پندیات
گریز به زبانحال حضرت رقیه در گودال قتلگاه
.
.
.
شاهی اردبیلی
.
.
.
کاش اولیدی قدرتیم سام و نریمانلار کیمی
تنگ ائدردیم ظالیمه دنیانی زندانلار کیمی
.
کاش جنگ و فقردن آزاد ائدیدیم عالمی
گولمین یوزلر گولیدی باغ و بستانلار کیمی
.
کاش انسانلار ایاقینده اولیدیم سارماشیق
قیوریلیدیم ایری لر بوینندا ثعبانلار کیمی
.
کاش اکیدیم داش اورکلرده محبت تخمینی
گولله لردن گل گووردیدیم گلستانلار کیمی
.
کاش رستاخیزه جن اولمیدی قانون دهرده
بلکه قان توکمیدی انسان وحشی حیوانلار کیمی
.
کاش اولیدی بوردا انور دئیدی احسن شاهیا
حقی ایلورسن بیان خالص خدا خوانلار کیمی
.
بو سوزی مندن قاباق غیرتلی بیر انسان دئیوب
منده تکرار ایلورم غیرتلی انسانلار کیمی
.
کاش اولیدی اختیاریمده بوتون طیاره لر
تا چورک گویدن سپیدیم خلقه بارانلار کیمی
.
حیله کارلیقدان صورا شهرین یوخیمیش شوکتی
کاش شوکتسیز یاشیدیم چولده چوپانلار کیمی
.
کاش اولمیدی تمدن عصر آهن دوره سی
یوخلامیدی رحم و رافت پاسلی وجدانلار کیمی
.
کاش ایریلمیدی علم اسلامیدن چون هچ گروه
دینه ضربت ورمیوب نادان مسلمان لار کیمی
.
کاش سوز بیلمیدی دیل لر کاش اولمیدی کلام
تا دئیلمیدی تیکان تعریفی ریحانلار کیمی
.
ایندی که آلمیش سواد اوستین سیاستنن سلاح
کاش اولیدوق بیسواد اولکی دورانلار کیمی
.
سنده شاهی شعر ملکین فتح قیلدون بیل ولی
رخنه گرمز کبردن هیچ کیم سخندانلار کیمی
.
اویما استاد و جناب و میر و مولا لفظینه
یوخدی آفت عقل و دینه اسم و عنوانلار کیمی
.
ظاهری خوش باطنی چرکین بشردن قیل حذر
فتنه شیطان رجیم بیلمز بو شیطانلار کیمی
.
علم و فضلیلن بزن چون مردم بی فضل و علم
گیسه ابریشم گینه رسوادی عریانلار کیمی
.
بوشلا بو دنیانین عشقین چون اونون عاشقلری
فاطمه اولادینی ذبح ائتدی قربانلتر کیمی
.
تشنه افعی لر کیمی قوزاندی خنجرلر گوگه
دوشدی قربانلار یره بی جلد قرآنلار کیمی
.
اوخلار اوستن اوخ قالاندی نیزه اوستن نیزه لر
یر گوروندی ایلدیریم ورمیش نیستانلار کیمی
.
عصر عاشورانی بوغدی عرصه دن قالخان هراس
گیزلنوب گون خلقدن شرمنده سلطانلار کیمی
.
گلدی الدوزلار یاسا گوزدن گوموش یاش توکدیلر
نعشلردن نورلر بوس ائتدی جانانلار کیمی
.
شامیدن بیر پاس کئچدی یتدی خلوت موسمی
چیخدی بیر قیز خیمه دن وحشتلی جیرانلار کیمی
.
گوردی دوقوز آسمانی تیتردن بیر صحنه وار
هر جهتدن حمله ایلور قورخی طوفانلار کیمی
.
.
.
دیو آدم خوار تک آچمیش قرا بیر شب دهن
اوردا بیر تنها اوشاق نیلر نه من بیلم نه سن
.
.
.
گوردی آی نورین بوغار صحراده محشر کولگه سی
هم ئولوم اوینار او چولده هم مصور کولگه سی
.
