عید قربان ……
.
✍️ #زبدةالاشعار ✍️
.
🆔: @nohe_torki
.
ستار رزاقی تبریزی
.
گلدی اِبراهیمه الله جانبیندن بو نِدا
تا منای عشقیده ائوز اوغلونی ایتسون فَدا
.
گوردی وقت امتحاندور ، وقت ایثار و جَهاد
اِیلیه لازمدی راه حَقده ائوز دِینین اَدا
.
اولدی بو اَمره مُصَمّم اول نَبیّ کردگار
تا ائوزوندن حَضرت جانانینی قیلسون رضا
.
چون بولوردی عاشق صادق مَقام عشقیده
هَر بَلایه صَبر ایدر چیخماز دلیندن حَرف لا
.
اوغلی اسماعیله مَخلَص اَمر حَقّی آندیروب
اِیلَدی آگه نَدور حُکم خُدای ماسوا
.
تا ایشیتدی بو سوزی اول نوجوان با اَدَب
بو اِللهی امتَحاندان ذَرّه جه ایتموب اِبا
.
عرض ایدیبدور سَن نه اَمر ایتسن او اَمره تابِعَم
دِلخوشام اِجرا اولا حَقّیمده فَرمان خُدا
.
مَحضَر جانانیمه بَذل ایتماقا بو جانمی
جان و دلدن راضییَم ای سَروَر اَرض و سَما
.
سَن آتامسان ،هم خدای عالمینه سویگُلی
واجب الاجرادی اَمرون ایتمَرَم چون و چرا
.
تا گوروب حضرَت ، اوغولدا وار بِله شور و نشاط
باسدی آغوشه او مَه سیمانی سویلوب مَرحَبا
.
سَن مَنیم بَند دِلیم ،آرام جانیم سن اوغول
سَنله عُمروم گلستانی دَهریده تاپمیش صَفا
.
اول مُهَیّا تا منای عشقه باهَم عَزم ایداق
لیک گیزلَت بو سوزی هاجَردَن ای کان وَفا
.
چون اگر هاجَر آنان مَطلَبدَن اولسا باخَبَر
روز و شَب درد فراقوندان ایدر داد و نَوا
.
چیخدیلار مَنزلدَن اول دِلدادَگان سَرفَراز
هَر ایکی عاشق اولوبلار عازم کوه مِنا
.
تا منای عِشقه ابراهیم اولدی رَهسپار
نِچّه یِرده گلدی شیطان حَضرتی ایتدی صدا
.
تا خَلیل اُللهی عشقون جاده سیندن آزدیروب
مُنحَرف ایتسون مَسیر حَقّیدن اول بی حَیا
.
آنّاموب لاکن او مَلعون، عاشق شوریده سر
جان ویرَر اولماز وَلی راه حَقیقتَتدَن جُدا
.
ایلیوب حَقّه تَوَکّل قوغدی الله دُشمنین
نَقشه شیطانی کامل ایلییبدور بَرمَلا
.
سَسلدی گیت ای قوغولموش دَرگه مَعبودیدن
عاشقه هَرگز جَهاندا سَدّ راه اولماز بَلا
.
عشق جانانیله اولموش بَسکی مالامال اورک
اولسا مین اوغلوم رَه جانانیده قیلّام فَدا
.
تا منای عشقه ائوز قُربانینی گَتدی خلیل
ایلیه تا تُحفه سین تَقدیم خَلّاق جلیل
.
وقت او وَقت اولدی کی عشقون یارینه ویرسون نشان
مَحضر جانانیده عشقیله ویرسون امتحان
.
اوغلونا ایلوبدی فَرمایش کی ای آرام جان
آخرین دَمده اگر واردور سوزون ایله بَیان
.
عرض قیلدی آزقالور جان بَذل ایدم جانانیمه
بو منادی عشقیده غَلطان اولام آلقانیمه
.
اَللریمله گوزلریم باغلانسا اولماز محنَتون
ذبح ایدَنده باشیمی قالماز اورکده حَسرَتون
.
چون یَقیندور قان ایچینده اَل اَیاق چالسا بالا
تاب ایدَنمَز گورسه بو دل یاندیران حالی آتا
.
تا ایشیتدی بوسوزی توکدی یوزه گوز یاشینی
ایستَدی اول نوجَوانون ذبح قیلسون باشینی
.
هَر قَدَر ویردی تَکان اَلده او بُرّان خَنجَره
لیک ایتمیبدور اَثَر خَنجَر او عُریان حَنجَره
.
پیک حَق ناگه نزول ایلوب دیدی اولما مَلول
حَق سَنون قُربانیوی بو دَشتیده ایتدی قبول
.
بوشلا اسماعیلی چون حَقدَن سَنه فَرمان گَلوب
بو گوزل ایثاره خاطر بیر قوزی قُربان گَلوب
.
#گریز #اکبریه_شهادت
.
بومنا سالدی منای کربلانی یادیمه
اولدی باعث روز و شَب درد و غَم و فَریادیمه
.
واریری گلسون خَلیل الله ائوزی دَشت غَمه
تاکی غَرق اولسون او دَشت غَمده بَحر ماتَمه
.
آغلاسون دلدن حسینون ماتَم عُظماسینه
اَکبرین صَد پاره قان ایچره دوشَن اَعضاسینه
.
سَنده رَزّاقی غَم کربوبلانی یاد اِله
بو غَم جانکاهیده صُبح و مَسا فریاد اِله
.
ایسته قُربان بایرامینده حَق سَنه قیلسون عَطا
صادر ایتسون بیر بَرات مکّه و کَربوبلا
.
.
#گلدی_ابراهیمه_الله_جانبیندن_بو_ندا
#ترکی
.
✍️ #زبدةالاشعار ✍️
.
🆔: @nohe_torki
نظر دهید