هجوم به خانه وحی و شهادت حضرت زهرا (س)
.
✍️ زبدة الاشعار ✍️
.
🆔: @nohe_torki
.
مرحوم محمدتقی قمری گلزار دربندی ( قمری )
.
گوروب مشکلده زهرانی شه مشکل گشا گَلدی
چخوب ظلمات غمدن تاجدار اوصیا گَلدی
.
قزارموش رنگی غیرتدن، یانوب جانی مصیبتدن
دلینده ذکری هردم ناله ی وا مصطفی گَلدی
.
اَلینده ذوالفقار پرشرر لرزان غلافینده
دفاع گلّه ی روباه اوچون شیر خدا گَلدی
.
ولایت چرخینه آشوب دوشدی، قوپدی بیر وحشت
که گویا سمت مغربدن چخوب برق بلا گَلدی
.
تلاطم ایلیوب دریای قهر قدرتُ اللهی
نهنگ قدرت یزدان، امیر لافتی گَلدی
.
اُحد هنگامه سین برهم ووران، خیبر یخان حیدر
چکوب اللهُ اکبر نعره سین کان وفا گَلدی
.
چخوب صحن سرایه بیر مهابتلن ولیّ حق
ایدوب گویا تموّج بحر قهر کبریا گَلدی
.
داخی تاب ایتمدی گَلسون قولاقه ناله ی زهرا
هِژَبرِ عرصه ی هیجا علیّ المرتضی گَلدی
.
گوروب زهرانی صحن ایچره دوشوب بی طاقت و بی جان
درون سینه سیندن ناله ی وا مصطفی گَلدی
.
دیور سندن صورا دوشدوم نه حاله یا رسول الله
جلالیم گیتدی دنیاده، گونوم اولدی قرا گَلدی
.
.
.
.
دیوب بو سوزلری، اول شیر حیّ لم یزلی
ووروب اوزین اود ایچیندن کناره چخدی علی
.
اوزاتدی دست یداللهی اول امام مبین
دوتوب او زاده ی ناپاک ناکسون کمرین
.
چو اولدی پنجه ی مردانه سی او ظالمه بند
تکان ویروب ایلدی قهریله هوایه بلند
.
دولاندیروب باشینون اوسته شاه عرش وقار
ووروب یره نجه قیلدی چو سایه به دیوار
.
قویوب ایاقینی صندوق سینه ی کفره
اَل آتدی قبضه ی شمشیر خونچکان دوسره
.
گوروب بو حالی عدو التجا ایدوب هردم
ویروردی حیدر کرّاری مصطفایه قسم
.
باخوب او عجزیله الحاحه اول امام کِبار
چکوب اَلین دیدی ای بیحیای بدکردار
.
بو جرات اولمازیدی سنده گر آچِیدیم اَل
گرک وصیّت پیغمبره اولونسون عمل
.
دیوب بو سوزلری اول پادشاه عرش وقار
رضا قضایه ویروب ذوالفقاری قویدی کنار
.
چو اولدی قوم جفاجو بو سرّیدن آگاه
داخی اَل آچمیه جاق دشمنه ولی الله
.
دوباره جرات ایدوب فرقه ی ظلوم و جهول
جفا اَلیله یداللهی قیلدیلار مغلول
.
سالوبدی حبل متین بوینونا ستمله رسن
رسولدن صورا زار اولدولار حسین و حسن
.
چکنده مسجده شیر خدانی اهل جفا
دوشوب دالنجا حسین و حسنله خیرنسا
.
گَتورمیوب یارالی جانی اول مصیبته تاب
ایدردی فاطمه گویا بو دللریله خطاب
.
ای اهل کینه ایلمیون زار عم اوغلومی
مین زجریله درده گرفتار عم اوغلومی
.
چوخدی گوگلده دردی، سیز اینجیتمیون اونی
دارِ فناده بی کس و بی یار عم اوغلومی
.
گَلدی بروزه کینه لروز ای قوم بت پرست
قیلدوز غم مصیبته سردار عم اوغلومی
.
بُلمم نه تیز عداوتوز اولدی آشکار
سالدوز بو حاله دیده سی خونبار عم اوغلومی
.
دنیاده سیزلره مگر ای قوم بی حیا
تاپشورماموشدی احمد مختار عم اوغلومی
.
آل رسول حرمتینی یاخشی ساخلادوز
ایتدوز بلایه قافله سالار عم اوغلومی
.
هیچ کس جهاندا زار ایلمز اوز امامینی
سیز ایلدوز بو حیدر کرّار عم اوغلومی
.
