شجاعت حضرت علی اکبر در عاشورا
.
✍️ #زبدةالاشعار ✍️
.
🆔: @nohe_torki
.
مرحوم نادری میانجی
.
گلوب محرم آئی اولدی صبح عاشورا
یازوب قضا قلمی قاره پوش اولا زهرا
.
.
او گونکی شیعه لره چوخ عزالی بیر گوندی
عیال حیدره ماتم بلالی بیر گوندی
بنی امیّۀ غداره عالی بیر گوندی
أسوب سموم ستم تارمار اولوب گللر
پوزولدی گلشن دین داغداردور حیدر
.
.
او گونکه یازدیلا اطرافه نامه قوم نفاق
«امام عصروزه بیر خارجی اولوبدور عاق»
قشون توکولدی اودشت بلایه چون تپراق
زمین کرب و بلا لشگر ستمله دولور
کیمی گلوب یتشوبدور کیمیسی یولدا گلور
.
.
دوتوبدی دشتی سراسر گروه قوم ظلم
ورولموشیدی بلا دشتنه اون اوچ مین علم
قشون حسابی دقیقاً اولونمیو بدی رقم
اگر چه بعضی یازوللار قشون اوتوز میندی
قلج وران اوخ آتان جمله گانی یوز میندی
.
.
نچه روایت اولوب بو رواینین بیریدی
او پر بلا چوله هر سمتدن قشون یریدی
تمام آلتی آغاج عرض طول لشگریدی
یازاندا نامه عمر سعد ، امیر بدنامه
یتردی زادۀ مرجانه ال به ال نامه
.
.
ایله قشون که حسابی اونون سایا گلمز
نه دین تانور چوخی جاهل نفهم دل بیلمز
جنایت اهلدى قان توکمینجه دینجلمز
نقدر گوز باخوری دشت و قوم بیاباندی
فرات و شط و قشون بیر طرف نیستاندی
.
.
شمال و شرقله غربه قشوندی سایه سالوب
بیر عده نهر فراتی کنار شطی آلوب
ئوزوک قاشی کیمی تشنه حسین وسطده قالوب
ئوزون تصور ایله گور که صبح عاشورا
نجه فغانه گلوب ناله ائتمسون زهرا ؟
.
.
بویاندا سعد ستمگر یتوبدی مطلوبه
سالوبدی نقشۀ جنگی بیر آیری اسلوبه
ازل ئوزی اوخ آتوب اولدی جنگ مغلوبه
قشون قباقنه اوّل صحابه لر گیتدی
صحابه قسمتنی قوم دون شهید ایتدی
.
.
قریلدی یاور و انصاری قالدی شاه غریب
گلوب تلاطمه دریای دردی یوخدی طبیب
اولوبدی قاننه غلطان بریر و حر وحبیب
دیردی بار خدایا رواندی گوز یاشیم
فقط ئوزوم قالورام بیرده کی بنی هاشم
.
.
یاغیردی درد و محن الده کی جداسیندن
جهان تزلزله گلمش حسین نداسیندن
ملک لر آغلادی هل من معین صداسیندن
دینده یوخ کمکیم پادشاه تشنه جگر
نجه تحمل ایدردی جوان على اکبر
.
.
ایشیتدی شبه پیمبر که یوخ گلن داده
کسیلدی طاقتی ناراحت اولدى شهزاده
گیوبدی جنگی لباسین اولوبدی آماده
ئوزون یتوردی حضور امام آفاقه
دولاندی باشنه اوچ دفعه دوشدی تپراقه ؟
.
.
ادبله عرض ایلدی ای امام جن و بشر
الیوی قوینووا قویما مگر ئولوب اکبر
مرخص ایله ایدوم اشقیانی زیر و زبر
اجازه ویرمنه بیر کارزار ایدوم بابا جان
قروم بو لشگری من تار و مار ایدوم بابا جان
.
.
کومک سیزم دیمه ای پادشاه عرش و اساس
جهان یوزی اولا لشگر منیم چو یوخدی هراس
فنون جنگی منه اورگدوب عموم عبّاس
اجازه ویرون اگر بانگ یا علی کرم
موکلان فراتی فراته من توکرم
.
.
مرخص ایله گیدوم شوق ئوزیله دعوایه
سپاه کوفۀ شامی توکوم بو صحرایه
گوتور غریب آنامی سنده چیخ تماشایه
سالوم عدو جاننا رزمگهده واویلا
گلوب شجاعتمه مرحبا دیه لیلا
.
.
