ساقی نامه
.
✍️ #زبدةالاشعار ✍️
.
🆔: @nohe_torki
.
مرحوم میرزا محمد تقی قمری
.
کرم قیل ویر منه بیر جام روح افزادن اى ساقى
ایچوم سرمست اولوم اول بادۀ حمرادن اى ساقى
.
بهار ایامى گول فصلى آچیلمیش لاله و سنبل
چیچکلر سربه سر باش قُوزیوب صحرادن اى ساقى
.
عروسان چمن قیلمیش ثیاب زرله آرایش
حمل سلطانى خلعت پوش ایدوب دنیادن اى ساقى
.
ویروبدور تربیت بیر نوع ربّ النوع گلزاره
جهان مافوق اولوبدور جنّت اعلادن اى ساقى
.
زمرّد فام اولوب سطح زمین هرکیم گورن سؤیلر
ایدوبلر فرشینى استبرق خضرادن اى ساقى
.
گتورمیش رشح باران گلشنى بیرحاله که گویا
آچوب گوز دلبر نازک بدن رویادن اى ساقى
.
دیللّر نشئۀ اعلاده دور جنت بوگون امّا
ظهور جنّت ایتمیش عالم سفلادن اى ساقى
.
اولوب برگ درختان سایه گستر بیر صفا ایله
نشاندور فى الحقیقه سایۀ طوبادن اى ساقى
.
فضاى گلستان رشک ریاض باغ رضواندور
گچوبدور عطر زنبق عالم بالادن اى ساقى
.
قویوبدور چرخ نیلوفر آچوبدور نسترن جامین
که مالامال قیلسون ژالۀ معنادن اى ساقى
.
قزل گول تخته چخمیش باشه قویموش تاج شاهانه
لطافت آرتوروب خورشید نورافشادن اى ساقى
.
درخشاندور حجاب غیب گلبرگ ایچره ماءالورد
چو آب زندگى لعل لب اشهادن اى ساقى
.
رخ گل قرمیزى مى قرمیزى دلدار قرمیز رنگ
معاذ اللّه چکوم ال من بیله سودادن اى ساقى
.
دوزولموش عارض برگ گله دردانۀ شبنم
تماشاسى گچر دنیا و مافیهادن اى ساقى
.
دوزوب مشّاطۀ قدرت مگر خالی سفیدابى
رخ جانانه عطر جنّت الماوادن اى ساقى
.
تعالى الله آچوب شهلا گوزین نرگس خمارآسا
آلوبدور ناز تعلیمین بُت زیبادن اى ساقى
.
بسان غمزۀ تیزبتان شوخ غارت گر
آلور آرام و صبرى چکمز ال یغمادن اى ساقى
.
بنفشه سبزوریان خطّ محبوبان رعناتک
نموّ اتمیش عذار عارض غبرادن اى ساقى
.
ریاح روح ریحان روح ایچون راحت قرین اولموش
منى محروم قیلما، راح روح آسادن اى ساقى
.
دوتوبدور گل صباحى ساغرین الده صباحتلن
صبوح ذوق آلور صبح جهان آرادن اى ساقى
.
یتورمش حسنده گل جعفرى بیر صورت احسن
مجسّمدور مگر شمس فلک فرسادن اى ساقى
.
عروس پرده باشینا دواق لاله گون سالمیش
گچوردوب نازینى جنّتده کى حورادن اى ساقى
.
شقایق چادر گلنار چکمیش کوه و صحرایه
پر ایتمیش ارغوان جامین مى مینادن اى ساقى
.
زبان سوسن اولموش اوز دیلینجه ناطق گویا
ملاحت اورگنوب شوخ ملک سیمادن اى ساقى
.
نسیم صبحدم اولموش عجب دلالۀ نکهت
آلوب احیاى موت اذنین دم عیسى دن اى ساقى
.
سولار غلطان چمن ریان تماماً غنچه لر خندان
روا اولماز گچم من لذت دنیادن اى ساقى
.
بولود نیسان توکر گوگدن صدف درج دهان آچمیش
من آخر حسرتم بیر جرعه ویر صهبادن اى ساقى
.
ایدر گلشنده نوشانوش بلبل عشق جامندن
تمنّایه گَلَر گُل بلبل شیدادن اى ساقى
.
ایدوب شور و نوا قمرى ریاض عشق حیدردن
گوتورمز ال ئولونجه دامن مولادن اى ساقى
.
.
.
.
#حیدریه_قمری
#حیدریه_مدح #ساقی_نامه
#کرم_قیل_ویر_منه_بیر_جام_روح_افزادن_اى_ساقى
#ترکی
.
✍️ #زبدةالاشعار ✍️
.
🆔: @nohe_torki
نظر دهید