کوفه
.
✍️ #زبدةالاشعار ✍️
.
🆔: @nohe_torki
.
مرحوم وافی تبریزی
.
گینه محرک غیبی ایدوب منی تحریک
ایدوم وقایع آلام کوفه نی تفکیک
.
اولاندا کوفیه وارد بنات شاه حجاز
غریبه وضعیله ایتمیشدی کوفیان پیشواز
.
چالاردیلار دف و طنبور چنگ بربط و نای
بیری بیرینه قاریشمیشدی کره نای و درای
.
دورا دورا چکیلوردی قطار آل الله
نچون آچوخ یولی دوتموشدی فرقۀ گمراه
.
کیمی اتکلرینه داش یغوب ایدردی نشان
جدا باشندا کسوک باشلاری گورن هر آن
.
جداده رأس جوانان هاشمی یکسر
گچردی مدّ نظردن آیا گونه بنذر
.
تمام باشلاری وورمیشدیلار جِدا باشنا
بو فکریله اولا آماج درد و غم داشنا
.
ولی او باشلار ایچینده بیری سِچلمشدی
که رخت مهر و وفا بیر اونا بیچلمشدی
.
گوروب روا دگی شه باشی نیزده اوجالا
آدینی نوکر ایدن شاهیله برابر اولا
.
کسوک باشیله گینه عزّته تمایل ایدوب
باشین کسن آتینون بوینونا حمایل ایدوب
.
دولاندیروب آتینی فخریله او کینه شعار
ایدردی طعن و شمادتله دمبدم اظهار
.
بو باش منیم آتیمون بوینونون که زیوریدور
حسین تشنه لبون بو امیر لشگریدور
.
آت اوینادان داش آتان کف چالان اناث و ذکور
او باشلارین قاباقنجه دوشوب ایدردی عبور
.
بیری دینده بو شمس هدادی جلوه لنور
بیری دیردی گلون خارجی اسیری گلور
.
بیری دینده بولار اهلبیت طاهادور
بیری دیردی سالوبلا کمنده اولادور
.
بیری دینده بولاردور بنات پیغمبر
بیری دیردی اسیر فرنگدور یکسر
.
تمام غرفه لری ایلمیشدیلر اشغال
زنان کوفه تماشایه آختاروردی مجال
.
باخوب یانان یوخیدی گوزده قانلی یاشلارینا
کیمیسی گل کیمی توپراق توکردی باشلارینا
.
یتنده بیر یره بیر غرفه ایچره بیر عورت
گوروب او حال اسفناکی ایلدی رقت
.
دئدی دیولّه بولار زنگبار اسیریدیلر
بو سوز غلطدی یقین کینه دستگیردیلر
.
بولارکی آدلارینی خارجی قویوبلا تمام
بولار دگولّه مگر اهلبیت شاه انام
.
دولاندیران بولاری ظلمیله گذرلرده
یزید ایدن ستمه ایستیور چکه پرده
.
من ایندی مسئله نون اصلینی سوال ایدرم
سوزون حقیقتنی هر نه اولسا کشف ایدرم
.
بو آرزوئیله ناگه مرامی حاصل اولوب
اسیرلر شرفی زینبه مقابل اولوب
.
ادبله عرض ایلدی ای بلا کشیده خانم
اولان جفای فلکدن قدی خمیده خانم
.
دیون گوروم منه سیز هانسی گلشنون گلوسوز
گلی خزانه دونن مرغزار بلبلوسوز
.
هارالیسوز کیمه وار نسبتوز ندور نسبوز
بو ذلتیله اسیر اولماقا ندور سببوز
.
جواب ویرمدی زینب ایدوب دوباره سوال
ادبله عرض ایلدی ای سپهر حسنه هلال
.
بویور گوروم سیزی تاری هارا مسافری سوز
جنایتوز ندی آلام غم مجاوری سوز
.
بلالی زینبون آرتیردی آه و ناله سینی
سرشگ نابیله دولدوردی گوز پیاله سینی
.
خانم توجه ایدوب سویلدی که ای عورت
نه اعتباریله من سنله ایلیوم صحبت
.
تانیمیرام سنی من دوست یا که دشمن سن
شماتت اهلی دگولسن محل ایمن سن
.
دئدی خانم سیزون احوالوزه پریشانم
بو قدر وار نماز اهلی ام مسلمانم
.
بو شهره گلمه میشم من سیزی شماتت ایدم
شکسته قلبه باشارسام گرک حمایت ایدم
.
خانم بویوردی ای عورت نماز ایدنده ادا
تشهدوزده نه ذکر ایلیسوز دیون آیا
.
ادبله سویلدی ای بانوی دیار حجاز
بودور تشهّدیمیز هر زمان قیلاندا نماز
.
دیروخ اَشهَد اَن لا اله الا الله
دالنجا وحده پس لاشریک له آنگاه
.
دینده اَشهَد انَّ محمّدا او زمان
ایاقه دوردولا یکسر یاننداکی نسوان
.
گوروب محمد آدین ذکر ایدنده اول عورت
او اسم خاطرینه ایتدیلر هامی حرمت
.
خطاب قیلدی محمد کیمون آدیدی مگر
بو نوع حرمت ایدیرسوز او اسمه سیز یکسر
.
دئدی خانم اونا روحیم منیم اولا قربان
اودور پیمبر اکرم رسول عالمیان
.
بیزه عقیدۀ اسلامی ایلیوب تعلیم
روادی اسم شریفین دیاخ بلا تکریم
.
گرک دینده محمد آدین ایداخ اکرام
که حرمتین بیزه واجب ایدوب خدای انام
.
ایشتدی بو سوزی زینب چکوب جگردن آه
دولاندی یثربه عرض ایتدی یا رسول الله
.
آدیوا کوفه ده حرمت بو امت ایللر
و لیک قیزلاریوا حتک حرمت ایللر
.
سنون مبارک آدون محترم بولوله مدام
حیالی قیزلاریوا خارجی قویوبدولا نام
.
بو یرده روم و فرنگ احترامی چوخ چوخدور
حسین حرملرینون لیک حرمتی یوخدور
.
اگر علت غائی اولان بو گفتاره
جزای خیریدی محشرده هر عزاداره
.
دلیل عمده سی بانی اولوبدی «مرّیخی»
یازوبدی خامیه «وافی» بو شرح تاریخی
.
گوروم خدای حسین ایلسون اونی مأجور
عزا دوتانلارین ایتسون حسینیله مشهور
.
#کوفه_وافی_تبریزی
#گینه_محرک_غیبی_ایدوب_منی_تحریک
#ترکی
.
✍️ #زبدةالاشعار ✍️
.
🆔: @nohe_torki
نظر دهید