شرف عالم امکان
.
✍️ #زبدةالاشعار ✍️
.
🆔: @nohe_torki
.
سدید هریسی
.
کیم دئسه من دئمرم شاه خراسان دی رضا
آزدی شأنینده دئسم رهبر ایران دی رضا
خبر آلسان دییرم شأنیده اجدادی کیمی
افتخار و شرف عالم امکان دی رضا
.
.
آستانینده نه شاهلار کی اونا نوکریدی
کؤلگه سی جمله سلاطین باشینا افسریدی
شیعه لر اؤلکه سینین شاهلارینا سروریدی
فخر ائدر شیعه کی سلطانلارا سلطان دی رضا
.
.
دئمیرم تکجه آقا شیعه لرین سروری دیر
بلکه دنیا بویی آزاده لرین رهبری دیر
آدی گؤی لرده ملائک دیلینین ازبری دیر
یئرده گؤیده هامیا حجّت یزدان دی رضا
.
.
دئمیرم گؤی ده کی اولدوزلارا بنزردی آقا
یا گوزل لیکده فقط ماه منوّردی آقا
گؤن کیمی سانما ایشیق لیقلارا مظهردی آقا
حُسن سیماده اولارداندا درخشان دی رضا
.
.
او زماندان کی قدم قویدی خراسانه آقا
شرف آرتیردی بوتون کشور ایرانه آقا
آمّا افسوس عؤمور سؤردی غریبانه آقا
بو سببدندی کی غمخوار غریبان دی رضا
.
.
یئراؤزونده ائوی جنّت، قاپوسی باب نجات
صحن پاکیندا آخار چشمه لری آب حیات
حرم اطهری سرمنشأء خیر و برکات
اؤزؤده صاحب الطاف فراوان دی رضا
.
.
هر سحر صحن و سرای حرمه ایله رجوع
شاهد اول گور نئجه هر گؤن گونش از باب خضوع
گنبدیندن اؤپر ایستر آقادان اذن طلوع
شمس آفاق ولا آیت قرآن دی رضا
.
.
من خراسان دا ئؤلندن صورا دفن اولسام اگر
نیلیرم جنّتی ای واعظ فرخنده سیَر
آقامین تربتی مین روضهٔ رضوانه دَیَر
بو قوجا نوکر نالایقه جانان دی رضا
.
.
ثامن الحجّة حق شافع یوم عرصات
بِیتَهُ جَنَتهُ فِی الارض و یُجیب الحاجات؟
اُذکُرو اِسمَهُ فی المَجلسهُ بِالصَلوات
حاجتین ایله بیان صاحب احسان دی رضا
.
.
شهر یثربدن ائدن گؤن حرکت طوسه طرف
واقف ایدی کی سرانجام شهادت دی هدف
وصل جانان اؤره گینده یارادیب شوق و شعف
دئمک اولمازدی کی باطنده پریشان دی رضا
.
.
گر چه آسان دگیل انسانه بو نوعیله سفر
سفری کی اولا او شخصه یقین جانی خطر
او خطر اولمادی باعث کی ائده صرف نظر
اهل یثرب گؤروب عزمینده شتابان دی رضا
.
.
وقت اووقت اولدی کی دؤشسون یولا غم کاروانی
آلدیلار دؤره سین اهل حرم ربّانی
بدرقه ائتدیلر آغلار گؤزوله مولانی
آیریلان لحظه ده نار غمیله یاندی رضا
.
.
اهل بیته بویوروب شال عزا باغلیالار
آلالار دؤره سینی اوخشیالار آغلیالار
باجیلار داغ فراقیله اؤرک داغلیالار
اؤز عزاسین سوؤوب اوندان صورا یوللاندی رضا
.
.
چون خراسانی توطّن ائدیب او نیک سیَر
کل ایران ائلییب بیعت اونا سرتاسر
حاکم وقت او سبب دن ائدیب احساس خطر
ظنّ ائدیب سلطنته موجب خسران دی رضا
.
.
عاقبت نقشۀ شومین ائدیب اجرا او پلید
حجّة اللّهی ائدیب زهر جفائیله شهید
ابدی لعنت اولا مأمونا مین باره «سدید»
وار امیدیم کی عذابی اولا عقباده شدید
.
.
#رضویه_سدید_هریسی
#رضویه_مدح #رضویه_شهادت
#کیم_دئسه_من_دئمرم_شاه_خراسان_دی_رضا
#ترکی
.
✍️ #زبدةالاشعار ✍️
.
🆔: @nohe_torki
نظر دهید