مبارزۀ حضرت اباالفضل (ع) با مارد
.
✍️ زبدة الاشعار ✍️
.
🆔: @nohe_torki
.
ستوده زنجانی
.
گینه فُلک خیالیم سیر ائدور بحر خروشانی
الیمده خامه جولان ایلیور میدان طغرانی
قالوب حیران نجه ثبت ایلسون شرح قضایانی
نجه یازسون قالوبدی تشنه لب خردا بنات آغلور
سوسوزلار حالینه سقّا یانور آب فرات آغلور
.
.
بودور فکریم گزم وهم عالمینده عشق بازارین
آلام بیر قطره گوزیاشی یووام عشّاق رخسارین
سئچم بیربیر ابوالفضلین بو مجلسده عزادارین
توسل ایلیاق باهم اوزون قوللی علمداره
اؤزی باب الحوائج دور ائدر هر مشکله چاره
.
.
یازالّار روز عاشورا سوسوز اهل حرم قالدی
هجوم ائتدی سپاه کین خیام اطرافینی آلدی
تحمّل ائتمدی سقا سو مشگین دوشینه سالدی
حضور سبط طاهایه گلوب عرض ائتدی یامولا
اوشاقلار العطش سسلور خجالتدن ئولور سقا
.
.
منی قویما یانوم بوندان علاوه آتش غمده
سرافراز ایله مولا نوکرون بو آخرین دمده
فقط بیر لحظه رخصت وئر ووروم تا پرچم علقمده
داریخدوم لطف ائله آزاد قیل رزمنده ام قارداش
نه امرون وار بویور چیخمام سوزوندن بنده ام قارداش
.
.
نقدری التماس ائتدی آلانموب اذن دعوانی
سووا مأمور ائدوب شاهنشه اقلیم او سقانی
دئدی جنگ ایلمه قارداش مدارا ایله دونانی
منیم سندن صورا بوچولده یوخدی یاوریم قارداش
سنی اللهه تاپشوردوم قالور بیر اصغریم قارداش
.
.
علیّ المرتضی اوغلی عقاب اوستونده گورسندی
اوزون قوللار اوجا پرچم الینده تلّیدن اَندی
اوجا صوتیله غیظیله گروه کینی سسلندی
دایاندی مرکز میداندا خطبه ایلدی ایراد
دئدی آگاه اولون ای حامیان ظلم و استبداد
.
.
وزیر شاه دینم من ابوالفضل اسد صولت
حسیندور پادشاه کلّ هستی زینت خلقت
خوادار حسینم من، یزیدین جدّینه لعنت
حسینه ال تاپانماز تا منیم جانیم سلامتدور
حسینوندور بو قولدا باشدا، منده بیر امانتدور
.
.
حسین عشقینده مشتاقم دوشه قوللار چیخا جانیم
مباهات ایلرم احقاق حق اوسته آخا قانیم
عبث اطلاق اولوب فکر ایلوسوز اون یدّی عنوانیم؟
بو دشتی بحر خونه دوندرم وار قدرتیم اما
سو تحصیل ائتماقا مأمور ائدوبدور سرور بطحا
.
.
اوجالدی نعره سی شیرون پوزوب آرایش جنگی
توکردی تپراقا سرلشگر و سرتیپ و سرهنگی
باخور اول ضیغمه هرکس اسور جسمی قاچور رنگی
دیور آگاه اولون لشگر منم ماه بنی هاشم
امامیمدور حسین بن علی ایستکلی قارداشیم
.
.
منم امّ البنین اوغلی رشادتله قلج چاللام
گورون ایندی بوگون سیزدن شهیدلر قانینی آللام
قصاص اکبره یوز یوز باشی بو تپراقا ساللام
دایانما ابن سعد بی حیا آل باشلاری تحویل
علی دانشگهینده رزمی عباس ایلیوب تحصیل
.
.
ایا سعد بن وقاص اوغلی باخ گور بیر نه طوفاندی
یاغور باش کربلانین تپراقی قانیلن الواندی
علمدار حسینم من آدیم سقای طفلاندی
اگر فرمانده کلّ قواسن لشگرین چوخدی
مصاف شیره مین لر روبه اولسا جرأتی یوخدی
.