یخوم علم لرینی قانه اولسون آغشته
قروم توکرم یره أعدانی ایلیوم کشته
ویروم نمایش ایدوم کشته دن بابا پشته
آدیمدی اکبرئوزوم چون شبیه پیغمبر
گوروب لیاقتیمی آفرین دیسون حیدر
.
.
اجازه ویر منه ای پادشاه تشنه جگر
بو عرصه گاهده سیمرغ تک آچوم شهپر
قاچا مگس کیمی اطرافه قورخودان لشگر
او قدر نعش توکوم نهره کورپی باشلانسون
آخوب فرات سوئی خیمه گاهه داشلانسون
.
.
ایچه خیامده سو تشنه لر اولا سیراب
رقیه میله علی اصغر اولمیا بی تاب
منیم وجودیمه فخر ایلیه سکینه رباب
وارومدی بیر بله قدرت ایا شه محشر
ویروب شباهتی جدّیم صلابتی حیدر
.
.
ضعیف بیلمه منی پادشاه کون و مکان
آدیم علیدی علیدن وارومدی نام و نشان
صلابتیله چکوم نعره تیترسون میدان
قلج وروم منی قوی شمر امتحان ایتسون
قاچوب صفین دالسیندا ئوزون نهان ایتسون
.
.
گلوب تکلمه آخر شفیع یوم معاد :
رعایت ادب ایتدون اوغول ایوین آباد
نجه ویروم سنه اما بو گونده اذن جهاد ؟
دوشنده یادیمه جدیم رسول شاہ زمن
سنون جمالویلن گوزلریم اولار روشن
.
.
اگر بو دشت بلاده منه کمک یوخدور
پیمبر اوغلیام امّا ملالیم آرتوخدور
سنه بیلورسن علی جان محبتیم چوخدور
سنون امیدیوه من زنده ، قالمشام أوغلوم
سن ئولمه قوی من ئولوم من قوجالمشام اوغلوم
.
.
ادبله عرض ایلدی اکبر اول فرشته لقا
نچه سوال واروم سندن ای شه دو سرا
محبتین منه مقیاسین ایتگلن افشا
منی چوخ ایستیون یا زمینلن فرشی
منی چوخ ایستیوسن یا که لوحلن عرشی
.
.
بویوردی شاه أمم یوخ خبر ملالیمدن
نشان جدیمی آلام بو مه جمالیمدن
چوخ ایسترم سنی عالمده ملک ومالیمدن
زمین لوح و قلم عرش و فرشدن برتر
یقین ایله سنی چوخ ایسترم علی اکبر
.
.
او شاهزاده نین آرتوب دوباره غصه لری
دیدی او مقصده طرح ایتمشم بو شیوه لری
منی چوخ ایستیوسن یا بابا بوشیعه لری
بویوردی تشنه حسین اودلاما اوغول جگری
چوخ ایسترم هامودان من علاوه شیعه لری
.
.
گلوبدی اکبره شوق وصال، ذوق هوس
ایدوبدی عرض ایا پادشاه پاک نفس
دایانما اوغلوی کوی وفاده قربان کس
او شیعه لر که چوخ ایستورسن ای شه عطشان
منی او شیعه لره ائتگلن بابا قربان
.
.
بویوردی شاه جهان ای گل وفا اوغلوم
تاپار سنونله اگر جسم و جان صفا اوغلوم
سنی او شیعه لره ایلدرم فدا اوغلوم
گیدوب خیامه بالا سال دوباره واویلا
بزندیروب یولا سالسون سنی آنان لیلا
.
.
یوخومدى تاب بازام من وداع لیلانی
گوزوم یاشی توکولور ایسلادوبدی طغرانی
یازانمارام ئور گیم ضعف ایدور حسین جانی
وداع ایدوب آناسین الغرض علی اکبر
گلوب حضور امامه یتوب او مه پیکر
.
.
حسین قرارنی اکبر دوبارہ دن آلدی
آتا ئوزی بالانین بوینونا کفن سالدى
دیدی اوغول سنی گورمک قیامته قالدى
کفن سالوب سنی اوغلوم جداله گوندرورم
خدا یولوندا فدا من قتاله گوندرورم
.
.
زبسکه خَلقاً و خُلقاً شبیه جدّیم سن
منه گوگول ثمرى مایۀ أمیدیم سن
جوان خوش خط و رعنا یل رشیدیم سن
سنون وجودیوه فخر ایلرم من مضطر
تأسفیم بودی طوی ایتمدوم سنه اکبر
.
.
