امان نامه
.
✍️ #زبدةالاشعار ✍️
🆔: @nohe_torki
.
آسال اردبیلی
.
.
کربلایه عصر تاسوعا چاتوب شمر لعین
دوره سین ایتمیش احاطه شخص جاهل آلتی مین
چوخلاری اهل دعا اهل ثنا پینه جبین
بیله فکر ایتمه حسینی آیری امت ئولدوروب
اهل تسبیح و دعا اهل عبادت ئولدوروب
.
.
گورجگین شمرون سپاهین صوته گلدی طبلیلر
آل طاها دیده گریان غرق شادی اهل شر
بیر نفر آلسا اگر اول قوم جاهلدن خبر
شادلیقا باعث ندور بیر سویلیون بیزده بیلخ
سسلنللر گلمیشوک عصرون امامین ئولدورخ
.
.
بیله اعرابون گرک شخصیتی حراج اولا
کوفی لر تک چوخلاری بیر لقمیه محتاج اولا
ایستور ئولدورسون حقی تا عازم معراج اولا
باخمیون عالمده سیز پینه جبین ساجدلره
عرشون اهلی لعنت ایلور بی عمل زاهدلره
.
.
حافظ قرآنیدی شمر دنی اهل ثنا
زیر لب ذکر ایلییردی حمد و تسبیح ودعا
مالینون خمسون ویرردی ایل به ایل بی ادعا
بو مثل عبرت درختین صدر عالمده اکر
داتی ناپاک اولسا هر کس ذاتینه حتما چکر
.
.
چون زنازادیدی شمر بی حیا طبق سند
قصه ی صحرائیلن چوپاندی قول مستند
آلنینا ثبت ایلییر بو آدینی ذات احد
ایستورم عرض ایلییم بد ذات شخصین عادتین
مال دنیایه گوره ساتدی سراسر طاعتین
.
.
چاتجاقین کرب و بلایه سسلدی ای قوم کین
این چنین بر ما بفرموده امیر المومنین
قتل عام اولسون بو صحراده گرک اهل برین
مست لایعقل اولون کبریله قلبوز دولدورون
کوثر اوغلون علقم اوستونده لب عطشان ئولدورن
.
.
ویرمیشیدی ابن مرجانه نچه نامه اونا
اولین ده یازمیشیدی ای سپاه بی حیا
قویمیون آل علیدن بیر نفر زنده قالا
زنده گر قالسا اولار آل امیه خوار اولار
زاده ی زهرای اطهر عالمه سالار اولار
.
.
امر شاهنشاه عالمدن حمایت ایلیون
صحنه ی عاشوریده بر پا قیامت ایلیون
منکر حقدور حسین حقیله بیعت ایلیون
شاه دورانون سیزه بیر پربها پیغامی وار
کیم یارا چوخ ویرسا آل اللهه چوخ انعامی وار
.
.
نامه نون اما بیری بیر نامه ی حساسیدی
نامه نی دوزدور یازان سرکرده ی خناسیدی
مطلعیندن ختمه جک تک صحبتی عباسیدی
ایتدی اول نامه هراس لشکر کفری زیاد
قوی دیوم یازمیش نلر مکتوبیده ابن زیاد
.
.
تا حسینیلن نقدری وار ابوالفضل دلیر
فتح کیمنندی اولانمز بیر نفر بوندان خبیر
چون علینون مکتبیندن درس آلوب بو شرزه شیر
بو جوانون طلعتی دنیانی مخمور ایلیر
چپ باخا کیم اهلبیته گوزلرین کور ایلیر
.
.
بیعت آل ای شمر ظالم اول منور ماهیدن
ایله آسوده منی بو وحشت جانکاهیدن
گوردون هر نحویلن آیریلمور او آل اللهیدن
کیم حسین سرداری اولسا سن دئنن قربان اولار
کیم یزیده بیعت ایتسه غرق در احسان اولار
.
.
ابن مرجانه سوزون درک ایتدی تا شمر دنی
باشلادی اول بی حیا کبریله راه خیمه نی
تلین اوسته تا قدم قویدی جهالت معدنی
آچدی نحس آغزین دیدی ای محتشم آزاده لر
دیدیمه فورا گلون تل اوسته خواهر زاده لر
.
.
گلمیشم سیزدن بو صحراده حمایت ایلییم
مظهر قدرت یزیده اخذ بیعت ایلییم
سیزلره منصب ویروب صاحب جلالت ایلییم
غیرت و وجدانی هم بی جا مرامی بوشلیون
صاحب اجلال اولون تشنه امامی بوشلیون
.
.
تا او نادان صوتینی درک ایله دی سقای دین
بیر سویوخ تر شرمیدن دوتدی منور صورتین
تا بو جریانی اشیتدی سرور خلد برین
محضر والاسینه عباسی دعوت ایله دی
حیدری لحنیلن اول شیری نصیحت ایله دی
.
.
امر ایدوب گیت تلین اوسته ویر قولاق گفتارینه
گر صلاحون اولسا ویر بیعت الین سالارینه
راضی اولما پیکرون قارداش بویانسین ثارینه
آلدی رخصت محضر سالاریدن سردار عشق
تلین اوسته عازم اولدی غیضیلن رخسار عشق
.
.