نهردن قالخوب گورولتی آب ائدر جراتلری
فوج لشکر یوخ ولی وار موج لشگر کولگه سی
.
ثبت ائدوب هر نقطه ده انگل عربلر چهره سین
هر طرفدن گورسنر دینسیز دلاور کولگه سی
.
یل دیر تا نعش لرده سانجیلان اوخ نیزیه
رقص ائدر میدان یوزینده اژدهالر کولگه سی
.
باشلادی یول گئتسین اما اگدی قدین قورخیدان
قورخی تک دوشدی دالیجان ایری پیکر کولگه سی
.
گه بدنسیز قول گوروب دیسگیندی گاه باشسیز بدن
گاه خنجر یاردی زهرین گاه خنجر کولگه سی
.
گه بو چیکنیندن باخوب خوف ائتدی گاه اول چیگنیدن
اولدی ساق سولدان هویدا شمر کافر کولگه سی
.
پاسلی چنگینده هوا اویناتدی هردم مولرین
یرده فرض ائتدی ایلاندور زلفینون هر کولگه سی
.
مین هراسیلن گزوب بیر باشلی پیکر تاپمادی
نجم اصغر اشکی اولدی سعد اکبر کولگه سی
.
ساده سوز یعنی او قیز ایلشدی یرده آغلادی
هم ئوزی اولدی نواگر هم نواگر کولگه سی
.
اوندا بیر اوخ تلی آلتیندان ایکی ال قوزانوب
گلدی سس گل ای قزیم ای عرشه زیور کولگه سی
.
وحشتیلن هی باخوب اطرافه تیتررسن ندن
تیترمه قورخما نه منکر وار نه منکر کولگه سی
.
واهمه ائتمه یاتوب بوردا عمون عباسده
امنیده ساخلار سنی قولسوز غضنفر کولگه سی
.
تا نظر سالدی او سولموش یاسمن اول صحنیه
تاپدی بیر حالت که گولدن اولدی خوشتر کولگه سی
.
کاه مثلی تیترین اندامی اولدی کوه تک
دوردی بیر جراتله که گورسندی حیدر کولگه سی
.
اول اوجالمیش قوللارا وئردی اوزاقدان بیر سلام
سویلدی یا رب بابامدور یا مصور کولگه سی
.
قاشدی سرعتلن یاروب اوخلار ایاقین بیلمدی
گوردی تیر و نشتری سرو و صنوبر کولگه سی
.
یول گئدردی شوقیلن بیر جور که من فرض ایلورم
چاتمازیدی اول قیزا آچسیدی گر پر کولگه سی
.
گئتدی گئتدی تاپدی بیر باشسیز مطهر پیکری
گوردی بیر عنقا یاتوب دورینده شهپر کولگه سی
.
قانلی قول قالخوب که تا آلسین قزین آغوشینه
سینه سینده نقش اولوب الله اکبر کولگه سی
.
اگدی باشین تا اپه گل گل آچیلمیش سینه دن
دوشدی قرمز گلشنه جانسیز کبوتر کولگه سی
.
یولدی زلفین سویلدی یاندیم بابا یاندیم بابا
داور آغلار حالوه ای حی داور کولگه سی
.
سیلمرم سینون توزین بیر حالداسان چون ای شهید
یارون اینجور سینوه دوشسه گل تر کولگه سی
.
جسموه خنجر ورانداندا سوال ائتسون دییر
وه نه پیکر دور اولوب جانلان برابر کولگه سی
.
.
.
باغرینا باسدی غرض بی کس قزین بی سر امام
نالیه گلدی او ساعت هر پیمبر هر امام
.
.
.
مجلس الفت قورولدی شور بی پایانیلن
دوغرانان شیر اولدی همدم خسته دل جیرانیلن
.
کاسه چشمین ائدوب شهزاده گریان پر آب
آتشین سوز باشلادی شاهنشه عریانیلن
.
قانلی سینوندن همین الان آلاردیم توز بابا
سیلمک اولسیدی سینق آئینه نی مژگانیلن
.