قول باغلی، سینه داغلی، دل افکار آپارمیون
مسجدلره غریب و دل افکار عم اوغلومی
.
مشکل گشانی مشکله سالماق روا دگل
ایتمون نشانِ طعنه ی اغیار عم اوغلومی
.
غم گلشنینده ناله چکر هر صباح و شام
اوخشار همیشه قمری گلزار عم اوغلومی
.
داخل اولاندا مسجده اول شاه بی پناه
زهرا آپاردی معجره اَل، چکدی بیرجه آه
.
سسلندی سیندی بال و پریم وامحمّدا
یاندی بو غصّه دن جگریم وامحمّدا
.
سندن صورا قرا گونه سالدی منی غمون
قان یاش توکر بو دیده لریم وامحمّدا
.
یاندی قاپوم ستمله، شهید اولدی محسنیم
جاریدور اشک چشم تریم وامحمّدا
.
یالقوزلیوبدیلار قولی باغلی عم اوغلومی
گَلمز هرایه بیر نفریم وامحمّدا
.
عمامه اَلده، دیده سی یاشلی، جگرده آه
آغلار شبیریلن شبریم وامحمّدا
.
دیوب بو سوزلری خیرالنّسا بحال غمین
بو فکره دوشدی که قیلسون او قوم اوچون نفرین
.
قوپوب قیام قیامت بدون نفخه ی صور
ستونلر اوجالوب اولدی ستمی راه عبور
.
گوروب بو حالتی سلمان که بنت خیر بشر
اگر آچا باشینی عالمی یخار یکسر
.
خطاب قیلدی که ای بانوی خجسته لقا
عم اوغلون حیدر صفدر دگل بو امره رضا
.
بلایه صبر ایلماق چونکه سیزده عادتدور
سبب اودور که آتان عالمِینه رحمتدور
.
بو سوزلری ایشیدوب بانوی حریم ازل
قبول عرض قیلوب چکدی معجریندن اَل
.
ایدنده فاطمه ترک فغان و ناله و زار
ستون مسجد و منبر دوتوب یرینده قرار
.
چکنده تاج سر هَل اَتانی قوم دغا
رسول قبرینه یوز دوندَروب ایدردی ندا
.
نظاره قیل منی بی یاره یا رسول الله
اولوب جهاندا گونوم قاره یا رسول الله
.
جفای امّته باخ، محنت و مصیبته باخ
غریب عم اوغلوما قیل چاره یا رسول الله
.
سالوبلا شالینی اوز بوینونا کمند مثال
چَکَلّه مجلس اغیاره یا رسول الله
.
ابوشرور لعین اَل گوتورمیوب مندن
نه ایتمیشم او ستمکاره یا رسول الله
.
منه ایده لّر ابوالشرّ بیعتین تکلیف
اطاعت ایتماقا اغیاره یا رسول الله
.
مسیح تک منی آلموش آرایه قوم حسود
چکر عداوتیلن داره یا رسول الله
.
او خیبری گوتورن اللریمی باغلادیلار
ووروبلا قلبیمه مین یاره یا رسول الله
.
ابی شراره نون اوغلی او زاده ی سفیان
گَتوردیلر منی بیزاره یا رسول الله
.
ایدن زمان بو خطابی وصیّ پیغمبر
گَلوب تزلزله قبر جناب خیر بشر
.
اولوب ظهور تجلّای نور مسجد آرا
چخوب او روضه ی پرنوریدن ید بیضا
.
تمام گوردوله سالار انبیا اَلیدور
محمّد عربی یعنی مصطفی اَلیدور
.
اوجالدی صوت جناب رسول ربّ جلیل
خطاب قیلدی او بی شرمه ای لعین و بخیل
.
غرض بو غصب خلافت جهانه سالدی فساد
شریعتی پوزوب، دین ایوین ایدوب برباد
.
بو فتنه باعث اولوب کربلا مصیبتینه
بو فتنه باعث اولوبدور علی شهادتینه
.
تمام باعثی بو فتنه دور سالوب عدوان
توکه لّر حشره کیمی هر نه قَدر ناحق قان
.
بس ایت بو قصّه نی #قمری یِتیشمَز اتمامه
شرار مِحنتیلن اود دوتوب یانار خامه
.
#فاطمیه_شهادت
#گوروب_مشکلده_زهرانی_شه_مشکل_گشا_گلدی
#قمری
#ترکی
.
✍️ #زبدةالاشعار ✍️
.
🆔: @nohe_torki
نظر دهید