خطاب به زمین کربلا
.
.
مرحومین طوری تبریزی – مشکوة تبریزی – یتیم تبریزی
.
.
کربلا سنده تجلّا ایلدی وجه خدا
اولدی محو اول جلوه دن مرآت عین کبریا
.
.
طور سیناده ایدن موسایه جلوه نور حق
سنده کشف ایتدی ترانی دن ندور منظور حق
عین حق اَرنی دِیَنده عین اوزون ای طور حق
اوز باشی اوسته گوروب ذکر ایلدی لمًا ترای
.
.
دشت ایمنده کلیمه اولدی نخله هم کلام
بو سببدن خلق ایچینده تاپدی عزّ و احترام
اولدی سنده نوک نِی مصداق واَلشمسه مقام
آیۀ کهفی تلاوت ایلدی کهف الوری
.
عالمی خلق اِیلینده خالق عالم سنی
ایلدی اوز محرم اسرارینه محرم سنی
رتبه ده عرش معلّادن سایوب اعظم سنی
سنده تاپدی کُنت و کَنزا اختصاصی انجلا
.
.
سن او یرسن علّت کونون مکانی سنده دور
بلکه کُونون عِلّتی امکان کانی سنده دور
کائِن بی علّتون سرّ نهانی سنده دور
ذات پاکین ایتموش اُول سرِّ نهانه خونبها
.
.
سندن اولدی کعبه نون خلقتده فطرت مایه سی
مشعرین سن سن صفاسی مروه نین پیرایه سی
سنده الحق کشف اولوب ذبح عظیمون آیه سی
فی الحقیقت سن مناسن آدلانوبسان کربلا
.
.
سنده عاشورا گونی ای کربلا فخر خلیل
ایلدی بیر حجّ تحسین ایلدی ربّ جلیل
ویردی یتمیش بیر نفر قربان تماماً بی بدیل
هر بیری اولدوقجا مذبوح ایلدی حمد و ثنا
.
.
عرض ایدوم قربانلاری آیا نجه قربانیدی
چرخ حُسنه هر بیری بیر کوکب رخشانیدی
بُرج فضّلنا ابوالفضله اوگون میزانیدی
عالمی دولدوردی نور عشقی کالبَدر الدّجا
.
.
اود دوتوب اودلاندی قلبیم دولدی اشک تر گوزه
آب نیسان تک گوزوم یاشی آخوب گوزدن یوزه
مُلَهم غیبی ویروب تغیّر بو یرده سوزه
رشتۀ مطلب چخوب اَلدن کلام اولدی سوا
.
.
مشک چگنینده علم اَلده او شیر مست جنگ
عرصۀ جنگی اوتوز مین لشکره ایتموشدی تنگ
ابن سعد امر ایلدی ایتسونله آماج خدنگ
سالدیلار بال و پرین اوخدان پر آچدی چون هما
.
.
بی حیا نوفل چکوب بیر گرز ووردی باشنه
کاسۀ سر سندی قان ممزوج اولوب گوز یاشنه
سسلدی آهسته قارداشسیز قالان قارداشنه
قاتلیم ویرمور اَمان اَدرک اَخاک یا اخا
.
.
بیر فدا ویردی منای عشقده اول عشقباز
جدّی اسماعیلدن آلموشدی خطِّ امتیاز
پاره پاره دوغرانان نعشین شهنشاه حجاز
باغرینه باسدی دیدی بَعدک علی الدّنیا عفا
.
.
قاسمه بیر طوی دوتوب طویدا قرا سالدی عروس
قرمزی مخمل گیوب بیر گوی گیندی سندروس
جامه چاک اولدی عطارد ایلدی پروین فسوس
ایمدیده ناهیدین اولموش بَزم عِیشی غَمسرا
.
.
حجّت حق ایلدی ناحقلره حجّت تمام
قویمادی بِالمرّه اهل باطله جای کلام
بیر قوزی قربانی ویردی اللّری اوسته امام
قالدی حیرتده ملک لر اولدی مبهوت اَنبیا
.
.
بو هامی قربانله اوز نفسنی قربان ویروب
سو کنارینده سوسوز ایستی قوم اوسته جان ویروب
محضر جاناندا دورت مین اوخ یاراسی سان ویروب
بُوالحنوقون اولدی تیری قلبده شقّه گشا
.
.
اوخ دگنده قلب عالم قلبنه سالدی نگاه
گوردی آچدی اوخ مکان لامکانه شاهراه
مقصدین گورجاق اوزون آتدان یره سالدی او شاه
قویدی توپراقه یوزون عرض ایتدی یا من لایری
.
.
من بوگون ایتدیم وفا سنله ایدن پیمانیه
عشقله عشوقنده مرجان تک بویاندیم قانیمه
شدّت ایتدیکجه بلا آلدیم بلانی جانیمه
دمبدم عرض ایلدیم ربّی رضیت بالقضا
.
.
ربّ العزّت سن، منه سن ویرموسن بو عزّتی
قویموسان ماهیتمّده ارتفاع همّتی
من فراموش اِیتمَدیم بو آن گنهکار امّتی
اَنت اولی بِالکرامه عهدیوه ایله وفا
.
.
طور صدقینده «طوری» آختاروردون بیر کلیم
حمد لِله مقصده تاپدون صراط المستقیم
بحر فیض حقّدن گتدون اَله دُرّ «یتیم»
ایلیوب بو دُرّدن «مشکوة» تحصیل ضیا
.
.
#کربلا_یتیم_تبریزی #کربلا_طوری_تبریزی
#کربلا_مشکوة_تبریزی #یتیم_تبریزی #طوری_تبریزی
#مشکوة_تبریزی
#کربلا_سنده_تجلا_ایلدی_وجه_خدا
#ترکی
#زبدةالاشعار
نظر دهید