کیم گوروب وقرین دیدی تل اوسته شیر نر گلور
یا کی قافی ترک ایدوب عنقای زیبا پر گلور
مرحبی ئولدورمگه یا فاتح خیبر گلور
هیبت عباسی گورجک شمر بیلدی مطلبی
بیلدی بیر دنیایه ویرمز تار موی زینبی
.
.
گورجگین اول ابلهی پور غیور مرتضا
سسلدی ای پست و انتر کاسه لیس بی حیا
سن ندن باعث اولوبسان آل حیدر قو رخوشا
اذنیم اولسیدی سالاردیم جسمووی بیر حالته
شیریلر گورسیدی اندامون دوشردی وحشته
.
.
من علینون اوغلیام ام البنینه دلبرم
لشکریم یتمیش نفردور لشکره سر لشکرم
عالمین سلطانی اولسامدا حسینه نوکرم
دست بیعت بو جهانداهر پلیده ویرمرم
اصغرون بند قماتین مین یزیده ویرمرم
.
.
سرور و شاهیم حسیندور عشقیمه سلطان حسین
روحیمه ریحان حسیندور دردیمه درمان حسین
قان دیور رگلرده هردم آدووه قربان حسین
مکتب عشاقیده شوری حسیندن آلمیشام
بدر آل هاشمم نوری حسیندن آلمیشام
.
.
قویمارام باغ ولایت صرصر غملن سولا
قویمارام زینب گوزی ابر بهاران تک دولا
اولمارام راضی رقیه مضطرب احوال اولا
کاش منه رخصت ویریدی سرّ ایزد محرمی
خیمه گاهه دوندریدیم من مسیر علقمی
.
.
سهوینی تا شمر کافر درک ایدوبدور آشکار
دامنین جمع ایلیوب تز تلیدن اولدی کنار
ایتدی بو صحنه وقار مرتضانی شرمسار
گوئیا تل اوسته عزت کاخینی یاندیردیلار
تیز پر عنقای عشقین شهپرین سیندیردیلار
.
.
باشلیوب یول مخیمه ساری پریشان و غمین
بو سوزی ذکر ایلییردی دمبدم اول مه جبین
درگهیندن قویمیا ایکاش منی سلطان دین
بی ریا عشقین یولوندا شور و شینه عاشقم
نیلیوم بدو تولددن حسینه عاشقم
.
.
قوسا گر مولا منی الله بو جانی نینورم
گوزلریمده نوری یا قولدا توانی نینورم
من حسینی ایستورم سیم و طلانی نینورم
نینورم اون یدی منصب ویرسه لر نسبت منه
من حسین سیز گیتمرم گر ویرسه لر جنت منه
.
.
گوردی تا ناز لی رقیه تشنه لر سقاسینی
توکدی رخساره گوزوندن پربها الماسینی
عرض ایدوب آتما عموجان سن بنات یاسینی
سن اگر گیتسون چالار طبل مسرت اشقیا
ئولدورر قیزلاری آتلار دیرناقی ای باوفا
.
.
راضی اولما شاه عالم بی وزیر اولسون عمو
راضی اولما دل یارا ویرسون بیزه قوم عدو
اول زماندانکی ایدوب قوم جفا تحریم سو
آند اولا مه صورته غمدن سوزولمیش اشکووه
آل هاشم چشم امیدین تیکوبلر مشکووه
.
.
ناگهان غملی رقیه معجرین آلدی اله
عرض ایدوب بیز هیچ اقلا اصغره بیر فکر ایله
بیرده بیر لحظه قولاق ویر بو بلالی نسگله
خیمیه گر یول تاپا اعراب بد فطرت عمو
قمچیه توش اولماقا قیزلاردا یوخ طاقت عمو
.
.
سسلنوب عباس اودم ای روحیمه ریحان بالا
من مسلمانم رسولیمدی جناب مصطفی
اولموش استادیم شرافت مکتبینده مرتضی
باشیمی ویررم ولی هر شاهه تعظیم ایتمرم
قوسادا مولا منی آیری صراطه گیتمرم
.
.
گیت دئنن ای شاه رضوان ای امیر دادگر
سن کیمین شهده قووار درگاهیدن سائل مگر
نوکرون هر عیبی اولسا ابن حیدر عفو ایدر
سن منی رد ایلسون بو قلبیمی آلام آلار
بیر یریم یوخدور گیدم بو غم منی دلدن سالار
.
.
بیر گناهیم گر اولوب عفو ایله طاهایه گوره
کوفه ده ضربتلنن شاه دل آرایه گوره
نصف شب قبره گیدن مظلومه زهرایه گوره
گر منی عفو ایلسه شال شجاعت باغلارام
قوللاریم قطع اولسادا سینم ده پرچم ساخلارام
.
.
ای (نوید)خالق سنه اوز لطفینی اعطا ایدوب
دار فانی ده محقر رتبووی اعلا ایدوب
نوجوان لیقدان سنی چون شاعر زهرا ایدوب
شعر چوخلاری یازور گر گلشن و گلزاریدن
سن ولی یاز عشقیلن عباس پرچمداریدن
.
.
#کربلایه_عصر_تاسوعا_چاتوب_شمر_لعین
#ترکی
.
✍️ #زبدةالاشعار ✍️
🆔: @nohe_torki
نظر دهید