قوی توکوب قان یاش یووم عطشان بو غازوندن قانی
تا بیلینسون بعضی یول قانی یووالار قانیلن
.
قرآنا خنجر چکنلر اوخ وروبلار سینوه
سینوون چون فرقی یوخدور صفحه قرآنیلن
.
کعبه دن باشدور سنون قلب شریفون حیف حیف
کعبه دن باش کعبه نی مردم سوکوب پیکانیلن
.
یاروه قربان اولوم گلدن معطر دور یارون
هر بیرین عارف دئیشمز مین طبق ریحانیلن
.
کاش ذبح اولمیدی باشون تا لبوندن بوسه لر
سن ساتیدون نازیلن منده آلیدیم جانیلن
.
زانیان محصنه زیر محاسن گیزلنوب
یا رحیما سویلیوب جنگ ائتدیلر رحمانیلن
.
وه نخ زیبادور بو محفل ال چکوم بوندان نجه
کیم عوض ایلر بو بزمی روضه رضوانیلن
.
گزدیرور دورینده گور نه بیر چوخور یر عالمی
یدی گوی آلتی جهت بش حس دورد ارکانیلن
.
ائتمرم ذکر ائتمسه سبحان بوغازوندن طلوع
جاهل ایلر گفتگو گور سنمسین سبحانیلن
.
سینون اوستی آسمان دور نقد جانیم ریسمان
ریسمان آل آسمان وئر جودیلن احسانیلن
.
کیم کسوب بارماقوی هم کافریمیش هم جهول
چون ئوزین ائتمیش مخالف پنجه یزدانیلن
.
هم اورک یوخ هم کورک یوخ هم بیلک قان هم بوغاز
میزبانلار گور نه رفتار ایلیوب مهمانیلن
.
بیر بله انسان مروتسیز اولارمیش ای عجب
پهلواندا جنگ ائدر اوغلی ئولن نسوانیلن
.
باور ائتمزدیم ورالار نو عروسی وردیلار
یومدی گوز محکم دایاندی قدرت ایمانیلن
.
یر سینق اوخ باشماقیم یوخ دشمنیم چوخ سنیم آز
هر یانا قاچدیم توخاندیم سینه اسبانیلن
.
بیر یتیمی لااقل بیر نامروت سویمادی
هر اوشاق ائتدی کشاکش اون نفر نادانیلن
.
هارداکی بیر قیز یخیلدی یتدی تز عمم اورا
چوخلارین دشمن الیندن آلدی آز امکانیلن
.
قیتره شلاقی تا قیزلار باشیندان بینوا
هر قولین ائتدی برابر بیر قوی قلخانیلن
.
بیلموسن گوردوک نه لر اشرار و اوباشدان بابا
ایندیکی وار وقتیمیز قوی باشلیوم باشدان بابا
.
حین غارتده همین میدانی گوردون گورمه دون
خیمه اوستن آت چاپان اعدانی گوردون گورمه دون
.
من گجه باشسیز یاتان مردانی گوردیم بیر به بیر
سن گونوز غارت اولان نسوانی گوردون گورمه دون
.
اونداکی بیردن هجوم ائتدی اوتوزمین بی ادب
سنده آیا من گورن طوفانی گوردون گورمه دون
.
اندیرنده سیلی لر داشدان آغیر النن عرب
قان قولاقیندن آخان طفلانی گوردون گورمه دون
.
گلدن استقبال ائدنده قمچی باخدون باخمادون
سیلی لر پر پر ائدن ریحانی گوردون گورمه دون
.
قانلی صحراده قاچاندا پابرهنه قیزلارون
هر قدمده معجر زهرانی گوردون گورمه دون
.
اولدی بیر صحرای محشر عرصه غارت بابا
تیتردی ارکان ایمان آغلادی حکمت بابا
.
#پندیات #عاشورا #قتلگاه
#شام_غریبان
#کاش_اولیدی_قدرتیم_سام_و_نریمانلار_کیمی
#شاهی_اردبیلی
#ترکی
#زبدةالاشعار
نظر دهید