گل اوغول موسی کاظم دیوم آخر سوزومی #صادقیه_سیفی_سرابی

زبانحال حضرت امام جعفر صادق (ع)
.
✍️ زبدة الاشعار ✍️

?: @nohe_torki
.
کربلائی صالح سیفی سرابی
.
گل اوغول موسی کاظم دیوم آخر سوزومی
باشیمون اوسته اوتور باغلا الونله گوزومی

.
جان یتوب سینمه اوغلوم یتیشوب وقت فراق
آز قالور منده گئدم محضر طاهایه قوناق
بالا مندن صورا اول دهریده اسلامه دایاق
پایمال ایلیه اسلامی عدو قویما بالا
دینی تبلیغ ائله حتّی سنی زندانه سالا

.
جان سیزون جان بو نمازین بالا دقّت ائلیون
اوّل وقته اَدا ائتمگه همّت ائلیون
کسب تقواده فقط بیربیره سبقت ائلیون
دین یولوندا نه بلا گلسه ده محکم دایانون
یوخودور اجری نمازی بالا یونگول سایانون

.
وئر خبر اهل و عیالیم هامی گلسین یانیما
زهر ئاثیر ائلیوب لرزه سالوبدور جانیما
منی مسموم ائلیوب باعث اولوبلار قانیما
اثر زهریدن ای مونس و غمخوار ئولورم
سیزی ترک ایلمگه اولموشام اجبار ئولورم

.
گور نجه ظلم ائلیوب جعفره منصور دنی
آپاروبدور نچه یول بزمینه جبریله منی
منه توهین ائلیوب بسکه او ظالم علنی
قورخمادی قهر خدادن نجه رفتار ائلدی
صادقه کاذب آدین بزمیده اظهار ائلدی

.
ایستورم لحظه آخرده گورم گل یوزوزی
مایلم هر سوزوز اولسا دیون اوغلوم سوزوزی
یوخ توانیم گورم اما بالا آغلار گوزوزی
او منیم جدّیم حسینیدی یاتوب نار غمه
یوز قویوب عرصیه باخموردی عیال و حرمه

.
من اگرچه ئولورم دوره می اولادیم آلوب
نه منیم پیکریمی دشمن ایاق آلتدا سالوب
نه یارالی بدنیم قوملارین اوستونده قالوب
نه ئولوب قارداشیم اوغلوم نه ده قدّیم بوکولوب
نه قوجاقیمده بالا اوخلانوب اشگیم توکولوب

.
نه سوسوزدان یانوری خیمه ده یورقون حرمیم
منیلن جدّیمه باخسون منیم اوغلوم نه غمیم
نه علمداریم ئولوبدور نه یاتوبدور علمیم
نه باجیم دشمن ایچینده دولانور قتلگهی
نه دیور شمره که ئولدورمه بو دلخسته شهی

.
نه منیم قویدی عدو تیغ جفا حنجریمه
نه دگوب آلنیما داش قان توکولوب گوزلریمه
نه دگوب قلبیمه اوخ نسگیل اولا مادریمه
نه باجیم دوتدی منیم قاتلمین خنجرینی
باشیم اوسته نه کسوب خنجر شمر اللرینی

.
آغلارام جدّیمه هی ایسلادارام دامنیمی
نه سویوب قوم دغا ظلمیله پیراهنیمی
نه باجیم قوملارین اوسته گوروب عریان تنیمی
جدّیمون باجیسی اما اونی بیر حالدا تاپوب
نه گوروب اللری واردور نه باشی قانه باتوب

.
تا گوروب قارداشینون زینب نالان بدنین
ایلیوب کوفه لیلر زینب میدان بدنین
اولمیوب دفن ائلیه زینبه امکان بدنین
باغلیوب سیل کیمی صورتینه گوزیاشینی
یولّانوب شامه قویوب چولده عزیز قارداشینی

.
زینبین حالینه((صالح))یوزه توک گوزیاشوی
اولماز ایرادی بو غمده یاراسان گر باشوی
اونا خاطر آناسی ایلر عطا پاداشوی
ایسته زهرا ائلسون حاجتوی فوری عطا
قسمت اولسون سنه ده مرقد شاه شهدا

.
#سبک_یارالی_جان_یارالی ( 4 سبک در یک فایل )

.
#صادقیه_شهادت
#گل_اوغول_موسی_کاظم_دیوم_آخر_سوزومی
#سیفی_سرابی
#ترکی
.
✍️ #زبدةالاشعار ✍️

?: @nohe_torki