خروج از مدینه
ملاقات امام حسین (ع) با ملائکه و جنّیان
.
✍️ #زبدةالاشعار ✍️
.
🆔: @nohe_torki
.
مرحوم دخیل
.
صاحب ریاض المصائب و ریاض الشهادة جناب شیخ مفید اعلى الله مقامه یازار جناب امام محمدباقر(ع) بویوردی چون جدّیم امام حسین (ع) مدینۀ طیبه دن کوچ ایلدی بیر قدر یولی طیّ ایلمشدی بیر جمع بسیار ملائکۀ بهشتدن و بهشت آتلاریندان و مرکلریندن سواراولوب
سرور ابرار و امام اخیار حضورینه گلوب عرض ایلدیلر ای حجت خداوند ذوالاقتدار:
السلام علیک یا اباعبدالله یاحجة الله
.
.
که ای جلالتیله انبیایه شاهنشاه
گلوبله نصرته حزب خدا و جندالله
.
دوشوبله جنبشه ذرّات کاینات تمام
که اذن ویر اولالار ناصر امام انام
.
مقرّبین خدا قدسیان مجلس انس
بو آرزوده دی روحانیان عالم قدس
.
بوگون که والی سرمسند ولایت سن
عموم عالم ایچون حجّت ابن حجّت سن
.
بیزوق که جدّیوه ای شاه مسند ایجاد
بیزیله حق ایلیوب غایبانه چوخ امداد
.
جنابوه بوکومکلر گلوبدیلر یکسر
سنه کومک اولالار بو قدیم نوکرلر
.
مرخص ایتسون اگر دوتموشوق قرار سکون
ایدک ممالک امکان کونی کن فیکون
.
روادی گر اولا زیر و زبر زمان و زمین
قالا امانت حق امنیده امام مبین
.
نه باک گر اولا بو کاینات جمله تباہ
ولیک اولمیا غمگین دل ولی الله
.
مرخص ایت داغیداق اجتماع دنیانی
یتیشمسون سنه بیر ذرّه جه پریشانی
.
مواطن بیشماریده جدّ بزرگوارون جناب احمد مختارون اعوان و انصاری اولموشوق کومک ایله مشوک الأن بحکم پروردگار سنون نصرتوه گلمشوک هرنه امرایده سن مطیعوق و فرمانبرداروق اگر بویوروسان جمیع منازل لرده رکابونده اولاق و دشمنلرون شرّینی دفع ایلیک
.
///جناب امام حسین(ع) بویوردی:///
.
ملکلره بویوروب پادشاه حورو ملک
گیدون یروزده اولون ساکن قصور ملک
.
گرگ منه کومکه دردیمی بیلن گلسون
که نصرت ایلمگه ئولدوروب ئولن گلسون
.
اودور منیم کومگیم من ئولم گله یاسه
دوتا همیشه عزا اکبریله عباسه
.
منه کومک ایدن آهیله جگر داغلار
حسین آدین ایشیدنده حسین دیر آغلار
.
اولور منیم کومگیم غصّه دن بوعالمده
باتار قرایه بولود تک مه محرمده
.
کومک اولان منه دنیاده دینینی ساتماز
اوزینی راحت ایدوب رختخوابیده یاتماز
.
چکر منیم کومگیم دایم انتظار حسین
قولاقینه یتیشه تا نه وقت جار حسین
.
بنا ایدنده عزاخانه تعزیه داران
بهشته اولسا گورر اولدوقی یری زندان
.
من شهیده اولان کیمسه قلبدن مشتاق
نجه اولورکه چکه مجلس عزادن ایاق
.
اولور منیم کومگیم تا ئولونجه تعزیه دار
دیر ملائکه لر السّلام یا انصار
.
بیری قویوب منی دنیاسین ایستیه نه دیمک
منه کومکدی و یا اینکه دشمنیمه کومک
.
گیدون مقاموزه چون آه بیقرار چکون
اولون عبادته مشغول انتظار چکون
.
.
حضرت بویوردی قایدون اوز مقاموزه سیزیله منیم وعده میزبقعۀ نینواده زمین کربلاده او همان سرزمین دور که او مقامده شهید اولاجاقام بوردان کربلایه کیمی بیر ضرر متصوّر دگل هرنه اللهون رضاسیدور او اولاجاق منده اوزوم اونا طالبم و اللهون رضاسینه راضیم
.
گر صد بلا به جان من آید زهرطرف
گویم که چون زدوست بُود سر به سرنکوست
.
اوز مقاموزه رجعت ایدون مشغول عبادت اولون اما عاشوراگونی کربلایه گلون
.
او گونکه گون دوتولار عالم انقلابه دوشر
مهیب یللر اسر عالم اضطرابه دوشر
.
