آه مظلوم
.
✍️ زبدة الاشعار ✍️
.
?: @nohe_torki
.
اکبر ستاری (قیزیل قلم )
.
چکن وقته زبانه آهِ مظلوم
اَثر إیلر جهانه آهِ مظلوم
گئدَر هفت آسمانه آهِ مظلوم
دؤشَهْ هانسی مکانه آهِ مظلوم
گَزَر خانه به خانه آهِ مظلوم
وورار بیرگؤن جوانه آهِ مظلوم
.
.
دؤشَر دریایه بیر قطره مثالی
تاپار تغییر تِئز دریانین حالی
دؤنَر تبخیره دریانین جمالی
غبار غم گییَر آبِ زلالی
إئدر ممکن امورات محالی
دؤنَر اَشکِ روانه آهِ مظلوم
.
.
دلِ دریادن اوج إیلَر سَمایَه
سماده گردش إیلر پایه پایه
بولود شکلینده گؤیْده لایه لایه
چکر شمسِ جهان آرایه سایه
گلنده ایلدیریملار تک صدایه
ایشیلدار دانه دانه آهِ مظلوم
.
.
گؤررسن کی یئغیشدی قطره قطره
یِئرین اؤستؤنده تبدیل اولدو نَهره
همان نهری سرازیر إئتدی بحره
او بحرین سرعتین دؤندَردی شهره
بساطِ اهلِ ظلمی سالدی،قهره
إئدَر قلبی نشانه آهِ مظلوم
.
.
هَر اوْلْ مظلوم کیم دیلدن چکر آه
اَلولی سینه سیلن سسلر آلله
اولار هر ندبه سی مقبول درگاه
گؤررسن عرشِ اعلایه سالیب راه
مسیرِ راهین إئتمَز آه گمراه
یول إئیلر لامکانه آهِ مظلوم
.
.
چیخا آهِ جیگر سوز هر ئورءکدن
عبور إئیلر یقیندیر نُه فلکدن
آلار باجِ بقا حور و مَلَکدن
عیار آه خارجدیر محکدن
سیزار گؤزیاشی هانسی مَردُمَکدن
گؤررسن دؤندؤ قانه آهِ مظلوم
.
.
او قان جوشه گلر هابیلی سسلر
قصاص عنوانینه قابیلی سسلر
بؤتؤن اولادِ اسرائیلی سسلر
گهْ ابراهیم و اسماعیلی سسلر
هرایه بلکه جبرائیلی سسلر
دؤزَر سود و زیانه آهِ مظلوم
.
.
بِئلَه تشبیه و وصف و استعاره
نقدری ذِکر اولا گلمَز شماره
سؤزی درک إئیلییر اهلِ اشاره
او ظالم کی چکر مظلومی داره
یانار بیرگؤن وجودی قهرِ ناره
یازار آدین زمانه آهِ مظلوم
.
.
چکنده آه مظلومِ جیگرسوز
یِئریندن اوینایار گؤیلرده اولدوز
یازیلّار شامیده مظلومه بیر قیز
اسیر درد و محنتدیر شب و روز
رقیّه آدلی بیر شمع شب افروز
چکیب اوْلْ نازدانه آهْ مظلوم
.
.
چکیب بیر آه اول دُردانه دختر
دؤشوبدور لرزییه کاخِ ستمگر
مسخّر إئیله دی شاماتی یکسر
آدی تاریخیده قالدی مظفّر
نَقَدری شرح إئده وُعّاظِ منبر
یئنه گلمز بیانه آهِ مظلوم
.
.
رقیّه آهی آهه مدغَم إئتدی
کیچیک قلبین غمیلن همدم إئتدی
ئورءک قانیله آهین توأم إئتدی
یزیدین تاج و تختین برهم إئتدی
اؤزون مُفتیِّ عشقِ اعظم إئتدی
قاریشدی،رَگده قانه آهِ مظلوم
.
.
رقیه آه چکدی جان آلیشدی
ئورءک مانند آتشدان آلیشدی
او آهین شعله سیندن قان آلیشدی
جهانه اود ووروب هریان آلیشدی
بساطِ سلطه ی شیطان آلیشدی
فقط،اولدو بهانه آهِ مظلوم
.
.
همان آهی رقیه آذر إئتدی
اونو ویرانسراده اخگر إئتدی
او اخگر کاخِ ظلمی بستر إئتدی
کؤزردی ظلم إئوین خاکستر إئتدی
قصاص آلدی غریبه کیفر إئتدی
آچیب یول امتحانه آهِ مظلوم
.
.
رقیه آهینه پاداش گلدی
طبق ده بیر یارالی باش گلدی
سوزولدی گؤزده قانلی یاش گلدی
بو محنت هر غمیندن باش گلدی
شریک دردینه یولداش گلدی
آلیبدیر عیدیانه آهِ مظلوم
.
.
رقیه مهربان بابانی گؤردی
سرِپاکِ شَهِ عطشانی گوردی
ساغالماز دردینه درمانی گوردی
دوداقی یاره لی سلطانی گوردی
ئوزون إئتسین اونا قربانی گؤردی
دییَئردی یانه یانه آهْ مظلوم
.
.
دئدی خوش گلمیسن دیداره بابا
دیلیم گلمیر داخی گفتاره بابا
دوداقونده یوخییدی یاره بابا
گتیردون اصغره گهواره بابا؟
گؤروم گتدون منه گوشواره بابا؟
گلیبسن دردیمه قیل چاره مظلوم
.
.
مصیبت چوخدی (ستاری)یاز آغلا
رقیه ائیله سه یاری یاز آغلا
چاغیر هیئتده دوسلاری یاز آغلا
خانم لطف ائیله سین باری یاز آغلا
اولاق سوریّه زوّاری یاز آغلا
قیلار دعوت بیزی دیداره مظلوم
.
.
.
#حضرت_رقیه_شهادت
#چکن_وقته_زبانه_آه_مظلوم
#قیزیل_قلم
#ترکی
.
✍️ #زبدةالاشعار ✍️
.
?: @nohe_torki
نظر دهید