فدا او جدّیمه اوخشار اولان شباهتوه
مدینه یوسفی گل برگ تک وجاهتوه
دویونجا باخمامشام من بو قدّ و قامتوه
نئدوم که قویدولا حسرت منی سنون طویووا
یری علی دم آخرده بیر باخوم بویووا
.
.
گواهیم اول سن أوزون ای خدای رب جلیل
ذبیح کرب و بلادور بالام ئوزومده خلیل
سنون یولوندا ویروب گر خلیل اسماعیل
گتورمشم سنه یتمش ایکی سوسوز قربان
جواندیلار ، سود امر هم سپهبد دوران
.
.
حریم درگهوه من گتورمشم جانلار
فدالریم قوزی قوچدور گل اوزلی قربانلار
بلالی دشتده عریان قالار بو عطشانلار
جلال جاهوه قرباندی اکبریمده گلور
بو اکبرین دالیجا تشنه اصغریمله گلور
.
.
وفا بعهد ایدرم اول ئوزون بو امره گواه
بو من بو اکبر گل پیکریم بو قربانگاه
جزاده شیعه لری سن باغشلا یا الله
علی اکبریمون خونبهاسی حرمتینه
مریضه باجیسی صغرا وفاسی حرمتینه
.
.
غرض وداع ایلیوب اهلبیتی شهزاده
اولوبدی یکه و تنها جهاده آماده
الهی هیچ کسی بی یاور ایتمه دنیاده
حلال ایدون دیدی یاران یوخومدی مستحفظ
بابا – آنا – باجیلار ، عمه لر خداحافظ
.
.
او شاهزاده ز بس جنگه چوخ ایدوردی شتاب
لجام توسنی میدانه دوندروب او جناب
گلوبدی جنبشه هامون نَوَرد اولوبدی عقاب
شهاب ثاقب اودم قدرت جلی چاغیروب
رکابون اوستنه قالخوبدی یاعلی چاغیروب
.
.
گلوب تلاطمه قلزم مثال موج ائدوری
گورن دیردی که سیمرغ قافه اوج ایدوری
و یا رسول خدادور گوگه عروج ایدوری
گلوب حسینی گوره جدّی سالک معراج
عقاب رفرف اولوب شهرتی تاپوبدی رواج
.
.
قضا دیردی سکوت ائت یقین بو حیدردور
مراد و مقصدی منظوری فتح خیبردور
قدر دیردی حسین اوغلی تشنه اکبردور
گیدور سپاه یزید و پلیده لرزه سالا
او خیردا قارداشی بیچاره اصغره سو آلا
.
.
زمین کرب و بلانین گل اوزلی شهبازی
حسین تشنه لبون چون رشید سربازی
گیدور جهاده ایده حق یولوندا جانبازی
یری واریدی جلودار اولیدی عزرائیل
سپند دود ایلیدی جناب میکائیل
.
.
یتوب ملکلره فرمان اودم باذن خدا
آچون دریچۀ افلاکی ساکنان مسما
نجه جیبمه اوخشور گورون بو ماه لقا
گورنده اکبری سکان کبریا هیهات
ارادہ سیز ملکوت اهلی گوندروب #صلوات
.
.
بیری دیردی گوزی عین مصطفا گوزیدی
بیری دیردی یوزی ختم انبیا یوزیدی
بیری دیردی بو پیغمبر خدا ئوزیدی
بیری دیردی ندن دورمسوز تماشایه
گلون بیز آغلیاق اوّل آناسی لیلایه
.
.
یتشدی رزمگهه الغرض علی اکبر
دوشوبدی حیرته گورجک خیال ایدوب لشگر
گلوبدی کرب و بلایه جناب پیغمبر
سکوت ایدوب هامی میدانی دوتدی نظم و ثبات
اوجالدی لشگر کفاردن گوگه #صلوات
.
.
بیری دیردی بیزی آللادوب عبید زیاد
بیری دیردی اولیدی یزید ایوی برباد
بیری دیردی رسول خدا اولوب ناشاد
گلوب بو قومه یقین دور نصیحت ایلمگه
بو چولده أوغلی حسیندن حمایت ایلمگه
.
گوروبدی وضعی عمر سعد ظالم و نادان
ضیاء نور علیدن ایشقلانوب میدان
بیر آز قالوب ایده لشگر تمامسی عصیان
گوروبدی ری طبرستان ریاستی گیتدی
آچویدی حیله دیلین لشگره خطاب ایتدی
.
.
