حالات بانوی وفاپیشه حضرت رباب (س) در شام غریبان
.
.
مرحوم انور اردبیلی
.
.
گون غروب ائتدی اولوب شام غریبان حسین
جمع اولوب اهل کسا اولدولا مهمان حسین
باش باشا وئردی یانان خیمه ده طفلان حسین
بالا قزلار او قرانلوق چادرا توپلاشدی
هره بیر گوشیه قوش تک سخلوب یوخلاشدی
.
.
باغبان مرکز میدانیده مجروح بدن
گل خزانه گیدوب اولموشدی پراکنده چمن
عندلیبان پر آشفته دوشوب زمزمه دن
قزلارون هر بیریسی شهپری سنمش قوشودی
یاتمیانلاردا گوزون واهمه دن یومّوشودی
.
.
وادی عشقه آی اولدوز باخور حیران حیران
قره یل لر کچور اول صحنه نی لرزان لرزان
سو آخور چوللره ئوز باشینه غلطان غلطان
خرداجا بیر قزا زهرا قزی ایلور اکرام
ال چکور زلف پریشاننه آرام آرام
.
.
ناگهان ناله سسی دوتدی او یانمش چادری
قبۀ محنتی افلاکه دایانمش چادری
دامنی اشک یتیمانه بویانمش چادری
ظلمت شب آرادا اولموشیدی گرچه حجاب
ولی زینب تانیدی بیلدی ائدور ناله رباب
.
.
دئدی دردون ندی قویمور گیدہ سن هوشه سنی
زنده دار شب ائدوب بزم سیه پوشه سنی
هانسی غمدور گتورور چشمه کیمی جوشه سنی
یورولوبسان نیه آخر یوخی گلمور گوزوه
آغلیورسان بو قرانلوق گیجه ده ئوز ئوزوه
.
.
هره بیر گوشه نی مأوا ائلیوب دیده پر آب
توزلی کیپریکلره ایستور چکیله سرمۀ خواب
بختور یوخدی بو چادرده بیلورسنکه رباب
خانمانسوز بلاده هامونون حصّه سی وار
هره نون قلبیده مین محنتی مین غصّه سی وار
.
.
هامونون رشتۀ امیدی بو چولده قریلوب
هامی باهم سویولوبدی هامی باهم وورولوب
دینجیمیز یوخدی هامی خیمه یانندا یورولوب
بار غم هر بیر اوغولسوز آنانون قدین اکوب
سنه ده قمچی دگوبدور بیزه ده قمچی دگوب
.
.
ساحلی یوخدی بو دریای عمیق محنون
اله گلمز نقدر آغلاسون الدن گیده نون
بیلورم کوفه نون اهلی ائویوی یخدی سنون
واردی حقّون بیلورم گوزلریوه گلمیه هوش
سن کچن شب ملکیدون بو گئجه خانه بدوش
.
.
زینبون غملی سوزی گتدی ربابه هیجان
آیری دردیم دیدی واردی سنه جانیم قربان
سعی ایدوردوم ایدم ئوز دردیمی سندن پنهان
ایتمیم ترک ادب داغلی دلی داغلامیام
یانام ئوز دردیمه گیزلین اوجادان آغلامیام
.
.
ایندیکه سن خبر آلدون سوزی ای شمس حیا
دردیمی عرض ائدرم محضریوه ائتمه نوا
اشتباه ایلدیم ایچدوم سوئی من بختی قرا
زحمتیمیش بو قرا بخته او سو من نه بیلیم
کاش ئولیدوم عطشیمدن سویا دگمیدی دیلیم
.
.
صودی اولسا بالاسین تز آلور آغوشه آنا
چوخ چتین دوشلرین امدیر مسه ساکت دایانا
قلبی یانسون منی نوغنچه مه حسرت قویانا
بالام اولسیدی اگر راحت ائدردوم ئوزومی
آنالار تک بو گئجه منده یوماردوم گوزومی
.
.
آشیانی داغیلان طایر بشکسته پرم
زحمتیم چوخدی سیزه عفو ائلسون اهل حرم
اینجیسوز مندن اگر چولده گیدوب اگلشرم
محضروزدن بیلورم خارجه دورسام خوش اولار
من کنیزم هاموزا چولده اوتورسام خوش اولار
.
.
غفلتاً یاره نون اوسته نجه که اود یاپوشار
سوزشیندن یارانون تاب ائلمز قلب آلیشار
اودّان آرتوق بو گیجه صود دوشؤمه وئردی فشار
راضیم پیک اجل درک ائده الان قوتارام
گلمرم نالیه والله یاتا بیلسم یاتارام
.
.
او دونن که گیجمیدی ائلدوم ناله مدام
صبح اولونجا من مظلومه یوخی اولدی حرام
یاتا بیلموردی خانم جان بسر اولموشدی بالام
صودیم اولمادی دونن عرشه فغانیم یتدی
بو گیجه واردی صودیم اوغلوم الیمدن گیتدی
.
#حضرت_رباب #شام_غریبان
#گون_غروب_ائتدی_اولوب_شام_غریبان_حسین
#یادگار_انور #ترکی
#زبدةالاشعار
نظر دهید