.
ایا ای جنگجویان عرب بس هاردا پنهان سوز
نجاتوز یوخ بو دریادن دچار موج طوفان سوز
بئله فکر ایلیسوز وار قدرتوز یا مرد میدان سوز
کیمین وار جرأتی گلسون منیلن روبرو دورسون
علینون یادگاری گردنیندن رگلرین قیرسون
.
.
باخوردی سعدین اوغلی خیمه سینده دیزلری لرزان
دئدی بس هاردادور مارد دئیون گلسون بورا الآن
مگر سیز گورموسوز بوردا علی اوغلی سالوب طوفان
بو نوعیله ائدور دعوا بو چولده بیر نفر قالماز
به غیر از مارد عباسه بو میداندا حریف اولماز
.
.
چیخوبدور خیمه سیندن گوردی مارد تیتریور صحرا
سوروشدی بو نه غوغادور او کیمدور ایلیور دعوا
یوخیدی فارس یل، یلده ده بو قدرت هیجا
جواب آلدی بودور عباس حریفی یوخدی دنیاده
دیور هل من مبارز سن بو جنگه تئز اول آماده
.
.
یازولّار ماردی اعراب ایچینده صاحب شهرت
قوی هیکل دلاوردور دوتار هر جنگیده سبقت
فنون رزمین استادی حریفه ایلییر دقّت
گلور عباسی مغلوب ایلسون خوش امتیاز آلسون
حسینون یار و غمخوارین عقاب اوستن یره سالسون
.
.
دئدی مارد صدیف اوغلی منم فرمانده جنگم
بو اردوی یزیده سرورم سردار و سرهنگم
منم دعوالر اصلانی اؤزوم استاد نیرنگم
دوشوبسن چنگ صیاده دوشوبسن بنده ای عباس
یزیده ائتگیلن بیعت قویوم قال زنده ای عباس
.
.
منم اُول مارد یل یل جهاندا یکّه تازم من
هژبر بیشۀ هیجا همیشه سرفرازم من
دوشوبسن چنگیمه قوش تک گوررسن شاهبازم من
گله موج خروشان ماردی یردن قازا بولمز
صدیفون اوغلونون قتلین علی اوغلی یازا بولمز
.
.
او دم ماه بنی هاشم بو نوعی گلدی گفتاره
اسد بیلمه اؤزون مارد شبیهین چوخدی کفتاره
دیلین باغلا الین آچ اولگینان آماده پیکاره
سنی بو رزمگهده خوار ائدوب بیر آندا سیندیرّام
نقدری سندن اولسا رزمگهده گردنین قیرّام
.
.
بابام حیدر نجیکه مرحبی ئولدوردی خیبرده
اونون تک قادرم منده سنون نعشون قویام یرده
علینون اوغلی عباسین حریفی یوخ بو لشگرده
اجل گئتدی سنی مارد ابوالفضلیله دعوایه
منی اوتوز بش ایلدور بسلیوب مادر بو هیجایه
.
.
نبرده عزم ائدوب مارد اؤزون فرض ایلیوردی یل
مهارتله وراندا نیزه سین عباسه اول خزعل
اوجالدی گوگده دوتدی بارماقیلان نیزه نی بیر ال
بویوردی من ابوالفضلم نجاتین یوخ بو میداندان
اگر وار قدرتین آل نیزه وی چنگال اصلاندان
.
.
اوشاقلیقدان منی بو رزمه تعلیم ایلیوب حیدر
قماطیمده ئوپوبدور قوللاریمدان فاتح خیبر
او قولدان که علی ئوپسون او قول گور جنگیده نیلر
سنون آدین بو لشگردن خیالیم وار قازام مارد
حسینون دشمنین سیندیرماقا نیلوم بازام مارد
.
.
