زبدةالاشعار

کربلا بیر مکاندی طوفانی #اکبریه_امانی_اردبیلی

رفتن حضرت علی اکبر(ع)برای آب در #شب_عاشورا
.
✍️ زبدة الاشعار ✍️

?: @nohe_torki
.
حاج علیرضا امانی مجداردبیلی
.
کربلا بیر مکاندی طوفانی
آغلادوب ئوز غمیله دنیانی
.
دشتیدی غیر کشت و لَم یَزرَع
نه باغی واردی نه گلستانی
.
گؤرسنور دور دسته جک تپراق
خار آلوب، بوته بوته صحرانی
.
نه بنا گؤرسنور ، نه آبادی
ائلمز کیم بو چولده مأوانی
.
دوقّوز آی بو چوله یاغیش یاغماز
دشت اولوب بیر کویر طولانی
.
گؤرسنور موج های نامرئی
ایستی یر قـَیتَرنده گرمانی
.
گون،چخان لحظه دن آلار طاقت
ائلییر خسته روح انسانی
.
گون باتان وقتی اسسه یئل چؤلده
توز دوتار چهره ی ثریّانی
.
بئله بیر چولده تک آخور علقم
اود کنارینده گؤر بو دریانی
.
یازیلوب سال شصت هجریدی
بویودی کربلا بیابانی
.
باخ حسینین، مرامینه امّا
بوردا ائتدی ادا ٕ ، پیمانی
.
بیر بئله یرده وردی اردوگاه
ائتدی برپا خیام والانی
.
آییروب ، شیوه ی نظامیلن
افسر و هنگِ تحتِ فرمانی
.
دوره ده خیمه قوردی انصاری
آرادا ، عترت پریشانی
.
ائتدیلر استوار ، بیر خیمه
اکبر آلدی کناره لیلانی
.
آیری بیر خیمه ده ائدوب ساکن
صود اَمرلن ربابِ نالانی
.
قاسمه یئر وئروب سریِّه یلَن
بیر اولا یعنی جان و جانانی
.
بیر به بیر خیمه لرده یر آلدی
حضرتین اهل بیت و نسوانی
.
وردولار شاهِ عشقه بیر دربار
کی طوافه گتیردی حورانی
.
ایکی خیمه اونون کنارینده
قوردولار ، عاقبتده یارانی
.
بو ایکی خیمیه حسین باخدی
یوزونه آخدی اشکِ چشمانی
.
بیرینه ائتدی زینبی داخل
بیرینه دعوت ائتدی سقّانی
.
بو ایکی خیمیه پناهنده
اولاجاقدی حسین طفلانی
.
بو ایکی خیمه روز عاشورا
ساخلادی قورخوشان یتیمانی
.
بو ایکی خیمه نین بیریندِیدی
دوتدی غم قلبِ ماه تابانی
.
اوندا کی کسدی سو یولون اعدا
مشکله سالدی آلِ طاهانی
.
بالالار تشنه لیکدن آغلاردی
غصه لر یاندیروردی زهرانی
.
صود امر آز قالوب دوشه دیلدن
لشگرین یاتموشیدی وجدانی
.
تا رباب آغلادی ، اباالفضلین
یوزونه سوزدی اشک غلطانی
.
سس گلوردی سوسوز بالام لایلای
اوزون اَل ، هی سیلوردی مژگانی
.
اوتورا بیلمدی سراسینده
گؤزلری تیره گوردی دنیانی
.
باغلیوب تیغینون کمربندین
الینه آلدی تیغِ عریانی
.
ترک ائدوب خیمه سین بو حالتلن
دولانا دشت ، لَیلِ بحرانی
.
آسمان ماهینه یئرین ماهی
دردِ دل ایلیوردی پنهانی
.
نه چتین دردیدور دئدی سینماق
سیندیرور روزگار سقّانی
.
عیبی یوخ، کربلاده سینسامدا
قویمارام تک بو چولده مولانی
.
نوکرم من عزیز زهرایه
نینورم جاهِ آل سفیانی
.
آقامون عهدینه دئدیم لبّیک
جان وئریب بیلمَرم پشیمانی
.
بیر غمیم وار دیینمورم واضح
اود وروب یاندیرور سراپانی
.
نگران ایلیور منی اصغر
دؤزَر آخر نجه بو طوفانی
.
دیلی یوخ سسلیه عمو یاندوم
گؤزلری ایلیور تمنّانی
.
اصغرین لبلرین اگر گؤرسه
آغلادار شمر نامسلمانی
.
تانیا بیلمز اصغری هرکس
بیر مَلَکدور بَلَکده زندانی
.
آقامون اوغلودا آقامدی منیم
عشقینین یوخدی حدّ و میزانی
.
بو سؤزی ایلیوردی هی تکرار
دولانور خیمه گاه عظمانی
.
داخلِ خیمه گاه ناغافل
گؤردی بیر بانویِ پریشانی
.
بویوروب کیمسن ای پریشانحال
دولانورسان ندن بو صحرانی
.
مطلبون اولسا ایله فرمایش
گؤرسنور سنده غصه طغیانی
.
او خانم ایسته دی وئره پاسخ
آغلاماق قویمادی او نالانی
.
یول آلوب گئتدی ئوز یولون اما
بیلینور محنت فراوانی
.
مرتضی اوغلی قالدی حیرتده