بو نوجوان که رسول خدایه بنزردور
دگول پیمبر ئوزی، زادۀ پیمبردور
حسینون اوغلی دی ناکام علی اکبردور
همان جواندی وئروب قتلنه بونون فتوا
یازو دى اوچ یوزه تک قاضی ایلیوب امضا
.
.
ویرون قلجلارا صیقل ایدون جدال شدید
ورون قلج اولا سیزدن رضا جهاندا یزید
قویون آنا نی آغلار ایدون علینی شهید
علاجی اولسا حسین اکبریندن آیرولماز
اگر ئوله علی اکبر حسینده ساق قالماز
.
.
چکوب لجام عقابی ایدوبدى خصمه نگاه
آچوب لسان گهر زادۀ لسان الله
گلوبدی نطقه او شهزاده چون رسول الله
فصاحت نبویله ، صلابت حیدر
اولاندا جمع ، تجلی ایدر اولار اکبر
.
.
انا علی بن الحسین بن على
نحن بیت الله اولی با النبی
اضربکم با السیف أحمی عن ابی
ضرب غلام هاشمی علوی
انا علی بن الحسین بن علی
.
.
ایا گروه شقاوت نهاد کینه شعار
ندندی ذره جه یوخ سیزده ننگ وغیرت عار
زیادین اوغلی کیمی حقّی ایتمسوز انکار
سقیه زاده دن علت ندور دفاع ائدیسوز
پیمبر اوغلی حسینیله سیز نزاع ائدیسوز
.
.
نه شرعه سیز باخیسوز نه رسوم و عرفانه
نه وار توجّهوز عالمده دین ایمانه
نه احترام ائدیسوز حامیان قرآنیه
لئیم و فتنه گر و مظهر شرارت سیز
یزید فاسق الینده عموماً آلت سیز
.
منیم بابامدی ایدوب بیت کعبه نی آباد
منیم بابامدی او سفیانی ایلیوب آزاد
همان او زاده سفیانه ایلسوز امداد
او گونکه مکه نی فتح ایتدی دین اولوب ابقا
بویوری جدیم او سفیانه «اذهبو الطلقا»
.
.
آدیم علیدی جگر گوشۀ رسولم من
ضیاء نور دو عین آنام بتولم من
منای عشقده قربان اولا قبولم من
منیم بابام اسدالله دور اولون آگاه
سیزی حساب ایدرم بوردا گلۀ روباه
.
.
فضای جنگده سیمرغ تک آچام شهپر
قاچار دالیندا صفین گیزله نر سنان عمر
منه دیلله حسین اوغلی نوجوان اکبر
سیزون یانوزدا منیم گرچه ارزشیم یوخدی
تیکوبله گوز یولوما منتظر قالان چوخدی
.
.
بابام علی کیمی شمشیر آلام اگرالیمه
تمام لشگری آماده ایلرم ئولومه
ولی نچاره که اوچ گون سو دگمیوب دیلیمه
ئوزومدن اوتری دگول چوخ تلاش ایله مگیم
رقیّمیله علی اصغره یانار ئوره گیم
.
.
فراتی باغلامیون سیزده وار اگر جرئت
ایچیم فرات سویون قوللاریم تاپا قوت
گورک او وقته أولوم کیملره اولار قسمت
قروم توکوم سیزی دشمن قانیلا دشت دولا
و چولده مردله ، نامرد تا مشخص اولا
.
.
گوروبدی سوزلری اشراره ایتمری تأثیر
باباسی شیر خدا تک آلوب اله شمشیر
قراردی لشگری مردم چکردی بیر تکبیر
یزید لشگرینون قانین ایلمشدی مباح
قاریشدی میسریه میمنه پوزولدی جناح
.
.
دوشوبدی زلزله سکان عرشلن فرشه
سالوبدی لشگر اشرار جاننه رعشه
چخوبدی الحذر و الأمان سسی عرشه
قاتوبدی آت دوشونه قوم دون نسناسی
حسین تشنه لبون کامه یتمین بالاسی
.
.
آجیقلی شیر کیمی زادۀ شه مردان
او نینوا چولونه سالدى قانلو بیر طوفان
آخاردی ماریه دشتینده سو کیمی القان
غضبلی شیر گورن وقته رم ایدوب روباه
داغیلدی صف قاچاقاچ دوشدی گیتدی نظم سپاه
.
.
باسوب دَبِلقه نی ابروسی اوسته چون حیدر
گورن دیردی گلوب جنگه ساقی کوثر
خطاب ایدوب قوشونا أول شبیه پیغمبر
پیمبر اوغلونا گر ظلم جبهه سین آچسیز
دیون گوروم منه ای کوفیان هارا قاچسیز؟
.
