زبانحال حضرت سکینه به راس مطهر حضرت علی اکبر (ع)
.
.
.
مرحوم طوری تبریزی
.
.
گرچه غم عشقون سالوب
بو باجیوی دلدن علی
سالماز مبارک اسمیوی
بیر آن باجون دلدن علی
.
.
مدّتدی شمع حسنیوه پروانۀ عشق اولموشام
اول نرگس مستون کیمی مستانۀ عشق اولموشام
آخِر گورورسن سن اوزون دیوانۀ عشق اولموشام
ویر بوینوما زنجیر ایدوم بیر تار او کاکلدن علی
.
.
توکمه قرا زلفون یوزه ایتمه پریشان گوگلومی
زلف سیاه اوسته علی قیلما قزل قان گوگلومی
زلفون یوزوندن ردّ ایدوب شاد ایله بیر آن گوگلومی
بیله اوساندورما باجون بو ناتوان دلدن علی
.
.
هردم توکر باد صبا زلفون یوزه سنبل کیمی
آشفته حال اولّام علی سولّام سارالّام گل کیمی
شوره گلور گوگلوم قوشی چک چک وورا بلبل کیمی
بیر آن گوتورمز گوز گوگل مرغی او سنبلدن علی
.
.
تاپشور صبایه دگمسون الله رضاسی زلفیوه
گوگلوم تیکوب گوز ای گوزوم نور و ضیاسی زلفیوه
قورخوم بودور دگسون صبا یتسون جفاسی زلفیوه
روحیم بدندن آیریلور آیریلسا تل تلدن علی
.
.
عاشق گرک عشقین یولون طیّ مراحل ایلیه
امّید وصلی لُجّۀ هجرانه ساحل ایلیه
آخِر گیچه جاندان، اوزین جانانه واصل ایلیه
واردی منیمده مطلبیم طیّ مراحلدن علی
.
.
بزم محبّت مجلس خلوت یاتوب اهل مجاز
دوشمز بیله فرصت اله، گل ایلیاخ راز و نیاز
قان اولدی باغریم غنچه تک، دیندیر منی چوخ ایتمه ناز
ناز ایلماخ وقتی دگل، فرصت گیدر الدن علی
.
.
لوح ضمیریمده چکوب نقّاش قدرت نقشیوی
کلک خیالیله قیلوب چوخ طرفه زینت نقشیوی
دلده مجسّم ایلرم ای ماه طلعت نقشیوی
آلّام وصالون فیضینی شکل و شمایلدن علی
.
.
دنیاده یوخدی من کیمی حسرت قالان یار آیریسی
اولدوم منِ بیچاره بو عالمده دلدار آیریسی
بیر بلبل شوریده ام مدّتدی گلزار آیریسی
گور بلبلون حالی نولور آیری دوشه گلدن علی
.
.
سندن صورا قارداش علی دنیاده هر آن آغلارام
قورتولسا گوزیاشیم اگر باشه ووروب قان آغلارام
صبح آغلارام، شام آغلارام، تا جاندا وار جان آغلارام
گوزیاشلی جان ویرّم قوری یرده بو نسگلدن علی
.
.
#طوری دوشوب گرچه ایشون بو شهر ایچینده مشکله
صبر ایله دلتنگ اولما چوخ ایله بلایه حوصله
آغلا صمیم قلبیله، صدقیله آل خامه اله
یاز یا امیرالمؤمنین قورتار بو مشکلدن علی
.
.
#کوفه
#راه_شام
#گر_چه_غم_عشقون_سالوب_بو_باجیوی_دلدن_علی
#طوری_تبریزی
#ترکی
#زبدةالاشعار
نظر دهید