأنیده گلسون گرک صاغ الده اودلی خامه سی
یازدیقین ایتسین مکرّر صولدا دفتردن باجی
.
.
#حسینیه #شانی_تبریزی
#حسینیه_شهادت #قتلگاه
#چکمه_منت_بو_قدر_شمر_ستمگردن_باجی
#ترکی
#زبدةالاشعار
نظر دهید