گلور بو سس که دوتار دهری ماه تا ماهی
شهید ایلدیلر تشنه حجّت اللهی
.
فلک لر اوسته دیر جبرئیل عرش مقام
اَلأ لِقَد قُتِلَ الإِمامِ اِبنِ اِمام
.
دایانمیون او زمان دشت کربلایه گلون
قرا علملر آچون زینبه عزایه گلون
.
گلون یریمده اولان اوغلومون زیارتینه
باشیم جدایه گچن وقته سرسلامتینه
.
ایدلّه هر چه منه ظلم و جور دویمازلار
که یاس ساخلاماقا اهلبیتی قویمازلار
.
گلنده نالیه زینب ایدنده غملری جوش
وورالا باشینه قمچی که اولگلان خاموش
.
اولون او دمده باجیم زینب غریبه کومک
دوتون عزا آنالار باجیلار حرملر تک
.
قویولّا اوچ گونه دین لشکر جفا بنیان
یر اوسته گون کیمی آی تک بدنلری عریان
.
اگرچه اولمیاجاق نعش بیکسانه کفن
ایدون قنادلاروزی اکبر جوانه کفن
.
مخدرات رسولی ایدن زماندا اسیر
غریبلوق چوخ ایدر اهلبیته چون تأثیر
.
حرملرون أؤزولور چون الى وصالیمدن
کومک اولون منه آیرلمیون عیالیمدن
.
مریض اوغلوما همراه اولون اولور دلسوز
خرابه لرده اونی قویمیون قالا یالقوز
.
ملکلر گتدیلر اما عاشورا گونی کربلایه گلدیلر که تپراق کل عالمون باشینا توکلمشدی او حضرتی شهید ایلمشیدیلر ملکلر بو حالی گورنده و او مظلومین یارالی نعشنی تپراقلار اوسته مشاهده ایلینده بیله نالۀ واحسینا ایلدیلر که زمین و زمان لرزیه دوشوب بو احوالاتی گورنده آغلیا آغلیا گوگلره رجوع ایلدیلر خداوند یکتا درگاهنه عارض اولدیلار عرض ایلدیلر پروردگارا تکلیفمز ندور حضرت کبریادن مأمور اولدیلار فرمان یتشدی گیدون منیم حسینمون قبرینه مجاور اولون ملکلر قایتدلار قیامت گونونه کیمی قبر مطهّرون باشینا دولانون و مجاور اولون و زوّاری پیشواز ایلیون و ایولرینه قیدنده مشایعت ایلیون و ظهور قائم علیه السّلامده او بزرگواره نصرت ایدون خلاصه امام الموحّدین حضرت اباعبدالله الحسین چون بیر قدر یول طی ایتمشدی مفید علیه الرحمه یازار و صاحب ریاض الشهادة نقل ایدر:
.
گلوب حضورینه افواج نار نورانی
جنود غیب خدا جنّیان رحمانی
.
که ای امام زمانه ولیّ ربانی
قدوم پاکوه قربان بو جنّی لر جانی
.
بویور که ایلیک اعدای اهلبیتی هلاک
قیلاق یر اوستونی ناپاک جسملردن پاک
.
بویوردی شاه فلک چاکر ملک دربان
که ای هیاکل جنّ و امائل انسان
.
اشعه دور هامی عالم ولید و مثل سراج
دگل ولیّ مولیّ علیهنه محتاج
.
غلامیدور هامیلار بیر امامیدور آزاد
نجه غلامیدن آزاد ایلر استمداد
.
تمام مالک چون مالکان ارض و فلک
امامه ایلدی افغان حور و جن و ملک
.
امام نورینی شمس و قمر ایدوب اشراق
او شمه ظلمدور یکسر هیاکل آفاق
.
او وقته سایه ایدر قرص آفتابه مدد
که متحد اولا مخلوقدن خدای احد
.
منه او کیمسه ایدر اطاعت برحق
که نفسنی ایده مطلق قیودیدن مطلق
.
او شخص عادل ایدر طاعت من مظلوم
که مندن اوزگه نی وجداندن ایده معدوم
.
منه کومک اولان ایلر یزید نفسین هلاک
یزید حکمی ایله پیکری اولور صدچاک
.
اولا کومکلیگمه هرکیمون تمناسی
اگرچه ئولدوره اولماز ئولنده پرواسی
.
منیم هوامیله هرکیمسه نینوایه گلور
دلوک دلوک بدنی نی کیمی نوایه گلور
.
کومک اولان منه قورخماز سنان وخنجردن
گچنده اوخ کیمی خنجر غلاف پیکردن
.
///جن لر دئدیلر///
.
بیزیم اعانتمزدن گل اولماسن مانع
که نفعی یوخ سیزه اما بیزه اولور راجع
.
