پندیات و شهادت حضرت علی اصغر (ع)
✍️زبدة الاشعار✍️
?: @nohe_torki
محمد هدایتی تبریزی
گر معرفتی اولماسا انسان نَیه لازم
درک ایلمه سه انسانا قرآن نَیه لازم
عُجبون یوخوسوندا یاتان حقّا کی آیلماز
انزار ایلیب مینلر آیلدان نَیه لازم
اولسان گجه لر قائم و گوندوزلری صائم
قلبنده اگر یئر سالا شیطان نَیه لازم
یئر ایلمه سه ریشهٔ ایمان ئورگونده
ایمان نَیه لازمدی مسلمان نَیه لازم
ایمان گتیرنلر، دئیر الله گتیر ایمان
مؤمن کی اولا ناقض پیمان نَیه لازم
کج باخماقی ترک ائت کی بویوک جرم و خطادی
بد ظنّ له مؤمن لره باخسان نَیه لازم
بیلسن ئوزووی شیعه خضوعین گرک اولسون
بیلسن ئوزووی یاخشی عوامدان نَیه لازم
قرآن اوخویوب بیلمیه سن نه اوخویورسان
بئش یوز ساعات آیدا اوخویورسان نَیه لازم
بد خُلقه نه لازم اوخویا خُلقاً عظیما
صوت خوش و گیرائی الحان نَیه لازم
اجری باراک الله دی اگر صوتی خوش اولسا
فخّاری و عُجب و لب خندان نَیه لازم
سعد اوغلودا قرآنیله مأنوسیدی بیر عمر
قرآن اوخویوب توکدی ناحاق قان نَیه لازم
شمر و شبث و حرمله قرآن اوخویاردی
قرآنه ولی آتدیلا پیکان نَیه لازم
ایوای ستم حرمله دن یاندی ئورکلر
نامرد ایلدی ظلمده طغیان نَیه لازم
پیکانه نشان ایتدی علی اصغرین حلقین
چالدی ال ایاق طفل لب عطشان نَیه لازم
(اوچ شعبه لی اوخ حلق علی اصغری بیچدی)
(اصغر سوسوز ، اوخ دا سوسوز ، اصغر قانین ایچدی)
اصغر بوغازی نازک ، اوخون پرلری برّان
بیچدی قولاقیندان قولاقا ناوک پیکان
بیر دیسگنیب آچدی گوزونی باخدی امامه
آغزین یوموب آچدی بالا ، آغزیندان آخیب قان
بیر یاره دَین قوش کیمی چالدی ال ایاقین
گوزلر دَوَران ایلدی آخدی باشی دالدان
شه گوردی بالا جان وئریری اللری اوسته
فکر ایلدی چکسین جان آلان تیری بوغازدان
چکدی اوخی ، الله بیلیر امّا نجه چکدی
اوخ چخدی یئریندن قان آتیب اولدی یوز الوان
اوجوندا دوتوب آتدی او قانی گویه ساری
عرض ایلدی ای منطقم ، ای خالق منّان
الله بالامی اوخلادیلار اللریم اوسته
دردین ده بیان ایلمه دی بو قوزی قربان
چالدی ال ایاق اللریم اوسته بالام ئولدی
غنچه دوداقی اولدی بوغازی کیمی خندان
باخدیم ، بالامین اللریم اوسته گوزی آخدی
یاندیم بالامین حالینه ، الله یانا عدوان
الده قانین آتدیم گویه سن ساخلا امانت
ویر حرمله نین کیفرین ای خالق دیّان
یوخ بیر کسیم الله بالامی آلسین الیمدن
سندن صورا کیمدی منه یار ای حق رحمان
سن صبریمی آرتیر بو بلاده منیم الله
آوار بلا اولدی بلالی باشا ویران
نه ساغدی علی اکبر آلا اصغری مندن
رؤیت ایلیوب حلقین ، ئوپه اوخ یاراسندان
نه ساغدی یامان گونده الیمدن دوتان عبّاس
آلسین بالامی الدن او سر زمرهٔ خوبان
(گوز یاشی گوزوندن یوزه جیحون کیمی آخدی)
(گویا دولانیب علقمه نین سمتنه باخدی)
گلدی دله دردین ایله سین قارداشا اظهار
سسلندی کی ای غم گونی قارداشنه غمخوار
غم غصّه حصارنده اسیرم سنه قربان
اوخلاندی علی اصغر الیمده خبرین وار؟
قالمش الیم اوسته بالامین پیکری قارداش
یوخدور آلانیم محنت ایدیر روحمه آزار
اوخ بیچدی قولاقدان قولاقا اصغرین حلقین
قانین بالامین ایله میشم زینت رخسار
گلمیر سسی قارداش سو غمین باشدان آتیبدی
حلقینده کی قانلی یارا قرمز گوله اوخشار
عشقی گوله گلمشدی اودور کی اوخا گولدی
غنچه دوداقندا گولومون گل آچیب انگار
عطشانیدی اوخ سو یوخودی قان ویریب اصغر
خونخوار اوخی سیراب ایلدی طفل لبن خوار
روحی پر آچیب اوچدی سیزین روحوزا ساری
