شهادت حضرت زهرا (س)
.
✍️ #زبدةالاشعار ✍️
.
🆔: @nohe_torki
.
#صالح_علی_نژاد
.
گل ای سینق گویوللرین صفاسی یا اباالحسن
تمام درد عالمین دواسی یا أبا الحسن
.
.
حریم عزّتونده وار شمیم و عطری جنتین
دوشر خیاله حشمتون ایدنده عشق صحبتین
قسم جلال و جاهوه جهاندا کاخ عزتین
سنیله استوار اولوب بناسی یا اباالحسن
.
.
سنیله اهل دل تاپوب جهاندا عز و اعتبار
سنیله کسب ایدوب فلک ملک جلالت و وقار
خیال حاجت ایلمز تمام عمر سنده وار
هامی اورکده حاجتین رواسی یا اباالحسن
.
.
اونون که اعتقادی وار وقایع قیامته
ئولنجه باغلیوبدی دل امامته ولایته
حضور کردگاریده یتر یقین اجابته
یتیم و دل شکسته نون دعاسی یا اباالحسن
.
.
قسم مقام و قدریوه علوّ عزّ و شأنیوه
قسم او آستانۀ فرشته پاسبانوه
قسم شکسته گویلوه قسم او خسته جانوه
باشیمدا واردی عشقوون هواسی یا اباالحسن
.
.
سنیله شور و حال وار سرای اهل رازده
نیازمه گواهیدور خدای بی نیازده
خدادن ایسترم اولا هماره اهتزازده
ولایت و رسالتین لواسی یا اباالحسن
.
.
گوزون فداسی گوز یاشی گورر گوزوم گوزونده وار
تمام عالمه اثر، اثر قویان سوزونده وار
فروغ و جلوۀ خدا او دلربا یوزونده وار
چاتار بو حسنوه کیمون لقاسی یا ابا الحسن
.
.
مقام عرش و ما ملک یتر مگر مقاموه
کرامت اهلی گوز تیکوب جلال و احتشاموه
اولوبدی سمع آشنا کلیم سا کلاموه
سوزونده واردی چونکه حق رضاسی یا اباالحسن
.
.
بولن ولی حق سنی وقار و جاه کسب ائدوب
خلافتین سریرینه سنی رسول نصب ائدوب
ولیک حقوی سنون دانوبدی خصم غصب ائدوب
مگر بودور امامتین جزاسی یا اباالحسن
.
.
گواهسن که فاطمه ازلدن ابتلالیدی
آتاسی رحلت ایلیوب باتوب غمه عزالیدی
بلایه سویلیوب بلى اودور باشی بلالیدی
سنونده چوخدی باشوون بلاسی یا ابالحسن
.
.
خدای ذوالجلال اوزی ائدوب جمالوی جمیل
او لعل لبده واردی چوخ ترشحات سلسبیل
عذاره سیل اشگوی دمادم ایلمه سبیل
بتول اولا اوگوزلرین فداسی یا اباالحسن
.
.
خراب گور گویول ائوین مصیبت و غم ایلمز
ریاض عمرومی فلک دوباره خرّم ایلمز
وجودیمون جراحتی قبول مرهم ایلمز
ساغالمیاندی سینه مون یاراسی یا اباالحسن
.
.
ایدوبدی کوله بار غم بو سرو قدیمی کمان
نشان مصطفی اولوب خدنگ محنته نشان
یتوبدی ظلم بی امان گیدوبدی جسمدن توان
فقط قالوب وجودیمون نماسی یا اباالحسن
.
.
بهار عمر غصه دن خزان اولور خزانیده
کلام ادا اولونموری گرہ لنور زبانیده
گلور صدای الرّحیل که واردی گوش جانیده
درای کاروان غم صداسی یا اباالحسن
.
.
یانندا خانه صاحبین اولار وفالی کلب شیر
دوتار عزیز صاحبی اوکلبی تا اولونجا پیر
عنایت ایله صالحه سن ای دو عالمه امیر
که اولسون آستانه ون گداسی یا اباالحسن
.
.
#سبک_ای_حرمینه_ناز_ایدن … 3 سبک
.
#فاطمیه_شهادت
#گل_ای_سینق_گویوللرین_صفاسی_یااباالحسن
#ترکی
.
✍️ #زبدةالاشعار ✍️
.
🆔: @nohe_torki
نظر دهید