دوتوبدی ایکّی الّی نیزه دن مارد گوجون ووردی
ایکی انگشت آراسیندا او نیزه قفل اولوب دوردی
صدیفون اوغلونون وقرین علینون اوغلی سیندیردی
نفسلر حبس اولوب گوزلر باخوردی دست عباسه
نجه تاب ایلیور مارد بو ضرب و شصت عباسه
.
.
ائلیکه نیزیه وئردی تکان سردار عاشورا
گوروب مارد دوشور آتدان قواسی ائتموری یارا
سینور بازو چیخور کتفی بدندن آیریلور اعضا
ال اوزدی نیزه دن مارد وجودی لنگره دوشدی
اورکدن چکدی بیر ناله یوزی اوسته یره دوشدی
.
.
قاچیردور آت دؤشونده ماردی اول رابض بی باک
زمین کربلا تیترور حجابین رد ائدوب افلاک
باخور عرش اهلی فرش اوسته گورور بیر چابک و چالاک
او سایسیز دشمنون ایچره گتوردی ماردی تنگه
هزاران مرد جنگیدن بیری قویمور قدم جنگه
.
.
ائوین آباد اولا امّ البنین لرزه ائدور داغ داش
بیر اوغلان بسلیوبسن که اولوب یوزمین نفردن باش
یرین بوشدور اولیدون سن او لحظه کربلاده کاش
گوریدون قدرت کفری نجه الدن آلوب عباس
سپاه کوفه و شامین یلین دلدن سالوب عباس
.
.
سراسیمه آتوب سس مارد ای قوم جفا پیشه
باخورسوز ریشهٔ کفره علی اوغلی ورور تیشه
عُمرده عرضه یوخ شمر دغا سن ایله اندیشه
منی قورتار ابوالفضلین الیندن ای زنازاده
غروریم سیندی خوار اولدوم دئ لشگر اولسون آماده
.
.
قوشون اهلی گتوردی مارده بیر تیز رو مرکب
سواره جنگ شیر شرزه یه اقدام ائده ثعلب
حسندن غارت اولموشدی او مرکب غملی دور مطلب
ائلیکه دوشدی عباسین گوزی اول مرکبه ناگاه
حسن قارداشینی یاده سالوب دلدن چکوب بیر آه
.
.
باخوردی تلّین اوستوندن حسین سلطان مظلومان
دئدی الله اکبر سسلنوب قارداش قولون قربان
اماندور مارده وئرمه امان ای فارس میدان
ائله وور نیزه وی قوی ماردون حلقومی دوغرانسون
قریلسون گردنی باشی دریسی اوسته تولانسون
.
امیر دولت عشقین وزیری صوتینی آلدی
دوروبدور زینین اوستوندن رکابه لنگرین سالدی
سنانین اوینادوب حلقوم مارددن نجه چالدی
آت اوستوندن هوایه قوزادی اول جسم مرداری
هواده گزدوروب بیر آز آتوبدور لشگره ساری
.
.
جالاتدی ماردین نعش کثیفین تپراقا یاخدی
چکوب بیر نعره میداندا فراتین سمتینه شاخدی
فرات اوسته دوران دورت مین موکل قورخودان آخدی
قویوب یوز کوفیه لشکر قاچوللار دسته به دسته
بوشالدی نهرین اطرافی گلور سقا فرات اوسته
.
.
حسیندن رخصت آلموشدی اوگون نهری آلا عباس
حسینون پرچم فتحین لب نهره چالا عباس
سکینه وئردیگی مشگی انوب نهره سالا عباس
گوزی دوشدی سووا غملر ائدوبدور صبرینی تاراج
دئدی سقّا اولوب ای سو بوگون بیر مشگیوه محتاج
.
.
بئله فکر ایلمه ای سو خیالیم وار ایچم سندن
نقدری تشنه اولسامدا بودور فکریم گئچم سندن
بو مشگین قدریجه امکانیم اولسا من سئچم سندن
منیلن همره اول باهم گئداق دیدار معشوقه
یانور عطشان دوداقلار گورسه سو قیزلار گلر شوقه
.
.
