احوالات مجلس ابن زیاد ملعون در کوفه
.
✍️ #زبدةالاشعار ✍️
.
🆔: @nohe_torki
.
علومی تبریزی
.
گچر بو عمر عزیزیم اماندی ایلمه غفلت
اوزیوه کسب ایله بیر آبرو و فضل و شرافت
.
اورک گوزیله نظر سال وفاسیز عالمه بیر باخ
مباد تولاناسان بو جهانه ایتگله دقت
.
بوراخ بو خلقی دوت آل محمدین اتگیندن
ذخیره اخذایله عقبایه قویما فوت اولا فرصت
.
حسینه آغلاماقین اجری وار مصائبون ده قلم ویر
حسیندی روز قیامت ایدن بو خلقه شفاعت
.
دوشور خیاله أو ساعت که بزم ابن زیاده
گیدوب حرملری گوز یاشلو دلده بیم اسارت
.
بیله خیال ایلمه مجلس عبید زیاده
گلن تمام رجال شریفدی او جماعت
.
نه بلکه جمله اراذل جماعتی او ستمگر
او گون او مجلسه ائتمشدی بیر خیالیله دعوت
.
تصور ایله نحاله قالوب بنات پیمبر
قدم او بزمه قویاندا گورنده خلقی او ساعت
.
او دور حرملر ایچینده اوزینی ایلدی پنهان
بلا خزینه سی زینب او مرتضایه شباهت
.
دولاندوروب گوزین ابن زیاد ناکس و بیدین
بلالی زینبی گوردی سوروشدی کیمدی او عورت
.
جواب گلمدی اول سوالین ایلدی تکرار
جواب ویردیله زینبدی کان عفت و عصمت
.
ایشیتدی زینب آدین شاد اولوب او کافر مطلق
او لال اولان دلین آچدی بقصد طعن شمادت
.
دیدی که حمد اولا حقه سیزی جهاندا ایدوب خوار
حسینی ئولدوروب اما یزیده ویردی ریاست
.
یالان خبرلروزی ظاهر ایتدی خالق عالم
یتیشمدی سیزه دنیاده افتخار خلافت
.
بو گفتگو گتوروب درده زینبی دوروب اولدم
جواب ویردی او ملعونه دخت شاه ولایت
.
بیوردی حمد ایدرم خالقه که دار فناده
بیز اهلبیتی ایدوب صاحب مقام و فضلیت
.
پیمبریله ویروبدی بیزه جهاندا تفضل
که بیزده واردی نبوت یتوب مقام امامت
.
بو خانواده مبرّادی جمله رجس و خطادن
گور ای لعین خطا دیده کیمده وار بو لیاقت
.
یالانچی سنسن ازلدن سنون آتاندی آناندی
دیمز یالان مگر عالمده نانجیب اهل شقاوت
.
آتاسی شیر خدا تک ایله یتوردی بیانین
زیادین اوغلونی غیظه گتوردی حرف حقیقت
.
ایاقه دوردی او علیا جنابه حمله ور اولدی
خیالی واریدی ایتسون او بی پناهه جسارت
.
او نانجیب شقى قصد ایدنده زینب زاری
خانمدا دوردی ایاقه دوتوبدی مجلسی وحشت
.
دوراندا زینب ایاقه ایاقه دوردی خانملار
تمام خلقده دوردی ظهوره گلدی قیامت
.
اوشاقلارین گویه واعمه تا صداسی اوجالدی
قارشدی بیر بیره عورت اوشاق پوزولدی جماعت
.
گلوردی زینبی ئولدورسون اول ستمگر بیدین
دوتوردی دامن زینبدن اهلبیت رسالت
.
علی اکبر آناسی گوزونده گوز یاشی اولدم
باخوبدی رأس علی اکبره دیردی او حضرت
.
اوغول على سنی بویرده آرزو ایدیرم من
گوریدون عمه وی جلاد الینده ای گل جنت
.
او قدری قالموری عالمده عمه سیز قالا قزلار
امان بو ظلمدن ایتدی جهانی غرق مصیبت
.
باخاندا رأس علمداره اولدم حضرت کلثوم
دیردی گل ایله قارداش بو گون باجوندان حمایت
.
سنون گوزوندن ایراق ئولدورولّه زینبی قارداش
گروه کینه ده یوخدی بو گونده رحم و مروت
.
بیری بیرینه قارشمشدی بانوان مکرم
باخاردی دوره دن امّا یوخیدی کیمسه ده جرئت
.
گوروب بو حالی حریث اوغلی عمر دوردی ایاقه
زیادین اوغلونا هی ویردی ای امیر سیاست
.
بو بیر اسیریدی قارداشلاری گیدوبدی الندن
حوادثات جهانی گوروبدی ائتمه مذمّت
.
خطاگر ایلیه عورتدى ال گوتور داخی بوندان
اسیره دور اوزی ائتمه بونا بو قدر اذیّت
.
دوباره تختنن اوسته اوتوردی اول سگ هاری
حسین باشین اله آلدى یوزونده حال منیّت
.
شمادتیله دیدی رأس شاه تشنه لبانه
حسین قوجالمشیدون ائتمدون ندن منه بیعت
.
باش اگمدون باشوی قویموشام برابره ایندی
اسیر دور حرمین قولاریندا قید مذلّت
.
کومک لرون هانی عباس و اکبره نه گلوبدی
هانی گلوب گوره لر مجلسمده وار نه جلالت
.
اوتانمادی او زنازاده بیر دم آل علیدن
او که شمادتیدی ایلدی او پرده نهایت
.
یورولدی ظلم الین آچدی گوتوردی تیغ فناری
او گل دوداقلارا ویردی واریدی بسکه قساوت
.
خیاله سالمادی روز جزای موقف حشری
ولو گوروردی که یوخدی او باشدا جای سلامت
.
او قدر ظلم ایلدی گوردی ناگهان او ستمگر
بلا اودی بوریوب قصری وار نشان هلاکت
.
دوروب ایاقه که قاچسون گلوبدی نطقه کسوک باش
دیدی هارا قاچوسان وار دلنده دودۀ غفلت
.
نه اضطرابه دوشوبسن بو عالمین اودی دورگور
دیمورسن آخر ئولوم واردی اهل جوره عقوبت
.
ز بسکه کفر و عداوت بناسی محکمیدی چوخ
آیلمادی ابداً کوردی تا علاوه چوخ آیت
.
همان او حالده بیهوش اولوبدی حاله گلنده
دوباره آلدى اله رأس شاهی ایتدی اهانت
.
بوغم تمامه یتشمز علومی یازما اماندی
گتوردی نالیه اهل دلی بوغملو روایت
.
.
.
#مجلس_ابن_زیاد #علومی_تبریزی
#گچر_بو_عمر_عزیزیم_اماندی_ایلمه_غفلت
#ترکی
.
✍️ #زبدةالاشعار ✍️
.
🆔: @nohe_torki
نظر دهید