بیلمه دی علّتِ بو غوغانی
.
گئچدی بیر ساعت اُول قضایادن
گؤردی امّا دوباره جریانی
.
او خانم گلدی گئتدی اوچ دفعه
نگران ائتدی ماه تابانی
.
آخرین دفعه ایله دی تعقیب
نصفِ شب بانوی هراسانی
.
گؤردی بیر خیمیه اولوب داخل
خیمه ده ایلور آه و افغانی
.
بویوروب ای عفیف اولان بانو
آغلیورسان ندندی پنهانی؟
.
گلدی بیر سس عمو ، دایان گلدیم
گئتمه سن بیل رقیه نین جانی
.
آچیلوب خیمه گؤردی پرچمدار
الده معجر سه ساله زهرانی
.
معجری ایله دی اَوَل تقدیم
دئدی قوی شرح ائدوم قضایانی
.
دولانان خیمه گاهی لیلادی
دردی وار آختاروردی درمانی
.
یوللیوب معجرین سنه لیلا
غصّه لر درده سالدی لیلانی
.
نچه ساعت اولار گئدوب اکبر
سو گتیرسین بو شام ظلمانی
.
یوبانوب بیلمیروک نه علّتدن
تاپمیوب آختاروبدی هر یانی
.
قاپوآ حاجته گلوب لیلا
ائلیه یعنی بو تقاضانی
.
عمو جان اکبری یتیر آناما
بیزدن ال ، سنده چاره درمانی
.
ائله دی سؤز اثر ابوالفضله
جلدیده اسدی تیغ برّانی
.
قَییدوب ئوز سراسینه فوراً
غیضیلن صادر ائتدی فرمانی
.
ائدوب اوچ قارداشین اَوَل احضار
مو به مو شرح ائدوبدی جریانی
.
بویوروب منده نوکرم ، سیزده
سرورِ عشقه ، یوخدی کتمانی
.
اوگئیوک بیز بو چولده دؤرد قارداش
گرچه وار بیزده مرتضی قانی
.
بیز گرک قویمیاق علی الآن
اوتانا هر گورنده زهرانی
.
بیز مگر ئولموشوک، سوآ گئتدی
لیلینین اوغلی ، لیل بحرانی
.
ترک ائدوب خیمه گاهی دؤرد قارداش
دوتدولار یوز ، رهِ نیستانی
.
گؤردولر بیر نفر شتابیلن
طیّ ائدور راه پست و بالانی
.
تانیماق نصف شب چتین اولدی
هر قَدَر ائتدیلر تماشانی
.
دئدیلر کیمسن؟ آی گجه یاری
دولانان دشت محنت افزانی
.
او گلن بیر جواب ائدوب اظهار
عرشیده درده سالدی حورانی
.
دئدی بیر خستیم کی یوسف تک
گزورم راه شهر کنعانی
.
یول وئرون ، منده بیر امانت وار
اصغرین دردینیندی درمانی
.
قورخورام مشگیمه دگه صدمه
ائتمرم یوخسا ترک ، میدانی
.
سیزیلن ایلرم سحر پیکار
ساخلیون سیزده تیر و پیکانی
.
یول آچون تشنه قیزلارا خاطر
عموم الآن بیلر قضایانی
.
تانیدی بو سسی علی اوغلی
امر ائدوبدور سکوته اخوانی
.
بویوروب صبر ائدون گوروم نئینور
امتحاندور بونا بو جریانی
.
گؤردولر باخدی تلّه بیر اکبر
سسلدی شیرخوارِ عطشانی
.
دئدی قارداش بیر آز یوباندوم من
صبر ائله قارداشون گلر آنی
.
گلمسم اکبری حلال ایله
گلمگین بیل یوخیدی امکانی
.
سنه بیر مشگی چوخ گورور دنیا
چؤللره بوشلیوبلا دریانی
.
نقدر وار نفس سو مشگینّن
گؤزلرم قورخما قارداشیم جانی
.
کاش عمومدا گله بو بیر مشگی
یتیرک سالم ، آی سو جیرانی
.
ائشیدنده بو سوزلری عباس
قوللارین آچدی ائتدی افغانی
.
جان دئدی اکبریم ، عمون گلدی
بابوون اؤلمیوبدی دربانی…
.
ئورگنوب شعری چون الفبادن
نکته پرداز اولوب«الف مانی»
.
نوکره ائتمسه نظر ارباب
هئچ قلم ایلمز سخنرانی

متن پیشنهادی:  ای حجّت خدا قاپووا گلمیشوک آقا #کاظمیه_علی_تیموری

.
#شب_عاشورا
#اکبریه_شجاعت
#کربلا_بیر_مکاندی_طوفانی
#امانی_اردبیلی
#ترکی
.
✍️ #زبدةالاشعار ✍️

?: @nohe_torki

نظر دهید

جستجو در نام شاعر یا مناسبت

Search
Generic filters
Exact matches only
Filter by Custom Post Type

کلمات کلیدی: فهرستاشعار14معصومموضوععاشورائیانماهشاعراصفهانیتبریزیاردبیلیزنجانی

جستجو در مصرع اول

Search
Generic filters

Filter by Custom Post Type

دسته بندی درختی

دسته بندی درختی