بیزی بو خاطره خلق ایلیوب خدای انام
که نور گونگیمی بالذّات أولان معین أمام
.
///امام بویوردی///
.
خیال ایتمیون اصرار بی سبب ایدرم
گیدون سالون منى الدن من ئولمگه گیدرم
.
بلایه طالب اولور عاشق وفاگستر
نه وقت خداسی اولان جنّدن کومک ایستر
.
نه احتیاج سیزه ای گروه مهر سیر
هنوز وار کومکیم ئولمیوب علی اکبر
.
جهانی دشمن اگر دولدورا یوخومدی هراس
آتام علی کیمی وار قارداشیم رشید عباس
.
کومک لیگ ایتمگه چوخ یار مهربانیم وار
که قارداشیم یرینه قاسم جوانیم وار
.
اوخ آتسالار منه چوخدور ائدن اوزونی سپر
ویرور قباقه بوغازین سوسوز علی اصغر
.
نه قدری دردیم اولا یوخ غمیم طبیبیم وار
جوانلاریما کمک بیر قوجا حبیبیم وار
.
نه باک منتظر قتل شمر بدخودور
که فال خیر منه اَینَما تَکونودور
.
ید تعدّی امام مؤیّده اولماز
حصار موته بروج مشیّده اولماز
.
امام اوزینی کنار ایلیه مقابلدن
نجه تمیز تاپار دین حق باطلدن
.
امام ایلسه خلقه دین حق تکلیف
قالولّا پردۀ پندارده خفیف و کثیف
.
اولور کلام غلط حرف حقیله تصحیح
مرجّح اولماسا باطلده بی سبب ترجیح
.
دلیل صدق کلام النبیّ اولادور
امام غالب و قاهردی چونکه مولادور
.
محالیدور اولا امر امام عذریله رد
ممرّ سیلی خس و خاک خار ایتمز سد
.
امام قاطبۀ ماسوادن اعلادور
غلامدور هامی والا امام مولادور
.
مناسب اولمادی چون مکه و حجاز و یمن
منیم اوزومه مناسب واریمدی بیر مدفن
.
اگر جوابیز اولا بو متین جواب لره
ایدون مطالعه گوگدن گلن کتابلره
.
قیلان زماندا قبور ائمه نی منصوص
اولوب الست گونی کربلا منه مخصوص
.
دیوبدی بو سوزی موسایه نخلۀ ایمن
که کربلادی او وادیده نخلۀ ایمن
.
حقیقتاً منه زائردی انبیای کبار
اولوب او بقعه ده کشف غوامض اسرار
.
محمدی ایده جک مهد موسوی تجدید
قولاقینه یتیشن وقته آیۀ توحید
.
نچونکه نخلۀ وحدت چخوبدی باغیمدن
درون بومیوه نی روشن چهل چراغیمدن
.
اگر او بقعه ده من یاتمیام به ناله و آه
نه وقت اولور که اولا کربلا زیارتگاه
.
گرک او تپراقا قایم ویره جلای صفا
ایدم مریضلره تربتیمی خاک شفا
.
او برده قانیم ایدر جوش قانلار ایلر جوش
چکر منیم آدیما چار کربلا چاوش
.
او یرده قزلاریمی چونکه شمر غارت ایدر
گلور همان یره عورت اوشاق زیارت ایدر
.
گرک منیم قورالار یاسیمی رواقیمده
ئولنلریم اولالار دفن اوز جواریمده
.
گرکدی آغلیالار شیعه لر مزاریمده
که آغلیاندا اولا یوزلری ایاقیمده
.
او چولده بیزلره ویرمز امان شمر وسنان
که شیعیه اولا دنیا و آخرتده امان
.
گردی اکبریمون بیکفن قالا بدنی
جوانلارا یتیشه تا که کربلا کفنی
.
گلنده نالیه هل من معین هرایه گلون
همین بو لشگریله دشت کربلایه گلون
.
گلنده سیز گوره سوز قانیمه منى غلطان
گیدوب قبا و عمامه بدن قالوب عریان
.
ایدوب سپاه جفائیله دشتی مالامال
قیلوبلار آتلار ایاقنده نعشمی پامال
.
اتیم قانیم سوموگوم تپراقیله یکساندور
سبب بودور که امام اهل عالمه جاندور
.
سالوبدیلار اوزیمی آفتاب تابان تک
جوانلارون بدنی کوکب درخشان تک
.
یخوبلا قارداشیمی سیندیروبدولار بئلیمی
نه قارداش اوغلی نه قارداش قیروبدلار ائلیمی
.
.
.
#خروج_مدینه_دخیل
#که_ای_جلالتیله_انبیایه_شاهنشاه
#ترکی
.
✍️ #زبدةالاشعار ✍️
.
🆔: @nohe_torki
نظر دهید