قالدی قوجاقمدا منه ده پیکر خونبار
ئوپدوم یاراسیندان دوداقیم قانه بویاندی
گوردوقجا یارالی بوغازین محنتیم آرتار
بیر کیمسه کمک یوخدی آلا اوغلومی مندن
میداندا اودور کی گیدیرم صاق سولا ناچار
اصغر داغی اکبر داغینین اوسته چکیلدی
دونسون فلکین چرخی چکیب سینمه داغلار
گلمیر یوزوم اخیامه آپارماقه بو طفلی
آخر آناسی گوزلری یولدا قالیب آغلار
گورسه آنا اوغلوندا یارا طاقت ایدنمز
بیرده بالالار گورسه علی اصغری قورخار
بیچاره رباب حقلیدی گر غصّه دن ئولسه
اصغر اونا ، او اصغره وابسته دی بسیار
(درد دیلینی ذکر ایلدی قلبی بوشالدی)
(گوزیاشلی دونوب خیمه لره ساری یول آلدی)
زینب گوروب اول حضرتی خونبار و پریشان
عرض ایلدی چوخ غم یئمه زینب سنه قربان
کیم اوخلادی بو طفل لبن خواری الینده
بو سودامرین قانینه سنده بویانیبسان
دلسیز بالیا ویردیله سو اوچ پر اوخیلا ؟
سیراب اولوب اوچ پر اوخولا نوش ایلدی قان
نازک بوغازا تیر سه شعبه نَیه لازم
الله نیه بس دؤنمه دی بو گردش دوران
قارداش منه ویر اصغری اولما بئله دلگیر
چوخ آغلاما یاندرما منی ای شه عطشان
ویر من آپاریم اصغری بیچاره ربابه
بو غنچه گلی اوخ ستمی ایلدی خندان
بیلمم دوزه جاق گورسه بالاسین بئله پرپر
یا غشّ ایده جاق خیمه ده اول سرور نسوان
سن صبر ویر الله ئورگی داغلی ربابه
دوزسون بو غم اعظمه اول بانوی شایان
شه دن بالانی آلدی خانم دوندی یول آلدی
اخیامه طرف دوشدی یولا گوزلری گریان
ئوز دوتدی ربابه دیدی گل اصغری گتدیم
قرمز گل آچیب گل بوغاز ئونّوک قانا الوان
گل ، اصغریوی قانیله سیراب ایلیب لر
گل ، زینت آغوشون اولوب قانینه غلطان
گل آل بالاوی باغریوا باس ایله نوازش
حنجر یارادی باش اؤزولور ، اینجییب اوخدان
غم چکمه صؤدون یوخدی ، صؤده یوخدی نیازی
سو فکرینی سؤد فکرین آتیب اولما پریشان
خردا بوغازین یاره سی چوخ چوخ بویوک اولموش
یوخدور قالانی صاف یری بو خردا بوغازدان
(آلدی آنا اوغلون ولی بیلمم نجه آلدی )
(تا دوشدی گوزی اصغرینه سولدی سارالدی)
سسلندی کی ای قانینه غلطان بالا لایلای
قربانیِ جانان قوزی قربان بالا لایلای
ای سو یرینه قانین ایچن صؤدامر اوغلوم
اوخ ذبح ایلین باشنی جان جان بالا لایلای
ای رتبه سی اکبر آدی اصغر آنان ئولسون
ای یوز گوزونون زینتی آلقان بالا لایلای
باغلیدی الین زحمته دوشدون ننه قربان
نازک بوغازی ذبح اولان اوخدان بالا لایلای
بیچمش قولاقندان قولاقا حلقوی پیکان
حلقی بییچیلن طفل لب عطشان بالا لایلای
اوخ حلقوی بیچمش توکولور قان دهنیندن
قونداقی اولان قانیله الوان بالا لایلای
چوخ آرزیلاریم واریدی یأسه بدل اولدی
اوخ ایتدی منی بی سرو سامان بالا لایلای
ای سینه گولوم سینمه اوخ داغوی چکدی
اولّام سنه عمروم بویی گریان بالا لایلای
اولمادی دلین دردیوی ابراز ایلییدین
ناله چکرم ایلرم افغان بالا لایلای
نه دردوی بیلدیم نه ده درمان اله گلدی
اوچ پر اوخ ایدن دردینه درمان بالا لایلای
یاننام ، آناوا گولمدین امّا اوخا گولدون
وای تیره گولن لبلری خندان بالا لایلای
لایلای ئورگیم بندی ، گوزوم نوری ، عزیزیم
عطشان دله قربان دل سوزان بالا لایلای
سینم آلشیب یاندی گوروم حرمله یانسین
قلبیم دؤیونور باغریم اولوب قان بالا لایلای
آخر نییدی جرمی (هدایت) بو بالانین
اوخلاندی ، آنا ورد ایدیب هر آن بالا لایلای
#پندیات
#اصغریه_شهادت #اصغریه
#گر_معرفتی_اولماسا_انسان_نیه_لازم
#هدایت_تبریزی
#ترکی
✍️ #زبدةالاشعار ✍️
?: @nohe_torki
نظر دهید