استمداد امام از حضرت ابوالفضل (ع) در شهادت حضرت علی اکبر (ع)
.
✍️ #زبدةالاشعار ✍️
.
🆔: @nohe_torki
.
#سبک_ای_قلم … 5 سبک
.
علیرضا حضرتی
.
گل ابوالفضل جوان اوغلوم ئولدی
جدّیمه اوخشویان اوغلوم ئولدی
قالمیشام عرصه ده مات و حیران
داده گل مهربان اوغلوم ئولدی
جان ابوالفضل ابوالفضل ابوالفضل
.
.
ای منیم شیردل قهرمانیم
با تعصب یلیم پهلوانیم
هارداسان گل هرایه ابالفضل
یوخ چتین وقتده الدن دوتانیم
جان ابوالفضل ابوالفضل ابوالفضل
.
.
عرصه ده موج طوفانی گل گؤر
قلب میداندا غوغانی گل گؤر
دین و قرآن و ایمان یولوندا
دوغرانان خسته قربانی گل گؤر
.
.
درس عشقینده نقصانی یوخدی
دردیمون دلده درمانی یوخدی
هر قدر سسلسم اکبر اکبر
سس وئره اكبر امکانی یوخدی
جان ابوالفضل ابوالفضل ابوالفضل
.
.
بو همان شبه پیغمبریمدی
آدی دیلده منیم ازبریمدی
عشقیلن سسلینده على جان
شوقیلن جان دئین اکبریمدی
جان ابوالفضل ابوالفضل ابوالفضل
.
.
گؤزدن اشکیم عذاره توکولدی
قامتیم غصه لردن بوکولدی
دوت الیمدن اخا یالقوزام من
سینمه داغ اکبر چکیلدی
جان ابوالفضل ابوالفضل ابوالفضل
.
.
گل هرایه کی قلبیم یانوبدی
عرشه آهیم منیم قوزانوبدی
رحم ائدن اولمویوب بو جوانه
گور نئجه سر به سر دوغرانوبدی
جان ابوالفضل ابوالفضل ابوالفضل
.
.
ساغ قالوب جسمینون گؤرهاراسی؟
طاقتیمی آلوب باش یاراسی
بیربیرینه دگوب تیغ کیندن
گؤزلرینون اخا آغ قاراسی
جان ابوالفضل ابوالفضل ابوالفضل
.
.
بو گولی بسله میشدیم گؤز اوسته
توپراقا کیم سالیبدی ئوز اوسته
آلمیشام باشینی من قوجاقه
تا چیخا خسته جانی دیز اوسته
جان ابوالفضل ابوالفضل ابوالفضل
.
.
قان یاشی گؤزلریمدن سوزولدی
بو پوزولموش عذاره دوزولدی
گل پناه اول من بی پناهه
چون الیم اكبریمدن اوزولدی
جان ابوالفضل ابوالفضل ابوالفضل
.
.
حالیمی غملر ائتدی دگرگون
غصه لر قلبیمی ائتدی مفتون
من کی قالدیم بو حاله غمیندن
وار یئری لیلی گر اولسا مجنون
جان ابوالفضل ابوالفضل ابوالفضل
.
.
یار اولان یوخدی بو مبتلایه
دوشموشم چوخ چتین بیر بلایه
خیمیه گئتمگه طاقتیم یوخ
یغمیشام قانلی نعشین عبایه
جان ابوالفضل ابوالفضل ابوالفضل
.
.
.
#اکبریه_حضرتی_ناعمی
#اکبریه_شهادت
#گل_ابوالفضل_جوان_اوغلوم_ئولدی
#ترکی
.
✍️ #زبدةالاشعار ✍️
.
🆔: @nohe_torki
نظر دهید