زبانحال حضرت صدیقۀ کبری (ع) بسر حضرت سیدالشهدا (ع)
.
✍️ #زبدةالاشعار ✍️
.
🆔: @nohe_torki
.
مرحوم سعدی زمان
.
کوللّر اوسته یاتما ای شاهنشه بطحا اوغول
بو بلالی باشیوه قربان آنان زهرا اوغول
.
.
دور اوغول گل سینمه یاتما کول اوسته نازیله
بو آنان زهرایه خوش گلدون ایت اعجازیله
وار بلانین اُلفتی هر عاشق جان بازیله
چوخدی باشوندا سنون درد بلا امّا اوغول
.
.
کوفه نی بو قانلو باشون ایلیوبدور رشگ طور
نوریله مطبخ سرانی ایتموسن مشکوة نور
بو اَنَالحَقدَن دوتوب موسی کیمی زهرانی شور
منزلون مطبخدی یا کیم وادی سینا اوغول
.
.
سینم اوسته بسلمشدیم باشوی عزّتله من
کوللر اوسته ایندی ننوعی گوروم ذلّتله من
بُلمورم باشه ووروم داد ایلیوم حسرتله من
یا توکوم رخساریمه گوز یاشی چون دریا اوغول
.
حق رضاسینده قضایه گرچه سن ویردون رضا
حالوه لیکن یانار آغلار ، تماماً ماسوا
چرخ چارمده توکر گوز یاشینی ایلر نوا
واحسین سویلر دمادم حضرت عیسی اوغول
.
.
بو حقارتله سنی گورسون نجه زهرا آنان؟
آز منی یاندور دور ایله حالوی بیر بیر بیان
باشیوی کیم کسدی کیم حُلقوموه وردی سنان
حالوه رحم ایتمدی آیا ندن اعدا اوغول
.
.
حالوه باخدوقجا اودلانّام مَنِ خونین جگر
کیم ووروب آغزوندان اوخ ایله بیان ای خوش سِیَر
ویرمدون جدّون نشان قوم ستمکاره مگر؟
اهل شام و کوفه ایتدی بیر بیله ایذا اوغول
.
.
کیم قویوب باشون کول اوسته کول دوتوب گل صورتون
رحم سیزدور میزبانون هتک ایدوبدور حرمتون
تک قالوبسان بس ندن هاردا قالوبدور عترتون؟
زینب خونین جگر بس هاردادور آیا اوغول؟
.
.
حشره تک آخسا گوزومدن وار سرشک تر یری
کیم گوروب بیر باشدا اولسون بیر بیله خنجر یری
خانۀ زنبور تک اولموش مشبّک هر یری
بو باشوندور بس قالوب نحالته اعضا اوغول؟
.
.
ایمدی گوردوم کربلا دشتنده قانلو پیکرون
جزو جزو اولموشدی قرآن تک وجود اطهرون
ساربان کسمشدی ظلمیله بیلکدن اللّرون
لاله تک قاندان دولیدی دامن صحرا اوغول
.
.
قلبیمه اول ظالم اود ووردی اولوب قلبیم کباب
قویمادیم تک نعشوی گیتدی الیمدن گر چه تاب
اولقَدَر دوزدوم جنازون اوسته تا گلدی رباب
گورجک اول احوالی چکدیم بانگ واویلا اوغول
.
.
کربلاده ایلمیشدی عالَمِ محشر قیام
بیر یانان خرگاهده آغلاردی اطفالون تمام
ناله ایلردی بنات حضرت خیرالانام
یردن اوج ایتمشدی عرشه شیون و غوغا اوغول
.
.
توپراق اوستنده سیزیلدیردی بنات بوتراب
یاقدوروردی خشک لبلر گوز یاشی مثل سحاب
بیر طرفده اصغره اوخشوردی آغلوردی رباب
بیر طرفده سسلنوردی وای اوغول، لیلا اوغول
.
.
حشره تک سرمایۀ غمدور منه بو مسئله
آغلارام قان ظلم جمّاله جفای بجدله
هم سنون هم اوغلوم عبّاسین الین آلّام اله
حشرده بیر اوزگه محشر ایلرم برپا اوغول
.
.
توک «حسینی» گوز یاشون آغلا حسینه صبح و شام
آغلاسا دنیاده هر کیمسه حسینه یوخ کلام
جسمینه محشر گونی دوزخ اولور بِالله حرام
یا آنا ایلر شفاعت مجرم اولسا یا اوغول
.
.
.
#تنورخولی_سعدی_زمان
#شام_غریبان
#چهارده_معصوم_حسینی ص 77
#کوللر_اوسته_یاتما_ای_شاهنشه_بطحا_اوغول
#ترکی
.
✍️ #زبدةالاشعار ✍️
.
🆔: @nohe_torki
نظر دهید