زبانحال امام حسین (ع) در شهادت برادر
.
✍️ #زبدةالاشعار ✍️
.
🆔: @nohe_torki
.
محسن محمدی هشترودی
.
گل داده باجی قافله سالاریم ئولوبدور
یاتدی علمیم زینب علمداریم ئولوبدور
.
.
ئولدوردله گل حامی قرآنی بو چولده
جان بذل ایلین دینینه قربانی بو چولده
قویدوم یارالی درتلره درمانی بو چولده
امکان یوخدی گلمگه گلسون باجی زینب
قارداشون حسین اولدی کمک محتاجی زینب
.
.
یخمیشدلار عباسمی میدان آراسیندا
دوشموشدی یئره فرقة عدوان آراسیندا
قالدی بدنی معرکده قان آراسیندا
سیندی کمریم دوشدی گوزوم قارداشا قارداش
ویرمشدی یارا دشمن او السیز باشا قارداش
.
.
بخت اولدوزوموز ایتمدی سازش بو سفرده
اولاد علی قالدی بو مأواده خطرده
ساخلا باجی باش سیزلاری هر لحظه نظرده
بوندان صورا اهل حرمه یار اولاجاقسان
عباسیم ئولوب قافله سالار اولاجاقسان
.
.
ال چالدلا من بی کسه قلبیم سخلوبدور
میدانیده گوردوم یئره قولسوز یخلوبدور
چوخدور یاراسی عضویدن اعضا چخلوبدور
آرامیمی هر لحظه آلان الدن علمدی
شرمنده دی گلمک لگه قوللاری قلمدی
.
.
دریاده سینوب فلک نجاتیم گله دوشدی
قارداشون حسین معرکده مشکله دوشدی
غربتده آدامسیزلیقی دلدن دله دوشدی
دشمنلر ایچینده قالان عباسمه آغلا
منده گیدورم بزم قوراخ یاسمه آغلا
.
.
آلدیم الیمه اللرنی قانلو مناده
قالدی قالاجاق مدّتی بو کرب و بلاده
قارداشون حسین تنگ نفس سعی و صفاده
جهد ایدیم ئوزوم خیمه سرایه گئتوروم من
امکان یوخودی نعشنی یئردن گؤتورم من
.
.
قوللاری قلم جعفر طیار مه باخدیم
یومدوم گوزومی محرم اسرارمه باخدیم
گوردوم قوتارور رونق پرگارمه باخدیم
دشمنلر اولان یئرده بئلیم سیندی دوزلمز
بیرده آتامون اوغلی ابوالفضل اله گلمز
.
.
دشمن ستمی ساخلیوب عباسی یولوندان
گوردوم آخوری توپراقاقان ساق و صولوندان
سروین ایله بیل آیری دوشوب شاخه خولوندان
باش کاسه سینون قانی آخوردی دوداقیندان
دوشموشدی یئره پرچم قرآن قوجاقیندان
.
.
آغلا کسیلن معرکده اللره زینب
آتلار ایاقی آتدا قالان پیکره زینب
باش پارچالانوب قانی دولوب گوزلره زینب
واضح دئیورم پیکری قولسوز متلاشی
قوملار یارالی جسمون اولوب قانلو فراشی
.
.
سیمای عدالت یارالی قانینه باتدی
گر چه من مظلومی بو مأواده قوجاتدی
لیکن باجی دین پرچمین عباسیم اوجاتدی
بازار شهادتده خریداری گوزلدی
توپراقلارین اوسته توکولن ثاری گوزلدی
.
.
“ ناطق “ ده گلن وار گل و گلزاره سلامیم
محبوب خدا محرم اسراره سلامیم
قان بذل ایلین قولسوز علمداره سلامیم
قارداش غمی قارداشه چتین گلدی او ساعت
با جادیده ساق زینبه قوپّوشدی قیامت
.
.
#عباسیه_محمدی_ناطق
#عباسیه_شهادت
#گل_داده_باجی_قافله_سالاریم_ئولوبدور
#ترکی
.
✍️ #زبدةالاشعار ✍️
.
🆔: @nohe_torki
نظر دهید