بوگون اوچ گوندی ای سو اصغرین رنگی سولوب گل تک
ترنّم ایلمور دلدن دوشوب افسرده بلبل تک
سوسوزدان خشک اولوب حلقی سینوردی ساق سنبل تک
چیخاندا خیمه دن ئولدوم بونی باور ائله ای سو
سو کی سقادن آیریلماز یانا سقا بئله ای سو
.
.
اگر سالم قالان مشگیمده ای سو یکّه تاز اولّام
سنی مدرک ائدوب پابوس سلطان حجاز اولّام
سو وئرّم خیردا اطفاله همیشه سرفراز اولّام
دایان چیگنیمده محکم تیترمه ای مشک لرزانیم
سنه وابسته دور الآن منیم سقالوق عنوانیم
.
.
کنار نهریدن سقا نیستانه یولون سالدی
کمین ائتدی عدو شهباز عشقین صاق صولون سالدی
حکیم بن طفیل آدلی ابوالفضلین قولون سالدی
قاچان لشگر یریندن اوینادی بیر یاندا توپلاشدی
تاپوب روباهیلر جرأت یارالی شیره ال آچدی
.
.
نیستاندان چیخوب قولسوز دیشینده مشک لرزانی
اوجا پرچم سالور لنگر سوزور بازولرین قانی
باسوبدور سینیه مشگی سلامت قالسون عنوانی
سینیق کشتی کیمی سالموش عدو عباسی طوفانه
جماعت فوج فوج الله قاچور بیر سمت میدانه
.
.
وروبلار دورینه حلقه قالوب چون نقطه پرگار
اؤزی عطشان یورولموشدی بدن مجروحیدی تب دار
ورور بیر السیزی هرکس الینده هر نه وار ابزار
دونور گه سمت اخیامه باخور تلّ اوسته حسرتله
یول آچسا مرکبیم وئرّم سویی قیزلاره سرعتله
.
.
کمانداران ابوالفضلی هدف دوتدی اوخون سیخدی
او اوخلار که اوتورموشدی کماندا چلّه دن چیخدی
گلن دورت مین اوخیدی تک بیری عباس ائوین یخدی
شتابیله ابوالفضله طرف پرتاب اولوب گلدی
یارالی سینه سی اوسته دگوب سو مشکینی دلدی
.
.
قانیله سو قاریشدی بیر بیره سقا اولوب مأنوس
سوزور مشکین سویی یوخدور الی حفظ ایلسون افسوس
قالوب میداندا سرگردان شمارش باشلانوب معکوس
شل اولسون حرمله وای اوچ پر اوخدان وای ابوالفضله
حسین سسلندی تل اوستن ابوالفضلیم اؤزون گوزله
.
.
او اوخ بیر اوخدی اوچ شعبه کسرلی تیغه سی الماس
یازالّار سجده گاهیندن دگوب اول لحظۀ حسّاس
داغیلدی سجده گه ساکت دایاندی حضرت عباس
اگوب باشین اوخی دوتدی دیزیله چکدی اول حضرت
کلاخودی دوشوب باشدان سالوب نوفل اله فرصت
.
.
عمود آهن هوایه قوزانوب نوفل چاتوب کامه
ابوالفضلین باشی عریان نجه شرح ایلسون خامه
اَننده فرق عباسه سسی پخش اولدی اخیامه
گوزینی فاطمه یومدی دئدی گل سینمه اوغلوم
چاغیر قارداشوی گلسون گله دردین منه اوغلوم
.
.
دایان ای طبع سرشاریم بو مطلب قوی بئله قالسون
عقاب اوستن نجه دوشدی یره سقا هله قالسون
آچان مشکل لری قالدی اوزی نه مشکله قالسون
علمداری« #ستوده»گوردی رؤیاده آلوب عنوان
ابوالفضل ای یل امّ البنین ایثاریوه قربان
.
#عباسیه_شجاعت
#گینه_فلک_خیالیم_سیر_ائدور_بحر_خروشانی
#ستوده_زنجانی
#ترکی
.
✍️ #زبدةالاشعار ✍️
.
🆔: @nohe_torki
نظر دهید