.
خبر ویریدیله ایکاش امیر بطحایه
گلیدی لیلی آناملا بیبیم تماشایه
گوریدیلرنجه اود ورمشام من اعدایه
او وقته گوردی دیور تلّدن امام زمن
فدا شجاعتوه مرحبا اوغول احسن
.
.
آچوب دریچۀ افلاکی ساکنان سما
باخور شجاعتوه ای اوغول آنام زهرا
او سهلدور که گلوب باخماقا آنان لیلا
ئورکده شعله چکن داغلی مطلبمده گلوب
خیمده قالمادی بیچاره زینبیمده گلوب
.
.
غرض او زادۀ ضرغام شیر غران تک
گزردی صحنۀ جنگاهی شاه مردان تک
توکردی باشلاری میدان ایچنده چوگان تک
دیردی حیف بو دعواده یالقوزام الله
ئوزون توجّه ائله یا علی ولی الله
.
.
دوشوبدی وحشته سعد اوغلی گوردی واردی نفاق
دیدی همیّت ایدون ای یلان شام و عراق
گوتورسه گر هره بیر قدر اوجنا تپراق
قالار او تپراقین آلتندا فرد یالقوزدور
او تپراقیلا یقیناً حسین اوغولسوزدور
.
.
گلوب تموّجه مور و ملخ کیمی لشگر
قاچان قیتدی دوران حمله ایتدیلر یکسر
آلوبلا دوره نی قالدى وسطده تک اکبر
دوباره غیضه گلوب شیر کردگار اوغلی
هژبر بیشۀ هیجاده نامدار اوغلی
.
.
بیر الده تیغ بیر الده دوتوب باشا قلخان
دفاع ایدردی سپر اوخلاری ساق وصولدان
اوزون وروب قشونا دوشدی لرزیه میدان
نهنگ بحر بلا تک او ضیغم و چالاک
یخاردی تپراقا اعدانی ایلیردی هلاک
.
.
دوتوبدی عرصه نی آت شیحه سی بگیر و بگیر
یتشدی عرشه صدای چکاچک شمشیر
فضانی سمّ ستوران توزی قاراتدی چو قیر
غبار خاک دوتوب رزمگاهی گوز گورمز
او شاهزاده ولی دشمنه امان ویرمز
.
.
هوا فشاری گونون ایستیسی یارالی بدن
یارالاریندان آخوب قان اولوبدی قانلی کفن
عطش حرارتی یالقوزدى بی عدد دشمن
چخوبدی لشگر ایچندن او ماه برج شرف
عنان توسنی دوندردی خیمه گاهه طرف
.
.
یتنده خیمیه اکبر او یوسف ایام
گوروبدی خیمه قبانده منتظردی امام
الین دوداقنه قویدی که یعنی من سوسوزام
آلوبدی اکبری یالقوز امام سینه سنه
قویویدی گوهرینی خازن ئوز خزینه سنه
.
.
بویوردی اکبره ؛ من غرق محنتم اوغلوم
جهان بیلور منی اهل صداقتم اوغلوم
ایدوم نچاره سویوم یوخ خجالتم أوغلوم
گتور دهیانوی سیراب اولا دهانمدن
که بلکه سر ایچه گل لبارون لسانمدن
.
.
أموب لساننی اکبر جهانی یاندوردی
دئدی بابا بو لسانون دهانی یاندوردی
حرارت عطشون جسم جانی یاندوردی
یوخومدی طاقت و تابیم برابرونده دوروم
اجازه ویر بابا بیرده غریب آنامی گوروم
.
.
یتشدی تازه مصیبت امام والایه
اجازه وئردی باباسی او چشم شهلایه
رقیّه قاچدی خبر ویرسون ام لیلایه
وئر ایندی مژده که سرو صنوبرون گلدی
دایانما خیمه ده مادر گل اکبرون گلدی
.
.
وداع لیلنی یاز نادری جگر داغلا
همیشه اکبر شهزادیه عزا ساخلا
مریضه باجیسی صغرانی یاده سال آغلا
فلک آرالقا بیر سنگ تفرقه سالدى
علی اکبری گورمک قیامته قالدى
.
.
.
.
#اکبریه_نادری
#اکبریه_شجاعت #اکبریه_شهادت
#گلوب_محرم_آئی_اولدی_صبح_عاشورا
#ترکی
.
✍️ #زبدةالاشعار ✍️
.
🆔: @nohe_torki
نظر دهید