حالات حضرت موسی ابن جعفر (ع)
.
.
مرحوم سعدی زمان
.
.
گوشۀ غربتده بیر گون ، شیوۀ معتادیدن
ایلمشدیم استفاده ، موقعِ آزادیدن
.
صبح وقتیدی فرایضدن صورا ، افسرده حال
فارغ اولموشدوم نمازِ صبحدن ، اورادیدن
.
ایلمشدی دردِ غربت قلبیمه بسکه اثر
شِکوه ایلوردوم جفای چرخِ بدبنیادیدن
.
کوه سینه ، تیشه ناخن ، جانِ شیریندن دویوب
یاد ایدردوم حالِ شور انگیزیله فرهادیدن
.
ناگهان یتدی ندای هاتفِ غیبی منه
کی غریبِ دلشکسته ، ساکت اول فریادیدن
.
گوشۀ غربتده بیر تک سن دگلسن مبتلا
ذلّتِ غربت گوروب چوخ کیمسه لر اوتادیدن
.
رسمِ عالمدور ، غریبی آختارار دائیم غریب
سنده آختار بیر غریبی محبسِ بغدادیدن
.
گور نجه کُنده ایاقینده یاتوب زنداندا تک
اون بیر ایلدور ظلمِ الیله آیریلوب اولادیدن
.
گوندوزی صائم ، گجه قائم ، یری تاریک و تنگ
شرحِ حالنده قلم عاجزدی استعدادیدن
.
تو به تو زندان ، قرانلوق یر ، مُعذّب دور اوزی
یوز دوتور هر سمته تاپمور چاره استمدادیدن
.
همدمی غم ، مونسی شیون ، انیسی گوز یاشی
نی کیمی دائم سیزیلدار ، قیدِ استبدادیدن
.
قامتِ سروین بوکوب بارِ بلا ، ایلوب دو تا
گورسنور شکلِ هلالی ، قامتِ شمشادیدن
.
حلقۀ زنجیردن ساقِین اولوبدور خورد خورد
بیله زاهد محضرِ یکتاده یوخ زُهّادیدن
.
گه دوتار آغلار گوزیله یوز مدینه سمتینه
یوخدی یا جدّا دیر بیر دادرس ، افرادیدن
.
یوخدی هارونه دیَن موسی ابن جعفر نیلیوب؟
گل بو نخجیری خلاص ایت خانۀ صیّادیدن
.
گه بقیعه یوز دوتار سسلر آنا یا فاطمه
تنگه گلدیم گوشۀ زنداندا آه و دادیدن
.
گاه اوز اوغلی رضانی گه قیزی معصومه نی
آتشین آهیله سسلر خاطرِ ناشادیدن
.
گه یوزین سورتر یره ، عرض ایلر ای ربّ جلیل
گیچدی درد و محنتیم اندازه دن تعدادیدن
.
یوسف صدّیقی ای زندانِ غمندن قورتاران
دردِ جوعی رفع ایدن اطفالِ مادر زادیدن
.
قورتاران ای یونسی ظلماتِ بطنِ حوتدن
قدرتی هر بیر بلانی دفع ایدن عُبّادیدن
.
لطف ایله قورتار اماندور کنجِ محبسدن منی
دویموشام یا رب حیاتِ عالمِ ایجادیدن
.
قدسیان آمین دیوب اولدی دعاسی مستجاب
یتدی اوز مقصودینه بیر سنگدل جلّادیدن
.
حضرتِ زهرا چراغین سند خاموش ایلدی
ظلمله باخ ال چکمدی مسموم اولان اکبادیدن
.
آچمادی زنجیرینی آسوده جان تسلیم ایده
ای قلم زنجیر آدی گلدی دانش سجّادیدن
.
#گریز #سجادیه_شهادت
.
مشق ویرمشدی بونا اوز جدّی فخرالسّاجدین
رسمدور شاگرد آلار اوز مشقینی اوستادیدن
.
گوشۀ ویرانه ده سجّادی زنجیر آتدا گور
محبسِ بغدادیده گیچ شرحِ استشهادیدن
.
غُلّ جامع ، یاره سندن گون دگنده قان آخور
داد و شیون عرشه قالخور ، عترتِ امجادیدن
.
بیر نفر یوخدور دیه ناخوشدی زنجیرین آچون
شامیان آخر نه ایستور بو علیلِ رادیدن
.
سینه سینده جمع ایدوب زنجیری حالِ ضعفیله
ال گوتورمور عالَمِ اسلامده ارشادیدن
.
حجّت الله مسجدِ شامه سالوبدور انقلاب
ذکر ایدور نام و نشان آباء و هم اجدادیدن
.
سسلنور ای شامین اهلی ، من علی فرزندیَم
حشرده قیلّام شکایت سیز ایدن بیدادیدن
.
ای خدای مقتدر ، ای قدرتی عقله محیط
ای اولان اعمالِ خلقین ناظری مِرصادیدن
.
من #حسینی عاجزم ، سن قدرتون اظهار ایله
قدرتونله تیز خلاص ائت ، بو خراب آبادیدن
.
#مناجات
#کاظمیه_شهادت
#گوشه_غربتده_بیر_گون_شیوه_معتادیدن
#سعدی_زمان
#لمعات_حسینی ص 415
#ترکی #کاظمیه
#زبدةالاشعار
نظر دهید